Ramadan 2025: رمضان میں روزہ افطار کرانے کی بڑی فضیلت اور اہمیت، رسول اکرمﷺ نے بتایا بہترین طریقہ

نئی دہلی: رمضان کامہینہ مبارک، بابرکت اور مقدس مہینہ ہے۔ اس مہینے میں کئے جانے والے اعمال کی کافی اہمیت ہے اوراس پراضافی ثواب بھی ملتا ہے۔ اسی ضمن میں کسی روزے دارکوافطارکرانے کی بہت بڑی فضیلت اوراہمیت ہے۔ یہ صرف کھانے کی تقسیم نہیں بلکہ محبت، خیرخواہی اوراجرعظیم حاصل کرنے کا ذریعہ ہے۔ کوئی بھی شخص اگرکسی کوافطارکراتا ہے، تواللہ اس کو روزہ کے برابر اجروثواب دیتا ہے۔ حدیث کے مطابق، افطارکے وقت روزے دارکی دعا قبول ہوتی ہے۔ اس لئے اگرکوئی روزہ دارآپ کے لئے دعا کرے گا، تووہ آپ کے حق میں باعثِ رحمت بنے گی۔

نبی اکرم صلی اللہ علیہ وسلم خود روزے داروں کوافطار کراتے تھے اوردوسروں کو بھی اس کی ترغیب دیتے تھے۔ جو شخص کسی روزے دارکوافطار کرائے، اسے بھی روزے دارکا برابرثواب ملے گا، بغیراس کے کہ روزے دارکے اجرمیں کوئی کمی ہو۔ یعنی کوئی شخص کسی بھی روزہ دارکوافطارکراتا ہے تواللہ اس کے ثواب میں کسی بھی طرح کی کمی کئے بغیراسے بھی روزہ دارکے برابرثواب دیتا ہے۔

افطار پارٹی سے بھائی چارہ کو ملتا ہے فروغ

روزہ افطارکرانا ایک نیکی ہے اوراللہ نیکی کرنے والوں کو پسند کرتا ہے۔ اس سے گناہوں کی بخشش ہوتی ہے اورآخرت میں درجات بلند ہوتے ہیں۔ ایک حدیث کے مطابق، جس نے کسی روزے دارکوافطارکرایا تواللہ اسے جنت میں پانی پلائے گا، جہاں پی کروہ کبھی پیاسا نہیں ہوگا۔ صاحب ثروت اورمالدار افراد کے ذریعہ افطار کرانے سے یا افطارپارٹی کرنے سے سب سے غریب اورضرورت مند افراد کوفائدہ ہوتا ہے اوروہ بھی عزت واحترام کے ساتھ کھانا کھا سکتے ہیں، جوان کے لئے بڑی خوشی اورراحت کا باعث بنتا ہے۔ حالانکہ اس کے لئے شرط یہ ہے کہ اس میں دکھاوا نہ ہو بلکہ یہ اللہ کی رضا کی خاطر اور آپسی بھائی چارہ کے لئے منعقدکیا گیا ہو۔