نئی دہلی: وزیراعظم نریندر مودی نے اتوار کو ویڈیو کانفرنسنگ کے ذریعے ’وکست وائبرنٹ ولیج پروگرام 2026‘ کے شرکا سے بات چیت کرتے ہوئے کہا کہ مرکز کا مقصد ہر نوجوان کو خود اعتمادی اور خود انحصاری کے ساتھ آگے بڑھنے کے لیے بااختیار بنانا ہے۔ شرکا سے خطاب کرتے ہوئے وزیر اعظم مودی نے تنہا سفر کی اہمیت پر بھی روشنی ڈالی۔ انہوں نے کہا کہ یہ ملک کو دریافت کرنے کے ساتھ ساتھ خود کو جاننے کا بھی موقع فراہم کرتا ہے۔ انہوں نے کہا ’’آج کل تنہا سفر ایک بڑا رجحان ہے، یہ خود کو دریافت کرتے ہوئے دنیا کو جاننے کا ایک طریقہ ہے۔ آپ بھی اکیلے نکلے تھے، لیکن ہندوستان بھر کا سفر ہر شخص کو آپ کا خاندان بنا گیا۔ آپ نے پورا سفر اکیلے طے کیا، جو ہندوستان کی بیٹیوں کے بڑھتے ہوئے خود اعتمادی کا ثبوت ہے۔ ہمارا مقصد یہ یقینی بنانا ہے کہ ہر نوجوان اور ہر بیٹی اعتماد اور خود اعتمادی کے ساتھ آگے بڑھے۔‘‘
سرحدی گاؤں کو ملک کے ’پہلے گاؤں‘ کے طور پر فروغ دینے کا وژن
وزیراعظم کے دفتر (پی ایم او) کے مطابق، ’وکست وائبرنٹ ولیج پروگرام‘ کو ’مائی بھارت‘ کے ذریعے نافذ کیا جا رہا ہے۔ اس پروگرام کا تصور وزیر اعظم کے اس وژن کو عملی شکل دینے کے لیے پیش کیا گیا ہے، جس کے تحت ہندوستان کے سرحدی گاؤں کو ملک کے ’پہلے گاؤں‘ کے طور پر دیکھا جائے اور انہیں ’وِکست بھارت‘ کے سفر میں فعال شراکت دار بنایا جائے۔ ’وِکست وائبرنٹ ولیج پروگرام 2026‘ کا انعقاد 4 جون سے 30 جون تک دو مرحلوں میں کیا گیا۔ اس کے تحت لداخ، ہماچل پردیش اور اتراکھنڈ کے 74 وائبرنٹ گاؤں کا احاطہ کیا گیا۔ بیان کے مطابق ملک کی تمام ریاستوں اور مرکز کے زیر انتظام علاقوں کی نمائندگی کرنے والے 400 سے زائد نوجوان شرکا کا انتخاب کیا گیا۔ ان کا انتخاب ملک گیر آن لائن کوئز مقابلے کے ذریعے کیا گیا، جس میں تین لاکھ سے زیادہ نوجوانوں نے حصہ لیا تھا۔
مقامی برادریوں کے ساتھ رہ کر مختلف سرگرمیوں میں شرکت
پروگرام کے تحت شرکا نے مقامی برادریوں کے ساتھ رہ کر مختلف سرگرمیوں میں حصہ لیا۔ ان میں صفائی مہم، سرکاری اسکیموں کے بارے میں بیداری مہم، یوا سمیلن، ثقافتی تبادلے کے پروگرام اور شجرکاری مہم شامل تھیں۔ اس کے علاوہ نوجوانوں نے ’منی ماڈل پنچایت‘ کی مشق میں حصہ لیا، مقامی کاریگروں سے ملاقات کی اور تزویراتی اہمیت کے حامل اداروں کا دورہ بھی کیا۔ بیان میں کہا گیا ہے کہ اس پروگرام نے شرکا کو ہندوستان کے سرحدی علاقوں کے سماجی و اقتصادی منظرنامے، ثقافتی ورثے اور ترقیاتی خواہشات کو براہ راست سمجھنے کا موقع فراہم کیا۔ پروگرام کے ذریعے کمیونٹی کی شراکت داری، قومی اتحاد اور سرحدی گاؤں کی تزویراتی اہمیت کے بارے میں گہری سمجھ کو بھی فروغ ملا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
