بلقیس بانو معاملے میں سپریم کورٹ میں ایک مجرم کی طرف سے عرضی داخل کی گئی ہے۔
بلقیس بانو کیس کے مجرموں میں سے ایک ان دنوں وکالت کا کام کررہا ہے۔ اس پر سپریم کورٹ نے بھی حیرت کا اظہار کیا ہے۔ سپریم کورٹ کا کہنا ہے کہ اس نے بلقیس بانو کیس کے مجرموں کی رہائی پر غور کرنے کی ذمہ داری گجرات حکومت کو دی تھی، لیکن اس کا یہ مطلب نہیں کہ رہائی کے بعد کوئی اسے چیلنج نہیں کر سکتا۔ عدالت نے یہ تبصرہ اس وقت کیا جب گجرات حکومت نے کہا کہ اس نے سپریم کورٹ کے حکم کے بعد ہی رہائی پر غور کیا ہے اور مجرموں کو رہا کرنے کا فیصلہ کرنے سے پہلے تمام قانونی عمل کو مکمل کیا ہے۔سال 2002کے گجرات فسادات کے دوران بلقیس بانو کے ساتھ اجتماعی عصمت دری اور اس کے خاندان کے افراد کے قتل کے 11 مجرموں کو گزشتہ سال 15 اگست کو بری کر دیا گیا تھا۔ عمر قید کی سزا پانے والے ان افراد نے تقریباً 15 سال جیل میں گزارے۔ ان کی رہائی کا فیصلہ کرتے ہوئے 1992 کے جیل قوانین کا استعمال کیا گیا کیونکہ یہ حکم سپریم کورٹ نے دیا تھا۔ ان قوانین میں 14 سال قید کے بعد رہائی پر غور کرنے کا بندوبست ہے۔
ملزمان کی رہائی کے خلاف درخواست دائر
بلقیس بانو کے علاوہ سی پی ایم لیڈر سبھاشنی علی، سماجی کارکن روپریکھا ورما اور ٹی ایم سی لیڈر مہوا موئترا سمیت کئی لوگوں نے ان لوگوں کی رہائی کے خلاف سپریم کورٹ میں عرضی داخل کی ہے۔ اس معاملے میں درخواست گزاروں نے جسٹس بی وی ناگرتنا اور اجول بھوئیاں کی بنچ کے سامنے اپنے دلائل پیش کیے ہیں۔ آج (جمعرات، 24 اگست) ایڈیشنل سالیسٹر جنرل ایس وی راجو نے بھی گجرات حکومت کی جانب سے اپنا رخ پیش کیا۔ اس کے علاوہ 11 میں سے 2 مجرموں نے بھی درخواستوں کی مخالفت کی۔ کیس کی اگلی سماعت 31 اگست کو دوپہر 2 بجے ہوگی۔
نچلی عدالت میں پریکٹس کرنے والا مجرم
بلقیس بانو کیس کے مجرم رادھے شیام کی طرف سے پیش ہونے والے ایڈوکیٹ رشی ملہوترا نے ججوں کو بتایا کہ ان کے موکل کو جیل میں اچھے برتاؤ کی بنیاد پر رہا کیا گیا ہے۔ وہ 14 سال سے زیادہ جیل میں گزار چکے ہیں۔ اب وہ نچلی عدالت میں وکیل بن چکے ہیں۔ وہ موٹر حادثے کے دعووں کے معاملات میں وکالت کرتا ہے۔ ملہوترا کہنا چاہتے تھے کہ رہائی کے 1 سال بعد کسی کو دوبارہ جیل میں ڈالنا درست نہیں ہوگا، لیکن ججوں نے اس بات پر حیرت کا اظہار کیا کہ ایک گھناؤنے جرم میں سزا یافتہ شخص وکیل کا کام کیسے کرسکتا ہے۔
‘رہائی کے بعد جرم ختم نہیں ہوتا’
جسٹس بھویاں نے سوال کیا کہ کیا سزا یافتہ شخص وکالت کر سکتا ہے؟ اس پر وکیل نے سزا کی تکمیل کا حوالہ دیا، لیکن جسٹس ناگارتنا نے اسے روکتے ہوئے کہا کہ رہائی سے متعلق انتظامی حکم کسی شخص کو سزا کی تکمیل سے پہلے جیل سے باہر لا سکتا ہے، لیکن اس کے جرم کو ختم نہیں کر سکتا۔
رہائی کے بعد جیل بھیجنا درست نہیں
اس معاملے میں ایک اور مجرم وپن جوشی کی طرف سے پیش ہونے والی سینئر ایڈوکیٹ سونیا ماتھر نے کہا کہ اگر بلقیس کے مجرموں کی رہائی میں کوئی خامی ہے تو ریاستی حکومت اس کا جواب دے گی، لیکن کچھ تکنیکی خرابی کی وجہ سےرہائی کے بعد کسی کو واپس جیل بھیجنا درست نہیں ہے۔ قانون ہر ایک کو معاشرے میں اصلاح اور دوبارہ شامل ہونے کا موقع فراہم کرتا ہے۔ یہ نہیں کہا جا سکتا کہ اگر مجرموں کو قانونی طور پر رہا کیا گیا ہے تو بلقیس کے کسی حق کی خلاف ورزی ہوئی ہے۔
بھارت ایکسپریس۔
