نئی دہلی : ملک کی آزادی کے لیے اپنی پوری زندگی وقف کرنے والے عظیم انقلابی واسودیو بلونت پھڑکے کی یوم پیدائش کے موقع پر ملک بھر میں انہیں خراج عقیدت پیش کیا جا رہا ہے۔ اس موقع پر مرکزی وزیر داخلہ امت شاہ، مرکزی وزرا نتن گڈکری، شیوراج سنگھ چوہان اور گری راج سنگھ سمیت کئی اہم لیڈروں نے انہیں یاد کیا۔ مہاراشٹر کے وزیر اعلیٰ دیویندر فڑنویس، مدھیہ پردیش کے وزیر اعلیٰ ڈاکٹر موہن یادو اور اتر پردیش کے نائب وزیر اعلیٰ کیشو پرساد موریہ نے بھی سوشل میڈیا کے ذریعے پھڑکے کے حوصلے، قربانی اور حب الوطنی کو سلام پیش کیا۔واسودیو بلونت پھڑکے کا شمار ہندوستان کی تحریک آزادی کے ابتدائی مسلح انقلابیوں میں ہوتا ہے۔ انہوں نے انگریز حکومت کے خلاف آواز اٹھانے کے ساتھ ساتھ سماج کے مختلف طبقوں کے لوگوں کو متحد کرنے کی کوشش کی تھی۔ ان کا ماننا تھا کہ ملک کی آزادی کے لیے صرف باتیں کرنا کافی نہیں، بلکہ اس مقصد کے لیے منظم ہو کر جدوجہد کرنا بھی ضروری ہے۔
امت شاہ نے انہیں حب الوطنی اور خدمت کی علامت قرار دیا
مرکزی وزیر داخلہ اور تعاون امت شاہ نے ایکس پر پوسٹ شیئر کرکے واسودیو بلونت پھڑکے کو خراج عقیدت پیش کیا۔ انہوں نے لکھا کہ پھڑکے کے لیے ملک کی آزادی اور ہندوستانیوں کے وقار کے تحفظ سے بڑھ کر کچھ نہیں تھا۔ انہوں نے سماج کے مختلف طبقوں کے نوجوانوں کو ایک ساتھ لا کر تحریک آزادی کے لیے تیار کیا۔امت شاہ نے ان کی سماجی خدمات کا بھی ذکر کیا۔ انہوں نے بتایا کہ قحط سے پریشان لوگوں کی مدد کرنے سے لے کر نوجوانوں کو تعلیم یافتہ اور بیدار کرنے کے لیے ’ایکیا وردھنی سبھا‘ کے قیام تک، پھڑکے کی زندگی خدمت اور حب الوطنی کی مثال رہی۔ شاہ نے انہیں بے شمار انقلابیوں کے لیے تحریک کا سرچشمہ قرار دیتے ہوئے ان کی یوم پیدائش پر سلام پیش کیا۔
نتن گڈکری اور شیوراج سنگھ چوہان نے بھی پیش کیا خراج عقیدت
مرکزی وزیر برائے سڑک ٹرانسپورٹ و شاہراہ نتن گڈکری نے بھی عظیم انقلابی کو یاد کرتے ہوئے انہیں خراج عقیدت پیش کیا۔ وہیں مرکزی وزیر زراعت شیوراج سنگھ چوہان نے واسودیو بلونت پھڑکے کو مسلح تنظیم ’راموشی‘ کا رہنما اور عظیم مجاہد آزادی قرار دیا۔شیوراج سنگھ چوہان نے اپنے پیغام میں کہا کہ مادر وطن کی خدمت کرتے ہوئے اپنی زندگی قربان کرنے والے اس بہادر سپوت کی داستان آنے والی نسلوں کو ملک کی خدمت کے لیے مسلسل ترغیب دیتی رہے گی۔ مرکزی وزیر برائے ٹیکسٹائل گری راج سنگھ نے بھی پھڑکے کو تحریک آزادی کا صف اول کا مجاہد قرار دیتے ہوئے ان کے بے مثال حوصلے اور قربانی کو یاد کیا۔ انہوں نے کہا کہ مادر وطن کی آزادی کے لیے ان کی جدوجہد ہمیشہ اہل وطن کو تحریک دیتی رہے گی۔
دیویندر فڑنویس اور موہن یادو نے بھی نے بھی کیا نمن
مہاراشٹر کے وزیر اعلیٰ دیویندر فڑنویس نے اپنے پیغام میں واسودیو بلونت پھڑکے کو مسلح انقلاب کا بانی قرار دیتے ہوئے کہا کہ انہوں نے ہندوستان کی جدوجہد آزادی کی بنیاد مضبوط کرنے میں اہم کردار ادا کیا۔مدھیہ پردیش کے وزیر اعلیٰ ڈاکٹر موہن یادو نے بھی انہیں بھارت ماتا کا عظیم سپوت قرار دیا۔ انہوں نے کہا کہ ملک کی آزادی کے لیے اپنا سب کچھ قربان کرنے والے پھڑکے کا حوصلہ، قربانی اور مادر وطن کے تئیں ان کی لگن ہمیشہ لوگوں کو تحریک دیتی رہے گی۔
اتر پردیش کے لیڈروں نے بھی یاد کی خدمات
اتر پردیش بی جے پی کے صدر پنکج چودھری نے پھڑکے کو انگریز حکومت کے خلاف جدوجہد کرنے والے عظیم انقلابی کے طور پر یاد کیا۔ انہوں نے خاص طور پر مسلح تنظیم ’راموشی‘ اور قبائلی سماج کو متحد کرنے میں پھڑکے کے کردار کا ذکر کیا۔وہیں اتر پردیش کے نائب وزیر اعلیٰ کیشو پرساد موریہ نے ان کی یوم پیدائش پر انہیں خراج عقیدت پیش کرتے ہوئے کہا کہ مادر وطن کی آزادی کے لیے اپنا سب کچھ وقف کرنے والی ان کی زندگی آنے والی نسلوں کے لیے ہمیشہ مشعلِ راہ بنی رہے گی۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
