ہریانہ اسمبلی انتخابات سے پہلے ہریانہ میں کانگریس کا کنبہ بڑھنے والا ہے۔ ہندوستانی پہلوان ونیش پھوگاٹ اور بجرنگ پونیا جمعہ (6 ستمبر) کو دوپہر دو بجے تک کانگریس میں شامل ہو سکتے ہیں۔ اس سلسلے میں نئی دہلی میں کانگریس کے دفتر میں ایک پروگرام کا انعقاد کیا جارہا ہے۔اس خبر کی تصدیق خود بجرنگ پونیا نے کیا ہے۔انہوں نے کہا کہ میں اور ونیش کانگریس میں شامل ہوں گے۔
کانگریس ذرائع کے مطابق پارٹی ونیش پھوگاٹ کو پارٹی ٹکٹ دے سکتی ہے، جب کہ بجرنگ پونیا ہریانہ اسمبلی انتخابات کے لیے پارٹی کی مہم کی ذمہ داری سنبھال سکتے ہیں۔ اے آئی سی سی کی طرف سے جاری پیغام میں کہا گیا ہے کہ اس پروگرام میں کانگریس پارٹی کی بڑی شخصیات شرکت کریں گی۔
ونیش پھوگاٹ کو مل سکتی ہے جولانہ سیٹ؟
کانگریس تنظیم کے جنرل سکریٹری کے سی وینوگوپال اس رکنیت پروگرام میں شرکت کریں گے۔ ونیش پھوگاٹ اسمبلی الیکشن لڑیں گی۔ راہل گاندھی نے جند کے جولانہ سے ان کاٹکٹ کنفرم کیا ہے۔ امکان ہے کہ وہ کانگریس پارٹی میں شامل ہوتے ہی اس کا اعلان کریں گے۔پارٹی ذرائع کا کہنا ہے کہ ونیش 11 ستمبر کو کانگریس کے ٹکٹ پر جولانہ اسمبلی سیٹ سے پرچہ نامزدگی داخل کریں گی، جبکہ پہلوان بجرنگ پونیا کو ان کی مہم کی ذمہ داری دی گئی ہے، وہ الیکشن نہیں لڑیں گے۔
دو دن پہلے راہل گاندھی سے ملاقات کی تھی
گزشتہ بدھ (4 ستمبر)، پہلوان بجرنگ پونیا اور ونیش پھوگاٹ نے ہریانہ کے انتخابی مقابلے میں ہاتھ آزمانے کی قیاس آرائیوں کے درمیان کانگریس کے سابق صدر راہل گاندھی سے ملاقات کی۔ اس کے بعد دونوں تنظیموں نے جنرل سکریٹری کے سی وینوگوپال سے بھی ملاقات کی۔ ایسے میں دونوں پہلوانوں کا الیکشن لڑنا یقینی سمجھا جا رہا تھا۔تب سے یہ بحث شروع ہو گئی تھی کہ پھوگاٹ کو جولانہ اور پونیا کو بدلی سیٹ سے امیدوار بنایا جا سکتا ہے۔ تاہم اب یہ مانا جا رہا ہے کہ صرف ونیش پھوگاٹ کو ہی ٹکٹ ملے گا۔
کانگریس امیدواروں کی فہرست ابھی تک جاری نہیں ہوئی ہے
قابل ذکر ہے کہ گزشتہ منگل تک کانگریس کی سنٹرل الیکشن کمیٹی نے کل 90 میں سے 66 سیٹوں کے لیے امیدواروں کے ناموں کو منظوری دے دی تھی۔ تاہم نامزدگی شروع ہونے کے ایک دن بعد بھی فہرست جاری نہیں کی گئی۔ کانگریس اور عام آدمی پارٹی ہریانہ اسمبلی انتخابات کے لیے سیٹوں کی تقسیم پر بات چیت میں مصروف ہیں۔
بھارت ایکسپریس۔
