لالو پرساد یادو کے قریبی رکن اسمبلی بھائی ویریندر نے نتیش کمار کو بڑی پیشکش کی ہے۔
نئی دہلی: راشٹریہ جنتا دل (آرجے ڈی) کے سربراہ لالو پرساد یادو کے قریبی اوررکن اسمبلی بھائی ویریندرکا ایک بڑا بیان سامنے آیا ہے۔ جمعرات (26 دسمبر) کوکھگڑیا میں میڈیا سے بات چیت کے دوران انہوں نے کہا کہ سیاست میں کچھ بھی ممکن ہے۔ سیاست میں نہ کوئی مستقل دوست ہوتا ہے اورنہ ہی دشمن ہوتا ہے۔ ان سے سوال کیا گیا کہ کیا بہارمیں پھرکھیلا ہوسکتا ہے؟ اس پر بھائی ویریندرنے کہا کہ بہارمیں کھیلا ہوا ہے اورآگے بھی ہوسکتا ہے۔ سیاست صورتحال کے مطابق کھیل ہے، جب جیسی صورتحال ہوگی ویسا کام کیا جائے گا۔
آرجے ڈی رکن اسمبلی نے مزید کہا کہ اگروہ (نتیش کمار) فرقہ پرست طاقتوں کوچھوڑکرآتے ہیں اوران کا بھی اگردل بھرگیا ہے فرقہ پرست طاقتوں کے ساتھ رہ کر، ملک کے غداروں کے ساتھ رہنے کی اب خواہش نہیں ہے تو یقینی طورپرہم ان کا استقبال کریں گے۔ این ڈی اے کے اندررسہ کشی کی قیاس آرائیوں کے درمیان آرجے ڈی رکن اسمبلی کے اس بیان نے بہارکی سیاسی سرگرمیاں بڑھا دی ہیں۔
آرجے ڈی رکن اسمبلی کے بیان پرجے ڈی یو کا ردعمل
ریاست کے نائب وزیراعلیٰ وجے کمارسنہا نے کہا کہ وزیراعلیٰ نتیش کمارکی قیادت میں بہارمیں گڈ گورننس کی حکومت ہے، جس سے بہار میں ترقی ہو رہی ہے۔ بہارمیں اسکول، روزگاراورتاجرہیں، اس لئے بہارکی عوام جنگل راج کی واپسی نہیں چاہتی۔ انہوں نے کہا کہ گھمنڈیا الائنس بھی بکھرگیا ہے۔ کانگریس کو پہلے وزیراعلیٰ کی کرسی دیجئے، بے چینی میں مت رہئے۔
بی جے پی نے آرجے ڈی پربولا بڑا حملہ
وہیں، بی جے پی کے ریاستی صدردلیپ جیسوال نے کہا کہ آرجے ڈی کے لوگ دن میں خواب دیکھنے لگے ہیں۔ اقتدارکی بے چینی میں وہ پاگل ہوگئے ہیں۔ پاگل پن میں کچھ بھی بیان دیتے رہتے ہیں۔ بی جے پی کے ریاستی ترجمان اروند سنگھ نے کہا کہ آرجے ڈی کے لیڈران مونگیری لال کی طرح حسین خواب دیکھ رہے ہیں۔ ان کو لوٹ-کھسوٹ کے دن یاد آرہے ہیں۔ جب دانا پوراوربہٹا میں گولیاں چلتی تھیں، لیکن اب بہارمیں ترقی ہورہی ہے۔
بھارت ایکسپریس۔
