لکھنؤ: اتر پردیش کے دارالحکومت لکھنؤ میں ایک کوچنگ سینٹر میں پیش آئے ہولناک آتشزدگی کے واقعے پر مختلف سیاسی رہنماؤں نے گہرے رنج و غم کا اظہار کیا ہے۔ اس حادثے میں اب تک 15 افراد کی موت کی تصدیق ہو چکی ہے، جن میں متعدد طلبہ بھی شامل ہیں، جبکہ کئی دیگر زخمی ہیں۔ مرکزی وزیر داخلہ امت شاہ نے سوشل میڈیا پلیٹ فارم ایکس پر اپنے تعزیتی پیغام میں کہا کہ لکھنؤ میں آتشزدگی کا حادثہ انتہائی افسوسناک اور دل دہلا دینے والا ہے۔ انہوں نے جاں بحق افراد کے اہل خانہ سے تعزیت کرتے ہوئے کہا کہ خدا انہیں یہ صدمہ برداشت کرنے کی ہمت عطا کرے اور زخمیوں کو جلد صحت یاب کرے۔
लखनऊ में आग लगने के कारण हुआ हादसा अत्यंत दुःखद और पीड़ादायक है। इस हादसे में जिन लोगों ने अपनों को खोया है, उनके प्रति संवेदनाएँ व्यक्त करता हूँ। ईश्वर शोकाकुल परिवारों को यह दुःख सहने की शक्ति दें। घायलों के शीघ्र स्वस्थ होने की कामना करता हूँ।
— Amit Shah (@AmitShah) June 22, 2026
پرینکا گاندھی نے واقعے پر کیا دکھ کا اظہار
کانگریس کی رکن پارلیمنٹ پرینکا گاندھی واڈرا نے بھی واقعے پر گہرے دکھ کا اظہار کرتے ہوئے کہا کہ کوچنگ سینٹر میں آتشزدگی کے باعث بڑی تعداد میں لوگوں، خصوصاً طلبہ، کی ہلاکت کی خبر انتہائی تکلیف دہ ہے۔ انہوں نے ریاستی حکومت سے زخمیوں کے بہتر علاج اور متاثرہ خاندانوں کو مناسب معاوضہ فراہم کرنے کا مطالبہ کیا، ساتھ ہی کانگریس کارکنوں سے متاثرین کی ہر ممکن مدد کی اپیل بھی کی۔
اروند کیجریوال کا اظہار افسوس
عام آدمی پارٹی کے قومی کنوینر اروند کیجریوال نے بھی حادثے پر افسوس ظاہر کرتے ہوئے کہا کہ بے گناہ افراد کی اچانک موت نہایت دردناک ہے اور ان کی ہمدردیاں سوگوار خاندانوں کے ساتھ ہیں۔ دوسری جانب عام آدمی پارٹی کے رہنما سنجے سنگھ نے اس واقعے کو لے کر مرکزی اور ریاستی حکومت پر شدید تنقید کی۔ انہوں نے کہا کہ لکھنؤ سے دہلی تک آگ لگنے کے واقعات میں مسلسل لوگ جانیں گنوا رہے ہیں، لیکن حکومت عوامی مسائل کے بجائے دیگر معاملات میں مصروف ہے۔ انہوں نے اس سانحے کی اعلیٰ سطحی تحقیقات اور ذمہ دار افراد کے خلاف سخت کارروائی کا مطالبہ کیا۔
دم گھٹنے سے زیادہ تر اموات، 15 ہلاکتوں کی تصدیق
کنگ جارج میڈیکل یونیورسٹی (کے جی ایم یو) کے میڈیکل سپرنٹنڈنٹ پریم راج سنگھ نے بتایا کہ اسپتال لائے گئے 15 افراد پہلے ہی دم توڑ چکے تھے اور ان کی لاشوں کو پوسٹ مارٹم کے لیے مردہ خانے بھیج دیا گیا ہے۔ انہوں نے کہا کہ زیادہ تر اموات دھواں بھر جانے کے باعث دم گھٹنے سے ہوئیں، جبکہ چند زخمیوں کا علاج جاری ہے، جن میں ایک نوجوان کی ریڑھ کی ہڈی اور ایک نوجوان خاتون کی ٹانگ میں چوٹ آئی ہے۔
وزیراعظم اور وزیراعلیٰ کی جانب سے امداد و تحقیقات کا اعلان
اس سے قبل وزیراعظم نریندر مودی نے بھی حادثے پر افسوس کا اظہار کرتے ہوئے وزیر اعظم قومی ریلیف فنڈ سے ہر جاں بحق شخص کے لواحقین کے لیے 2 لاکھ روپے اور ہر زخمی کے لیے 50 ہزار روپے کی مالی امداد کا اعلان کیا تھا۔ اتر پردیش کے وزیر اعلیٰ یوگی آدتیہ ناتھ نے جائے حادثہ کا دورہ کیا اور پولیس کے اعلیٰ حکام کو واقعے کی مکمل تحقیقات کرکے تفصیلی رپورٹ پیش کرنے کی ہدایت دی۔ انہوں نے اعلان کیا کہ ریاستی حکومت کی جانب سے ہر متوفی کے اہل خانہ کو 5 لاکھ روپے اور شدید زخمی افراد کو 50 ہزار روپے کی مالی امداد دی جائے گی، جبکہ قصورواروں کے خلاف سخت قانونی کارروائی کی جائے گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
