ڈھاکہ: بھارت کے دارالحکومت دہلی میں لال قلعے کے قریب ہونے والے خوفناک دھماکے پر بنگلہ دیش کی جماعت عوامی لیگ کی طلبہ شاخ بنگلہ دیش اسٹوڈنٹس لیگ نے شدید ردعمل ظاہر کیا ہے۔ تنظیم نے اسے پاکستان کی پشت پناہی یافتہ انتہاپسند گروپوں کی کارستانی قرار دیتے ہوئے اسے “خطے کو غیر مستحکم کرنے والی کارروائی” قرار دیا۔ بنگلہ دیش اسٹوڈنٹس لیگ نے اپنے ایک باضابطہ بیان میں کہا کہ “تاریخی لال قلعے کے قریب ہونے والا یہ گھناؤنا حملہ اس حقیقت کی ایک اور یاد دہانی ہے کہ پاکستان کے دیرینہ دہشت گرد ڈھانچے کو نظریاتی اور عسکری مدد حاصل کرنے والے گروہ بدستور خطے کے امن کو تہ و بالا کرنے میں سرگرم ہیں”۔
بیان میں مزید کہا گیا کہ “دہائیوں سے پاکستان کی فوجی و خفیہ اسٹیبلشمنٹ اپنے ہمسایہ ممالک کے خلاف دباؤ ڈالنے کے لیے سرحد پار دہشت گرد تنظیموں کو مالی مدد، تربیت اور پناہ فراہم کرتی رہی ہے۔ ان سرگرمیوں نے پورے برصغیر میں امن و استحکام کو نقصان پہنچایا ہے اور عام شہریوں کی جانوں کو خطرے میں ڈال دیا ہے”۔
تنظیم کے مطابق، دہلی دھماکے کا انداز ظاہر کرتا ہے کہ یہ ایک منظم اور سوچی سمجھی سازش تھی، جس کا مقصد جمہوری ڈھانچے کو کمزور کرنا، سماجی ہم آہنگی کو درہم برہم کرنا اور خطے میں غیر یقینی صورتحال پیدا کرنا تھا۔ بیان میں اسے “بین الاقوامی قانون کی خلاف ورزی اور انسانی اقدار کے ساتھ کھلی بدعہدی” قرار دیا گیا۔
اسی دوران ترکیہ نے بھی دہلی دھماکے کی سخت مذمت کرتے ہوئے افسوس کا اظہار کیا۔ ترکیہ کی وزارتِ خارجہ نے ایک بیان میں کہا کہ “ہم 10 نومبر کو دہلی میں ہونے والے دھماکے سے جانی نقصان پر گہرے دکھ میں ہیں۔ ہم متاثرہ خاندانوں اور بھارت کے عوام سے دلی ہمدردی کا اظہار کرتے ہیں اور زخمیوں کی جلد صحتیابی کی دعا کرتے ہیں۔ ترکیہ دہشت گردی کی تمام صورتوں کے خلاف اپنے اصولی مؤقف اور عالمی تعاون کے عزم کو دہراتا ہے”۔ دوسری جانب افغانستان کی وزارتِ خارجہ نے بھی دہلی دھماکے پر افسوس کا اظہار کرتے ہوئے کہا کہ “اسلامی امارتِ افغانستان متاثرہ خاندانوں، بھارتی حکومت اور عوام سے تعزیت کا اظہار کرتی ہے اور زخمیوں کے لیے جلد صحتیابی کی دعا کرتی ہے”۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
