اعظم خان اور عبداللہ اعظم۔ (فائل فوٹو)
رام پور کی ایم پی-ایم ایل اے سیشن کورٹ نے سماج وادی پارٹی کے سینئر لیڈر اعظم خان اور ان کے بیٹے عبداللہ اعظم خان کو دو پین کارڈ معاملے میں بڑا جھٹکا دیتے ہوئے ان کی سزا سات سال سے بڑھا کر 10 سال کر دی ہے۔ عدالت نے یہ فیصلہ استغاثہ کی اس دلیل کو قبول کرتے ہوئے سنایا کہ دونوں پہلے بھی جعلسازی سے متعلق مقدمات میں قصوروار قرار دیے جا چکے ہیں، اس لیے یہ معاملہ عادی مجرمانہ طرز عمل کے زمرے میں آتا ہے۔ یہ معاملہ مختلف تاریخ پیدائش کی بنیاد پر دو الگ الگ پین کارڈ بنوانے سے متعلق ہے۔ الزام تھا کہ اعظم خان اور عبداللہ اعظم نے سرکاری دستاویزات میں متضاد تاریخ پیدائش ظاہر کر کے دو پین کارڈ حاصل کیے اور ان دستاویزات کو انتخابی حلف ناموں سمیت دیگر سرکاری امور میں استعمال کیا۔ عدالت میں پیش کیے گئے شواہد کے مطابق انکم ٹیکس محکمہ کے ریکارڈ، انتخابی دستاویزات اور دیگر سرکاری کاغذات میں تضاد پایا گیا تھا۔
واضح رہے کہ نومبر 2025 میں خصوصی ایم پی-ایم ایل اے کورٹ نے دونوں کو اس مقدمے میں سات، سات سال قید اور 50، 50 ہزار روپے جرمانے کی سزا سنائی تھی۔ بعد ازاں اعظم خان اور عبداللہ اعظم نے اس فیصلے کے خلاف اپیل دائر کی، جبکہ بی جے پی کے رکن اسمبلی آکاش سکسینہ نے سزا میں اضافے کا مطالبہ کرتے ہوئے سیشن کورٹ سے رجوع کیا تھا۔ سماعت کے دوران استغاثہ نے عدالت کو بتایا کہ دونوں ملزمان پہلے ہی فرضی پیدائش سرٹیفکیٹ معاملے میں سزا یافتہ ہیں، اس لیے موجودہ مقدمہ ایک سنگین اور مسلسل جرم کی نوعیت اختیار کر چکا ہے۔ استغاثہ نے مؤقف اختیار کیا کہ اگر سزا میں اضافہ نہ کیا گیا تو اس سے غلط پیغام جائے گا۔ عدالت نے دلائل سننے کے بعد سزا بڑھانے کی درخواست منظور کر لی۔
یہ مقدمہ سنہ 2019 میں درج کیا گیا تھا اور اس کی تفتیش کے دوران کئی اہم دستاویزات عدالت میں پیش کی گئی تھیں۔ عبداللہ اعظم اس سے قبل تاریخِ پیدائش کے تنازعے میں اپنی اسمبلی رکنیت بھی کھو چکے ہیں۔ الہ آباد ہائی کورٹ نے ان کی اسمبلی رکنیت منسوخ کر دی تھی، جس کے بعد ان کی سیاسی مشکلات میں مزید اضافہ ہوا۔ ادھر اعظم خان کے خلاف پہلے سے کئی مقدمات زیرِ سماعت ہیں۔ حال ہی میں انہیں 2019 کے انتخابی مہم کے دوران سرکاری افسران کے خلاف قابل اعتراض بیان دینے کے معاملے میں بھی دو سال قید کی سزا سنائی گئی تھی۔ تازہ عدالتی فیصلے کے بعد ریاست کی سیاست میں ایک بار پھر ہلچل تیز ہو گئی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
