شہریت ترمیمی قانون مارچ کے پہلے ہفتے سے نافذ ہو جائے گا۔ حکومتی ذرائع کے مطابق سی اے اے قوانین کو اگلے ماہ کے پہلے ہفتے میں لاگو کیا جا سکتا ہے۔ ذرائع کے مطابق سی اے اے کے قوانین مارچ کے پہلے ہفتے یا اس کے بعد کسی بھی دن لاگو ہوں گے، ان قوانین کے نفاذ کے ساتھ ہی سی اے اے قانون نافذ ہو جائے گا۔حکومت کے اعلیٰ ذرائع نے بتایا ہے کہ سی اے اے کو لاگو کرنے کے لیے ایک مناسب پورٹل تیار کیا گیا ہے۔عہدیداروں نے کہا کہ قواعد تیار ہیں اور آن لائن پورٹل بھی تیار ہے، کیونکہ پوری کارروائی آن لائن ہوگی۔ درخواست دہندگان کو اس سال کی نشاندہی کرنا ہوگی جس میں وہ سفری دستاویزات کے بغیر ہندوستان میں داخل ہوئے تھے۔ درخواست دہندگان سے کوئی دستاویزات نہیں مانگی جائیں گی۔
سی اے اے قانون یعنی شہریت ترمیمی ایکٹ 2019 تین پڑوسی ممالک پاکستان، افغانستان اور بنگلہ دیش کی ان اقلیتوں کو ہندوستانی شہریت دینے کا راستہ کھولتا ہے، جنہوں نے طویل عرصے سے ہندوستان میں پناہ لے رکھی ہے۔اس قانون میں کسی بھی ہندوستانی کی شہریت چھیننے کا کوئی بندوبست نہیں ہے، خواہ اس کا مذہب کوئی بھی ہو۔ فائدہ اٹھانے والوں کو ہندوستانی شہریت فراہم کرنے کا عمل جلد ہی شروع ہو جائے گا۔
مرکزی وزیرداخلہ امت شاہ نے کہا، “سی اے اے ملک کا قانون ہے اور اس کا نوٹیفکیشن ضرور جاری کیا جائے گا۔ اسے انتخابات سے پہلے جاری کیا جائے گا۔ اس بارے میں کسی کو کوئی الجھن نہیں ہونی چاہئے۔انہوں نے کہا کہ پڑوسی ممالک کی مظلوم اقلیتوں کو ہندوستانی شہریت دینا بھی کانگریس قیادت کا وعدہ ہے۔وزیر داخلہ نے کہا کہ جب تقسیم ہوئی تو ہندو، بدھ، عیسائی – سبھی وہاں مذہبی ظلم و ستم کا سامنا کرنے کے بعد ہندوستان آنا چاہتے تھے۔ انہوں نے (کانگریس لیڈروں) نے ان لوگوں کو شہریت دینے کا وعدہ کیا تھا اور کہا تھا کہ آپ سب کا خیر مقدم ہے۔ لیکن (کانگریس) قائدین اپنے بیان سے مکر گئے۔
وزیر داخلہ نے کہا کہ وہ یہ واضح کرنا چاہتے ہیں کہ سی اے اے کسی کی شہریت چھیننے والا قانون نہیں ہے۔ انہوں نے کہا کہ ہمارے مسلمان بھائیوں کو سی اے اے کے معاملے پر اکسایا جا رہا ہے۔ سی اے اے کے ذریعے کسی کی شہریت نہیں چھینی جا سکتی، کیونکہ اس قانون میں ایسا کوئی بندوبست نہیں ہے۔ سی اے اے ان لوگوں کو شہریت دینے کے لیے بنایا گیا ہے جو مذہبی ظلم و ستم کا سامنا کرنے کے بعد بنگلہ دیش اور پاکستان سے آئے ہیں۔ کسی کو اس قانون کی مخالفت نہیں کرنی چاہیے۔
دسمبر 2019 میں پارلیمنٹ کے ذریعہ سی اے اے کی منظوری اور صدر سے منظوری ملنے کے بعد، ملک کے کچھ حصوں میں بڑے پیمانے پر مظاہرے ہوئے۔ متنازعہ سی اے اے کو نافذ کرنے کا وعدہ مغربی بنگال میں گزشتہ اسمبلی انتخابات اور لوک سبھا انتخابات میں بی جے پی کا ایک بڑا انتخابی مسئلہ تھا۔سی اے اے کے تحت، مرکز کی مودی حکومت بنگلہ دیش، پاکستان اور افغانستان سے ستائے ہوئے غیر مسلم تارکین وطن – ہندو، سکھ، جین، بدھ، پارسی اور عیسائی – جو 31 دسمبر 2014 تک ہندوستان آئے تھے، کو ہندوستانی شہریت فراہم کرنا چاہتی ہے۔
بھارت ایکسپریس۔
