جموں و کشمیر کی سابق وزیر اعلیٰ اور پی ڈی پی کی صدر محبوبہ مفتی نے دعویٰ کیا کہ پی ڈی پی کے بانی مفتی محمد سعید نے 2015 میں جموں و کشمیر میں حکومت سازی کے لیے وزیر اعظم نریندر مودی کے سامنے پیشگی شرط رکھی تھی اور یہ یقین دہانی مانگی تھی کہ مرکز آئین پر عمل کرے گا۔اورآرٹیکل 370 کو منسوخ نہیں کیا جائے گا۔پیپلز ڈیموکریٹک پارٹی (پی ڈی پی) کے 24 ویں یوم تاسیس کے موقع پر ایک اجتماع سے خطاب کرتے ہوئے محبوبہ مفتی نے کہا کہ ان کے والد مفتی سعید اقتدار کے بھوکے نہیں تھے ۔وہ جموں و کشمیر کو اس کے مسائل اور مشکلات سے نجات دلانا چاہتے تھے۔
انہوں نے کہا کہ جب مفتی صاحب کے پاس (2014 کے اسمبلی انتخابات میں) 28 سیٹیں تھیں، تو انہوں نے پی ایم مودی سے ملاقات کی اور حکومت بنانے کے لیے اپنی شرائط کی فہرست دی۔ انہوں نے بی جے پی حکومت (مرکز میں) سے یہ یقین دہانی کرائی کہ (آرٹیکل) 370 کو نہیں چھیڑا جائے گا۔ مفتی صاحب نے ان کے ہاتھ باندھ دیے۔ وہ اقتدار کے بعد نہیں تھے، ورنہ انہیں (جموں و کشمیر میں) مخلوط حکومت بنانے میں تین ماہ نہیں لگتے۔
محبوبہ مفتی نے الزام لگایا کہ بھارتیہ جنتا پارٹی (بی جے پی) اپنے وعدوں سے پیچھے ہٹ گئی۔ انہوں نے کہا، ‘بی جے پی چاہتی ہے کہ ہم ہار مان لیں۔ ہم ایسا نہیں کریں گے۔اگر ہم سب – ہندو، مسلمان، سکھ، گجر، پہاڑی – متحد ہو جائیں تو ہم بی جے پی کو شکست یقینی طور پر دیں گے۔ انہوں نے کہا، ’’صرف 16 ایم ایل اے ہونے کے باوجود [2002 کے اسمبلی انتخابات میں مفتی صاحب نے کانگریس (جس کی 20 سیٹیں تھیں) سے کہا تھا کہ وہ صرف اسی صورت میں حکومت بنائیں گے جب پاکستان اور علیحدگی پسندوں سے بات چیت کی جائے گی۔ محبوبہ مفتی نے کہا کہ ان کی والد لوگوں کو گمراہ کرنے میں یقین نہیں رکھتے تھے ،البتہ وہ اس چیز میں پختہ یقین رکھتے تھے کہ جموں و کشمیر کا مستقبل ہندوستان کے ساتھ ہے۔ انہوں نے کہا کہ آپ نے کشمیر میں کیا حاصل کیا ہے، جواہر لعل نہرو لال چوک آئے اور ہزاروں کشمیریوں کی موجودگی میں قومی پرچم لہرایا، آج آپ نے ترنگا لہرایا اور وہاں کوئی کشمیری نہیں، صرف سیکورٹی اہلکار ہیں۔
محبوبہ مفتی نے الزام لگایا کہ بی جے پی پورے ملک کو منی پور میں تبدیل کرنے کی کوشش کر رہی ہے اور اپوزیشن جماعتوں سے اپیل ہے کی کہ وہ ان کوششوں کا مقابلہ کرنے کے لیے متحد رہیں۔انہوں نے کہا، ‘منی پور صرف ایک ٹریلر ہے، پوری فلم کا آغاز ابھی باقی ہے۔ بی جے پی پورے ملک کو منی پور بنانا چاہتی ہے۔ اپوزیشن سے میری اپیل ہے کہ اگر وہ ہندوستان کو بچانا چاہتے ہیں تو متحد رہیں۔ نمبروں کے کھیل میں نہ پڑیں۔
بھارت ایکسپریس۔
