پٹنہ: بہار میں خواتین کے خلاف بڑھتے جرائم اور قانون و نظم کی صورتحال کو لے کر راشٹریہ جنتا دل کے سینئر لیڈر اور بہار اسمبلی میں قائد حزب اختلاف تیجسوی یادو نے ریاستی حکومت پر شدید حملہ بولا ہے۔ انہوں نے الزام لگایا کہ سمراٹ چودھری کی قیادت والی این ڈی اے حکومت میں خواتین کے خلاف جرائم میں تیزی سے اضافہ ہوا ہے اور آج ریاست میں بیٹیاں خود کو غیر محفوظ محسوس کر رہی ہیں۔ منگل کو پٹنہ میں ایک پریس کانفرنس سے خطاب کرتے ہوئے تیجسوی یادو نے کہا کہ اقتدار کے تحفظ میں پلنے والے مجرم اب ریاست کی ماؤں، بہنوں اور بیٹیوں پر قہر بن کر ٹوٹ پڑے ہیں۔ انہوں نے کہا کہ حکومت کے قیام کو ابھی صرف ایک ماہ ہوا ہے، لیکن اس مختصر عرصے میں خواتین کے خلاف جرائم کے کئی سنگین واقعات سامنے آ چکے ہیں۔
تیجسوی یادو نے مختلف مجرمانہ واقعات کا حوالہ دیتے ہوئے وزیر اعلیٰ سمراٹ چودھری کو براہ راست نشانہ بنایا۔ انہوں نے کہا کہ ریاست کا محکمہ داخلہ خود وزیر اعلیٰ کے پاس ہونے کے باوجود مجرموں میں قانون کا کوئی خوف نظر نہیں آ رہا۔ ان کے مطابق بہار میں خواتین کی سلامتی سب سے بڑا مسئلہ بن چکا ہے، مگر حکومت صرف دعوے کرنے میں مصروف ہے۔ آر جے ڈی لیڈر نے کہا کہ بہار کی خواتین خود کو غیر محفوظ محسوس کر رہی ہیں اور حکومت خواتین کے تحفظ کے سلسلے میں مکمل طور پر ناکام ثابت ہوئی ہے۔ انہوں نے دعویٰ کیا کہ خواتین کو بااختیار بنانے کے حکومتی دعوے زمینی حقیقت سے بالکل مختلف ہیں۔ تیجسوی یادو کے مطابق آج بھی ریاست کی تقریباً 65 فیصد خواتین خون کی کمی اور صحت سے متعلق دیگر مسائل کا شکار ہیں، لیکن حکومت ان بنیادی مسائل پر توجہ دینے کے بجائے صرف تشہیر میں مصروف ہے۔
#WATCH | Patna, Bihar | Bihar Assembly LoP Tejashwi Yadav says, “…the manner in which crimes against women have surged under the NDA government, the administration led by Samrat Choudhary—there has been an alarming and unchecked rise in incidents. Criminals have unleashed a… pic.twitter.com/cQlSr70OIP
— ANI (@ANI) May 19, 2026
انہوں نے بہار کی سیاسی صورتحال پر بھی سوال اٹھاتے ہوئے کہا کہ گزشتہ چھ ماہ کے دوران ریاست میں دو مرتبہ وزیر اعلیٰ بدلے گئے۔ تیجسوی نے کہا کہ عوام کے منتخب کردہ وزیر اعلیٰ کو ہٹا کر ”منتخب شدہ وزیر اعلیٰ“ مسلط کیا گیا، جس سے جمہوری اقدار کو نقصان پہنچا ہے۔ تیجسوی یادو نے پولیس انکاؤنٹرز کے معاملے پر بھی حکومت کو آڑے ہاتھوں لیا۔ انہوں نے الزام لگایا کہ بہار میں ذات پات کی بنیاد پر انکاؤنٹر کیے جا رہے ہیں۔ انہوں نے طنزیہ انداز میں کہا کہ حکومت پہلے ریپ متاثرہ کی ذات دیکھتی ہے اور پھر ملزم کی ذات، اسی بنیاد پر کارروائی کی جاتی ہے۔
انہوں نے سوال اٹھایا کہ بالیکا گرہ اسکینڈل کے اصل ملزموں کے خلاف اب تک سخت کارروائی کیوں نہیں ہوئی۔ تیجسوی نے کہا کہ حکومت بعض معاملات میں فوری کارروائی کا دعویٰ کرتی ہے، مگر طاقتور اور بااثر افراد کے خلاف کارروائی سے گریز کیا جاتا ہے۔ آر جے ڈی لیڈر نے بی جے پی اور جے ڈی یو پر انتخابی وعدوں کے حوالے سے بھی حملہ کیا۔ انہوں نے کہا کہ انتخابات کے دوران خواتین کو دس دس ہزار روپے دیے گئے اور وعدہ کیا گیا کہ دوسری قسط میں دو لاکھ روپے فراہم کیے جائیں گے، مگر اب تک خواتین کو یہ رقم نہیں ملی۔ تیجسوی یادو نے خبردار کیا کہ اگر حکومت نے خواتین سے کیے گئے وعدے پورے نہیں کیے تو یہی خواتین آنے والے وقت میں اس حکومت کے خاتمے کا سبب بنیں گی۔ انہوں نے کہا کہ عوام اب حقیقت کو سمجھ چکے ہیں اور حکومت کے خلاف ناراضی میں مسلسل اضافہ ہو رہا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
