مرکزی وزیر داخلہ امت شاہ نے ہفتہ کے روز پنجاب کے ضلع موگا میں منعقدہ ”بدلاؤ ریلی“سے خطاب کرتے ہوئے ریاست کی حکمراں جماعت عام آدمی پارٹی پر شدید تنقید کی اور کہا کہ پنجاب کے عوام کو ایک بار بھارتیہ جنتا پارٹی کو بھی موقع دینا چاہیے تاکہ ریاست میں حقیقی تبدیلی لائی جا سکے۔ اپنے خطاب میں امت شاہ نے کہا کہ پنجاب کے عوام ماضی میں کئی سیاسی جماعتوں کو اقتدار میں لا چکے ہیں۔ انہوں نے کہا کہ کبھی کانگریس کو موقع دیا گیا اور کبھی شرومنی اکالی دل کو، جبکہ حالیہ برسوں میں عام آدمی پارٹی کو بھی حکومت بنانے کا موقع ملا، لیکن اب وقت آ گیا ہے کہ ریاست میں بھارتیہ جنتا پارٹی کو بھی آزمایا جائے۔
انہوں نے کہا کہ پنجاب کے عوام بدعنوانی اور بدانتظامی سے تنگ آ چکے ہیں اور ریاست میں حقیقی تبدیلی چاہتے ہیں۔ ان کے مطابق بھارتیہ جنتا پارٹی نے ملک کی کئی ریاستوں میں ترقیاتی ماڈل پیش کیا ہے اور اسی طرز پر پنجاب میں بھی بہتر حکمرانی قائم کی جا سکتی ہے۔ انہوں نے مثال دیتے ہوئے کہا کہ اڈیشہ، آسام، منی پور، تریپورہاور اتراکھنڈ میں بی جے پی کی حکومتوں نے ترقیاتی کاموں کو آگے بڑھایا ہے۔ وزیر داخلہ نے عام آدمی پارٹی کی قیادت کو تنقید کا نشانہ بناتے ہوئے کہا کہ یہ جماعت تبدیلی کے وعدے کے ساتھ اقتدار میں آئی تھی، لیکن وہ اپنے وعدوں کو پورا کرنے میں ناکام رہی ہے۔ انہوں نے سوال اٹھایا کہ پنجاب کے وزیر اعلیٰ بھگونت مان نے اب تک ریاست کے لیے کیا نمایاں کام کیا ہے۔
امت شاہ نے الزام لگایا کہ عام آدمی پارٹی کے کنوینر اروند کیجریوال ملک بھر میں سفر کرنے کے لیے پنجاب حکومت کے وسائل استعمال کرتے ہیں جبکہ ریاستی حکومت عوامی مسائل کے حل پر خاطر خواہ توجہ نہیں دے رہی۔ انہوں نے کہا کہ عام آدمی پارٹی نے اقتدار میں آنے سے قبل پنجاب کے عوام سے بڑے بڑے وعدے کیے تھے۔ ان وعدوں میں 25 لاکھ نوکریاں فراہم کرنا، ریاست کو منشیات سے پاک بنانا اور تمام فصلوں کے لیے کم از کم امدادی قیمت یعنی ایم ایس پی فراہم کرنا شامل تھا، مگر ان وعدوں پر عمل درآمد نہیں کیا گیا۔
امت شاہ نے کہا کہ موجودہ حکومت جھوٹے وعدوں اور بدعنوانی میں گھری ہوئی ہے اور متعدد گھوٹالوں کے الزامات کا سامنا کر رہی ہے۔ ان کے مطابق ایسی حکومت پنجاب کے عوام کی بھلائی نہیں کر سکتی۔ انہوں نے یہ بھی الزام لگایا کہ پنجاب حکومت دراصل اروند کیجریوال کے لیے ایک ”اے ٹی ایم“ کی طرح کام کر رہی ہے۔ ان کا کہنا تھا کہ اگر کوئی جماعت ریاست میں منشیات کے مسئلے کو مؤثر طریقے سے ختم کر سکتی ہے تو وہ صرف بھارتیہ جنتا پارٹی ہے۔ اپنے خطاب کے اختتام پر امت شاہ نے کہا کہ بھارتیہ جنتا پارٹی 2027 کے اسمبلی انتخابات میں پوری قوت کے ساتھ میدان میں اترے گی اور پنجاب میں حکومت بنانے کی کوشش کرے گی۔ انہوں نے خواتین، بزرگوں اور نوجوانوں سے اپیل کی کہ وہ پارٹی کو مضبوط بنائیں تاکہ ریاست میں ترقی، روزگار اور امن کو یقینی بنایا جا سکے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
