PM Modi Amid Oil Crisis: پٹرول-ڈیزل بچائیں، ورک فرام ہوم اپنائیں اور ایک سال تک گولڈ نہ خریدیں… جنگ کے اثرات کم کرنے کے لیے وزیر اعظم مودی کی عوام سے اپیل

حیدرآباد: وزیر اعظم نریندر مودی نے عالمی توانائی بحران، بڑھتی مہنگائی اور جنگی حالات کے اثرات سے نمٹنے کے لیے عوام سے بڑے پیمانے پر بچت اور ذمہ داری کا مظاہرہ کرنے کی اپیل کی ہے۔ انہوں نے لوگوں سے پٹرول، ڈیزل اور گیس کے استعمال میں احتیاط برتنے، غیر ضروری اخراجات کم کرنے، ورک فرام ہوم کو دوبارہ فروغ دینے اور ایک سال تک سونا نہ خریدنے جیسے اقدامات اختیار کرنے کی درخواست کی۔ وزیر اعظم نے کہا کہ موجودہ عالمی حالات میں ہر شہری کی چھوٹی بچت بھی ملک کے لیے بڑی طاقت بن سکتی ہے۔ تلنگانہ میں تقریباً 9400 کروڑ روپے کے ترقیاتی منصوبوں کا ورچوئل افتتاح اور سنگ بنیاد رکھنے کے بعد حیدرآباد میں عوامی جلسے سے خطاب کرتے ہوئے وزیر اعظم نے کہا کہ دنیا اس وقت شدید سپلائی چین بحران سے گزر رہی ہے اور یوکرین جنگ نے عالمی معیشت پر مزید دباؤ بڑھا دیا ہے۔ انہوں نے کہا کہ ایسے حالات میں بھارت کو اپنی درآمدی ایندھن پر انحصار کم کرنا ہوگا تاکہ قیمتی زرمبادلہ بچایا جاسکے اور معیشت کو مستحکم رکھا جاسکے۔

#WATCH | Secunderabad, Telangana | On the impact of West Asia Conflict, Prime Minister Narendra Modi says, “In this time of global crisis, we have to make a resolution keeping duty paramount and fulfil it with complete dedication. A big resolution is to use petrol and diesel… https://t.co/fP7yTRIUHb pic.twitter.com/KEQOScsIK8

— ANI (@ANI) May 10, 2026

وزیر اعظم نے کہا کہ کورونا وبا کے دوران ملک نے ورک فرام ہوم، آن لائن میٹنگ اور ویڈیو کانفرنسنگ جیسے طریقوں کو کامیابی سے اپنایا تھا۔ ان کے مطابق اب وقت آگیا ہے کہ ان عادتوں کو دوبارہ فروغ دیا جائے تاکہ غیر ضروری سفر کم ہو اور پٹرول و ڈیزل کی بچت ہوسکے۔ انہوں نے کہا کہ ”اگر دفتر کا کام گھر سے ہوسکتا ہے تو ہمیں اسے ترجیح دینی چاہیے، کیونکہ یہ نہ صرف وقت بلکہ ایندھن کی بھی بچت کرے گا“۔ انہوں نے عوام سے اپیل کی کہ جن شہروں میں میٹرو ریل موجود ہے وہاں لوگ ذاتی گاڑیوں کے بجائے میٹرو کا استعمال کریں۔ وزیر اعظم نے کار پولنگ کو بھی فروغ دینے کی بات کرتے ہوئے کہا کہ اگر ایک ہی سمت میں جانے والے لوگ ایک گاڑی میں سفر کریں تو اس سے ایندھن کی بڑی مقدار بچائی جاسکتی ہے۔ انہوں نے کہا کہ مال برداری کے لیے بھی ریلوے کو ترجیح دی جائے کیونکہ بجلی سے چلنے والی ٹرینیں پٹرول اور ڈیزل پر کم انحصار کرتی ہیں۔

During the Corona period, we adopted work from home, online meetings, video conferences, and developed many such systems. We had also become accustomed to them.

