اقوام متحدہ کی رپورٹ
غزہ: اسرائیلی فوج نے وسطی غزہ پٹی میں نصیرات کیمپ کو نشانہ بناتے ہوئے فضائی حملے کیے ہیں۔ اس حملے میں کم از کم 32 فلسطینی مارے گئے جن میں زیادہ تر بچے اور خواتین تھیں۔ گورنمنٹ میڈیا آفس کے ترجمان اسماعیل الثوبتہ کا کہنا ہے کہ الاقصیٰ اسپتال اس وقت اپنی طبی صلاحیت سے تین گنا زیادہ پر کام کر رہا ہے، کیونکہ UNRWA اسکول میں فضائی حملے کی وجہ سے مہلوکین اور زخمیوں کی آمد کا سلسلہ جاری ہے۔
UNRWA کے اس اسکول کو بے گھر لوگوں کے لیے ایک کیمپ میں تبدیل کر دیا گیا تھا۔ طبی شعبے سے وابستہ ذرائع کے مطابق اسرائیلی لڑاکا طیارے نے اسکول کے کم از کم تین کلاس رومز پر بمباری کی۔ وہیں، اسرائیلی فوج نے تصدیق کی ہے کہ اس کے لڑاکا طیاروں نے علاقے میں UNRWA کے ایک اسکول کو نشانہ بنایا ہے۔
حماس کے زیر انتظام غزہ حکومت کے میڈیا آفس نے اسکول پر اسرائیلی حملے کی مذمت کرتے ہوئے اسے ‘خوفناک قتل عام’ قرار دیا ہے۔ دفتر نے کہا کہ اسرائیلی فوج حملے جاری رکھے ہوئے ہے، جو شہریوں کے خلاف کیے جانے والے نسل کشی کے جرم کا ثبوت ہیں۔
حماس نے کہا کہ اسرائیل اور امریکہ کو ان جرائم کی پوری ذمہ داری قبول کرنی چاہیے جو انسانیت کو خطرے میں ڈالتے ہیں اور بین الاقوامی قوانین کی خلاف ورزی کرتے ہیں۔ فی الحال اسرائیلی جانب سے اس واقعے پر کوئی ردعمل سامنے نہیں آیا ہے۔
نصیرات پناہ گزین کیمپ میں UNRWA اسکول کے اندر کئی لوگوں سے الجزیرہ نے بات کی ہے۔ کیمپ میں موجود انس الدہوق نے بتایا کہ وہ اسکول کے اندر تھے اور اچانک ہم پر بمباری ہوگئی، یہاں کے لوگ ایک سخت رات میں ٹکڑے ٹکڑے ہو گئے…اس عمارت میں خاندان اور نوجوان رہائش پذیر تھے، اور گولہ باری بغیر کسی وارننگ کے کی گئی”۔
ایک اور شخص، نعیم الدادہ نے کہا کہ یہ فضائی حملہ “ریاست اسرائیل کی دہشت گردی کا نتیجہ ہے… اسرائیل کے علاوہ کوئی دہشت گرد نہیں ہے، غزہ میں اسرائیل تمام ادارے اور ریڈ لائن سے تجاوز کر گیا ہے”۔
اس نے وضاحت کی کہ وہ غزہ شہر سے، پٹی کے شمال میں، خان یونس اور پھر جنوب میں، رفح میں بے گھر ہوئے تھے۔ اس نے کہا کہ وہ اور اس کا خاندان جہاں بھی گیا، ان پر بمباری کی گئی، “اور جب ہم نصیرات کیمپ پہنچے تو یہاں بھی ہم پر بمباری کی گئی”۔
بھارت ایکسپریس۔
