سِنگور: وزیر اعظم نریندر مودی نے اتوار کو مغربی بنگال کے ہوگلی ضلع کے سِنگور میں منعقدہ ایک بڑے عوامی پروگرام سے خطاب کرتے ہوئے کہا کہ ریاست کے لیے گزشتہ 24 گھنٹے غیر معمولی اور تاریخی رہے ہیں۔ انہوں نے دعویٰ کیا کہ شاید پچھلے 100 برسوں میں بھی اتنے کم وقت میں ترقیاتی کاموں کی ایسی مثال نہیں ملتی۔ وزیر اعظم نے کہا کہ مرکزی حکومت ”وکست بھارت“ کے ہدف کے تحت مشرقی بھارت، بالخصوص مغربی بنگال کی ترقی کو ترجیح دے رہی ہے۔ اس موقع پر وزیر اعظم مودی نے ہوگلی ضلع کے بالاگڑھ میں ایکسٹینڈڈ پورٹ گیٹ سسٹم کا سنگ بنیاد رکھا، جس میں ان لینڈ واٹر ٹرانسپورٹ ٹرمینل اور روڈ اوور برج شامل ہیں۔ اس کے علاوہ سِنگور میں 830 کروڑ روپے سے زائد لاگت کی مختلف ترقیاتی منصوبوں کا افتتاح، سنگ بنیاد اور ریل خدمات کا آغاز بھی کیا گیا۔ وزیر اعظم نے ان منصوبوں کو ریاست کے اقتصادی مستقبل کے لیے سنگ میل قرار دیا۔
اپنے خطاب میں وزیر اعظم نے کہا کہ وہ ایک دن پہلے مالدہ میں تھے اور آج ہوگلی کے عوام کے درمیان آنا ان کے لیے اعزاز کی بات ہے۔ انہوں نے کہا کہ مشرقی بھارت کی ترقی کے بغیر ملک کی مجموعی ترقی ممکن نہیں، اسی سوچ کے ساتھ مرکزی حکومت مسلسل کام کر رہی ہے۔ گزشتہ دو دنوں میں شروع کیے گئے منصوبے اسی عزم کو مزید مضبوط کرتے ہیں۔ وزیر اعظم نے بتایا کہ مغربی بنگال سے ملک کی پہلی وندے بھارت سلیپر ٹرین کا آغاز کیا گیا ہے، جبکہ ریاست کو تقریباً نصف درجن نئی امرت بھارت ایکسپریس ٹرینیں بھی ملی ہیں۔ اتوار کے روز مزید تین امرت بھارت ایکسپریس ٹرینوں کو ہری جھنڈی دکھائی گئی۔ انہوں نے کہا کہ ان میں سے ایک ٹرین ان کے پارلیمانی حلقے کاشی کو بنگال سے مزید مضبوط ریل رابطہ فراہم کرے گی، جبکہ دہلی اور تمل ناڈو کے لیے بھی نئی ریل خدمات شروع کی گئی ہیں۔
وزیر اعظم مودی نے کہا کہ گزشتہ 24 گھنٹوں میں مغربی بنگال کی ریل کنیکٹیویٹی میں جو پیش رفت ہوئی ہے، وہ بے مثال ہے۔ ان کے مطابق شاید گزشتہ ایک صدی میں اتنے مختصر وقت میں اتنا بڑا کام کبھی نہیں ہوا۔ انہوں نے کہا کہ ریل نیٹ ورک کی مضبوطی سے صنعت، تجارت اور روزگار کے نئے مواقع پیدا ہوں گے۔ انہوں نے شیاما پرساد مکھرجی پورٹ کی توسیع کا ذکر کرتے ہوئے کہا کہ گزشتہ 11 برسوں میں اس بندرگاہ کی صلاحیت بڑھانے کے لیے بڑے پیمانے پر سرمایہ کاری کی گئی ہے۔ ساگر مالا اسکیم کے تحت بندرگاہ کی سڑکوں کے ذریعے بہتر کنیکٹیویٹی قائم کی گئی، جس کے مثبت نتائج سامنے آ رہے ہیں۔ گزشتہ برس کولکاتا پورٹ نے کارگو ہینڈلنگ میں نئے ریکارڈ قائم کیے۔
وزیر اعظم نے کہا کہ بالاگڑھ میں بننے والا ایکسٹینڈڈ پورٹ گیٹ سسٹم ہوگلی اور آس پاس کے علاقوں کے لیے نئے مواقع پیدا کرے گا، جس سے کولکاتا شہر میں ٹریفک اور لاجسٹک دباؤ کم ہوگا۔ گنگا ندی پر بنائے گئے آبی راستے سے کارگو نقل و حمل میں اضافہ ہوگا اور ملٹی ماڈل کنیکٹیویٹی کو فروغ ملے گا۔ انہوں نے ہائبرڈ الیکٹرک کشتیوں کا ذکر کرتے ہوئے کہا کہ یہ دریائی اور گرین ٹرانسپورٹ کو مضبوط کریں گی، آلودگی کم کریں گی اور سیاحتی سرگرمیوں کو بڑھاوا دیں گی۔ وزیر اعظم نے کہا کہ مرکز حکومت دریائی آبی راستوں کی ترقی میں مغربی بنگال کو مکمل تعاون فراہم کر رہی ہے، جس سے کسانوں اور ماہی گیروں دونوں کو فائدہ پہنچے گا۔ انہوں نے تمام منصوبوں کی کامیابی کے لیے عوام کو مبارک باد پیش کی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
