Red Fort bomb blast two friends death story: دو دوستوں کی طویل عرصے بعدہو رہی تھی ملاقات، ملتے ہی ہوئی دونوں کی دردناک موت

دہلی کے لال قلعہ میں ہونے والے بم دھماکے میں اب تک 12 افراد کی موت ہو چکی ہے۔ اس دھماکے میں کسی نے اپنا بھائی کھو دیا تو کوئی باپ اپنے بیٹے سے ہمیشہ کے لیے جدا ہو گیا۔ انہی مرنے والوں میں دو گہرے دوست بھی شامل تھے، جنہوں نے ایک ساتھ جینا سیکھا اور موت بھی ایک ساتھ ہی آئی۔ لال قلعہ دھماکے میں امروہہ ضلع کے دو دوستوں کی موت ہوئی، جن کی شناخت اشوک اور لوکیش کے طور پر کی گئی ہے۔ دونوں امروہہ کے حسن پور کے رہرا اڈے کے رہنے والے تھے۔ دونوں کے درمیان برسوں پرانی دوستی تھی اور انجام بھی ایک جیسا ہی ہوا۔

ڈی ٹی سی بس میں کنڈکٹر تھے اشوک

امروہہ کے منگریلا گاؤں کے رہائشی اشوک کمار دہلی میں ڈی ٹی سی بس میں کنڈکٹر کے طور پر کام کرتے تھے، جبکہ لوکیش حسن پور میں کھاد فروش تھے۔

دونوں دوستوں کی وہ آخری ملاقات!

لوکیش کی سمدھن کا دہلی کے سر گنگا رام اسپتال میں علاج چل رہا تھا۔ وہ ان کی عیادت کے لیے دہلی آئے ہوئے تھے۔ اسپتال سے نکلنے کے بعد انہوں نے اپنے دوست اشوک کو فون کیا اور ملاقات کے لیے بلایا۔ دونوں لال قلعہ کے نزدیک کھانا کھانے کے لیے نکل پڑے، لیکن قسمت کو کچھ اور ہی منظور تھا — وہ ملاقات ان کی زندگی کی آخری ملاقات ثابت ہوئی۔

دھماکے کے وقت سامنے والی کار میں ہوا بلاسٹ

دونوں دوست لال قلعہ کے پاس سے گزر ہی رہے تھے کہ ان کے سامنے والی کار میں زوردار دھماکہ ہوا۔ دونوں اس کی زد میں آ گئے اور موقع پر ہی جان گنوا بیٹھے۔ پولیس نے دونوں کی لاشیں دہلی کے لوک نایک اسپتال پہنچا کر اہل خانہ کو اطلاع دی۔ اطلاع ملتے ہی اہل خانہ رات گئے اسپتال پہنچ گئے۔ واضح رہے کہ لال قلعہ میٹرو اسٹیشن کے گیٹ نمبر 1 کے نزدیک ہوئے اس کار دھماکے کے معاملے میں اب تک 12 افراد کو گرفتار کیا جا چکا ہے۔ واقعے کی تحقیقات آئی بی، دہلی پولیس اور این آئی اے کر رہی ہیں، جبکہ سکیورٹی ایجنسیاں ملک کے مختلف حصوں میں چھاپے مار رہی ہیں۔

بھارت ایکسپریس اردو۔