India hands over 20 broad gauge to Bangladesh: نئی دہلی: ہندوستان نے منگل کو 20 براڈ گیج لوکوموٹیوز بنگلہ دیش کے حوالے کردیا ہے۔ اکتوبر 2019 میں وزیر اعظم شیخ حسینہ کے یہاں ان کے دورے کے دوران کیے گئے وعدے کواس طرح سے پورا کردیا گیا ہے۔ ان انجنوں کا استعمال مسافر اور مال بردار ٹرینوں دونوں کے لیے کیا جا سکتا ہے۔ لوکوز کو بنگلہ دیش کے حوالے کرتے ہوئے وزیر ریلوے اشونی ویشنو نے کہا کہ بنگلہ دیش کے ساتھ ہندوستان کا تعلق تہذیبی، ثقافتی، سماجی اور اقتصادی ہے۔ دونوں ممالک کے وزرائے اعظم سماجی، اقتصادی اور سیاسی شعبوں میں دوطرفہ تعلقات کو بہتر بنانے کے لیے فعال کردار ادا کر رہے ہیں۔ ہندوستانی ریلوے سرحد کے آر پار ریل رابطے کو بہتر اور مضبوط بنانے اور دونوں ممالک کے درمیان تجارت کو بہتر بنانے میں بھی اہم کردار ادا کر رہی ہے۔ فی الحال، پانچ براڈ گیج کنیکٹیوٹی کام کر رہے ہیں، یعنی گیڈا-درسانہ، بیناپول-پیٹراپول، سنگھ آباد-روہن پور، رادھیکاپور-بیرول اور ہلدی باڑی-چلاہاٹی۔ وزیرموصوف نے کہا کہ دو مزید کراس بارڈر ریل کنیکٹیوٹی، اکھوڑہ-اگرتلہ اور مہیشاسن-شہباز پور پر کام اچھی طرح سے آگے بڑھ رہا ہے اور جلد ہی مکمل اور شروع ہونے کا امکان ہے، وزیر اشونی نے کہا کہ بنگلہ دیش ریلوے کی ضروریات کو پورا کرنے کے لیے انجنوں میں مناسب ترمیم کی گئی ہے۔
واضح رہے کہ نریندر مودی حکومت نے بنگلہ دیش کو 20 براڈ گیج انجن تحفے میں دے کر اپنا وعدہ پورا کیاہے۔ یہ عہد وزیر اعظم شیخ حسینہ کے 2019 میں ہندوستان کے دورے کے دوران کیا گیا تھا۔ لوکوموٹیوز کو عملی طور پر دہلی سے جھنڈی دکھا کر بنگال کی سرحد کے راستے بنگلہ دیش میں داخل کیا گیا ہے۔ ہندوستانی ریلوے نے بنگلہ دیش ریلوے کی مخصوص ضروریات کو پورا کرنے کے لیے لوکوموٹیوز میں تبدیلیاں کی ہیں۔ ان انجنوں کے حوالے سے بنگلہ دیش میں مسافروں اور مال بردار ٹرینوں کے بڑھتے ہوئے حجم کو سنبھالنے میں مدد ملے گی۔ دونوں ممالک تجارت کو بہتر بنانے کے لیے ریل رابطے کی اہمیت کو تسلیم کرتے ہیں اور سرحد پار روابط کو مضبوط بنانے کے لیے سرگرمی سے کام کر رہے ہیں۔
اس وقت ہندوستان اور بنگلہ دیش کے درمیان چلنے والی مسافر ٹرینوں کے تین جوڑے کو حوصلہ افزا جواب ملا ہے۔ ان میں کولکتہ (چت پور) – ڈھاکا میتری ایکسپریس، کولکاتا-کھلنا بندھن ایکسپریس، اور نیو جلپائی گوڑی-ڈھاکا میتالی ایکسپریس شامل ہیں۔ دونوں ممالک کی حکومتیں مسافروں اور کارگو ٹریفک کے تبادلے کے مزید مواقع تلاش کر رہی ہیں، جس کا مقصد تجارت اور رابطے کو بڑھانا ہے۔
