Bittu Bajrangi sent to Police Custody: پولیس حراست میں بھیجا گیا ’گئورکشک‘ بٹو بجرنگی، اپنوں نے بھی بنالی دوری، کیا ہے وی ایچ پی کی مجبوری؟

Nuh Violence: ہریانہ میں نوح کی ایک عدالت نے ’گئورکشک ‘ بٹو بجرنگی کو ضلع میں ہوئے تشدد کے سلسلے میں بدھ کے روز ایک دن کی پولیس حراست میں بھیج دیا ہے۔ پولیس نے کہا ہے کہ اس کے ساتھیوں کو جلد ہی گرفتارکرلیا جائے گا۔ 31 جنوری کو ضلع میں تشدد بھڑک گئی تھی۔ پولیس کے مطابق، اسسٹنٹ سپرنٹنڈنٹ آف پولیس (اے ایس پی) اوشا کنڈو کی شکایت پر نوح کے صدر تھانے میں بٹو بجرنگی عرف راجکمار کے خلاف نئی ایف آئی آر درج کی گئی تھی، جس کے بعد اسے منگل کو فریدآباد سے گرفتار کرلیا گیا۔ الزام ہے کہ بٹو بجرنگی نے خواتین پولیس اہلکاروں سے بھی بدتمیزی کی تھی۔

بٹو بجرنگی پر فساد، مسلح ڈکیتی اور مجرمانہ دھمکی سمیت کئی سنگین الزامات لگے ہیں۔ وشو ہندو پریشد (وی ایچ پی) نے اب اس سے کنارہ کشی اختیارکرلی ہے۔ ٹوئٹ کے ذریعہ وی ایچ پی نے کہا ہے کہ بٹو بجرنگی کا بجرنگ دل سے کوئی ناطہ نہیں رہا ہے۔ وہ کبھی بھی بجرنگ دل کا رکن نہیں رہا ہے۔ کہا جا رہا تھا کہ بٹو بجرنگی گئورکشک گروپ، فریدآباد گئورکشا بجرنگ فورس کا سربراہ ہے۔ یہ گروپ سوشل میڈیا پر خود کو ’’پشوبچاؤ سیوا“ (جانوروں کو بچانے والی خدمت) کے طور پر خود کو پیش کرتا ہے۔ اس کے سوشل میڈیا پیج پر مذہبی جذبات سے متعلق کئی تقاریراور پوسٹ موجود ہیں، جس میں ’’لوجہاد“ پر کئی پوسٹ ہیں۔

ایف آئی آر کے مطابق، بجرنگی اوراس کے کچھ ساتھیوں نے تلوار اور تریشول لے کر نلہڑ مندرجاتے وقت روکے جانے پر اے ایس پی کنڈو کی قیادت والی پولیس ٹیم کے ساتھ مبینہ طور پر بدتمیزی کی اورانہیں دھمکایا تھا۔ بٹو بجرنگی کی پہچان سوشل میڈیا پوسٹ کے ذریعہ ہوئی۔ فریدآباد پولیس نے فساد سے متعلق ایک دوسرے معاملے میں بٹو بجرنگی کو گرفتار کیا تھا۔ اس کی گرفتاری تشدد کے دو دن بعد کی گئی تھی، لیکن اس کے جانچ میں شامل ہونے کے بعد اسے ضمانت پر رہا کردیا گیا تھا۔

وشوہندو پریشد (وی ایچ پی) نے بٹو بجرنگی سے کسی طرح کا تعلق ہونے سے انکار کردیا ہے۔ ساتھ ہی دعویٰ کیا کہ وہ کبھی بھی بجرنگ دل سے نہیں جڑا تھا۔ وی ایچ پی نے ایک بیان میں کہا، ’’بجرنگ دل کا کارکن بتائے جا رہے راجکمار عرف بٹو بجرنگی کا بجرنگ دل سے کبھی کوئی ناطہ نہیں رہا ہے۔ وشو ہندو پریشد بھی مبینہ طور پر اس کی طرف سے جاری کئے گئے ویڈیو کو صحیح نہیں مانتی۔“

قابل ذکر ہے کہ بجرنگ دل، وی ایچ پی کی یوتھ ونگ ہے۔ ایس ایس پی اوشا کنڈو نے اپنی شکایت میں کہا، ’’میں نلہڑ مندر سے 300 میٹر دور اپنی ٹیم کے ساتھ ڈیوٹی پر تھی۔ ہم نے تقریباً 20 لوگوں کی بھیڑکو تلواریں اورتریشول لے کرنلہڑ مندر کی طرف بڑھتے ہوئے دیکھا۔ لاء اینڈ آرڈر بنائے رکھنے کے لئے میری ٹیم نے ان کے ہتھیارچھینے اور ضبط کرلئے۔“ اوشا کنڈو نے اپنی شکایت میں کہا، ’’اس کے بعد انہوں نے پولیس کے خلاف نعرے بازی شروع کردی اور ٹیم کے ساتھ ہاتھا پائی کی۔ ہم نے ان کے ہتھیار اپنی گاڑیوں میں رکھے، لیکن وہ آگے بڑھے اورگاڑیوں کے سامنے بیٹھ گئے۔“