Today, the need of the hour is that we restart those practices, as it would be in the national interest, and we must… pic.twitter.com/dmJUPWRjbz

— BJP (@BJP4India) May 10, 2026

وزیر اعظم مودی نے کہا کہ موجودہ حالات میں زرمبادلہ کی بچت قومی ذمہ داری بن چکی ہے۔ انہوں نے متوسط طبقے میں بیرون ملک شادیوں اور سیاحت کے بڑھتے رجحان پر بھی تبصرہ کرتے ہوئے کہا کہ ”اگر ملک مشکل دور سے گزر رہا ہے تو ہمیں ایک سال تک بیرون ملک سفر اور شادیوں کو مؤخر کرنے کے بارے میں سوچنا چاہیے“۔ ان کے اس بیان کو عوامی سطح پر کفایت شعاری کی اپیل کے طور پر دیکھا جارہا ہے۔ انہوں نے سونے کی خریداری کے حوالے سے بھی اہم بات کہی۔ وزیر اعظم نے کہا کہ بھارت بڑی مقدار میں سونا درآمد کرتا ہے، جس سے قیمتی زرمبادلہ خرچ ہوتا ہے۔ انہوں نے عوام سے اپیل کی کہ ملک کے مفاد میں ایک سال تک تقریبات اور شادیوں کے لیے سونا خریدنے سے گریز کیا جائے تاکہ زرمبادلہ کی بچت ہوسکے۔ ان کے مطابق چھوٹے چھوٹے اقدامات ملک کی اقتصادی طاقت بڑھانے میں اہم کردار ادا کرسکتے ہیں۔

The world is going through a major supply chain crisis. The Ukraine war has further increased global difficulties. Over the last 5–6 years, our Government has continuously worked to tackle this crisis.

Across the world, one bag of fertiliser is being sold for around ₹3000.

But…

— BJP (@BJP4India) May 10, 2026

وزیر اعظم نے توانائی تحفظ یعنی ”انرجی سکیورٹی“ کو مستقبل کے لیے نہایت اہم قرار دیتے ہوئے کہا کہ بھارت گزشتہ کئی برسوں سے متبادل اور صاف توانائی کے ذرائع پر تیزی سے کام کررہا ہے۔ انہوں نے کہا کہ بھارت آج شمسی توانائی کے میدان میں دنیا کے صف اول کے ممالک میں شامل ہوچکا ہے۔ ساتھ ہی انہوں نے پیٹرول میں ایتھنول کی ملاوٹ، سی این جی پر مبنی ٹرانسپورٹ سسٹم اور پائپڈ گیس نیٹ ورک کو فروغ دینے کے حکومتی اقدامات کا بھی ذکر کیا۔ وزیر اعظم نے کہا کہ حکومت نے پہلے ملک بھر میں ایل پی جی گیس کی رسائی کو یقینی بنانے پر توجہ دی اور اب سستی پائپڈ گیس سپلائی بڑھانے کی سمت میں کام جاری ہے۔ ان کے مطابق ان اقدامات کی وجہ سے بھارت عالمی توانائی بحران کا بہتر انداز میں مقابلہ کرنے میں کامیاب رہا ہے۔ تقریب کے دوران وزیر اعظم نے تلنگانہ کے لیے کئی اہم ترقیاتی منصوبوں کا افتتاح بھی کیا، جن میں سڑک، ریلوے، ٹیکسٹائل اور پیٹرولیم سے متعلق بنیادی ڈھانچے کے منصوبے شامل ہیں۔ اہم منصوبوں میں حیدرآباد-پنجی اقتصادی راہداری کے تحت قومی شاہراہ 167 کو چار لین بنانا، کازی پیٹ-وجئے واڑہ ریلوے ملٹی ٹریکنگ پروجیکٹ، گرین فیلڈ پیٹرولیم ٹرمینل اور ورنگل میں پی ایم متر پارک شامل ہیں، جسے کاکتیہ میگا ٹیکسٹائل پارک کے نام سے بھی جانا جاتا ہے۔

بھارت ایکسپریس اردو۔