کانگریس لیڈر جے رام رمیش۔ (فائل فوٹو)
غیر ملکی طلباء کو متاثر کرنے والے امریکی فیصلوں پر تشویش کا اظہار کرتے ہوئے کانگریس نے بدھ کو کہا کہ چین نے اپنے طلباء کو درپیش مشکلات کے بارے میں سخت رد عمل ظاہر کیا ہے لیکن وزیر اعظم نریندر مودی اور وزیر خارجہ ایس جے شنکر ہندوستانی طلبا کو ہونے والی پریشانیوں پر ’’مکمل طور پر خاموش‘‘ ہیں۔
کانگریس کے جنرل سکریٹری انچارج کمیونیکیشن جے رام رمیش نے کہا کہ وزارت خارجہ کے مطابق 2024 میں تقریباً 3,37,630 ہندوستانی طلبا اعلیٰ تعلیم کے لیے امریکہ گئے اور امریکی کیمپس میں غیر ملکی طلبا میں سے تقریباً ایک تہائی تعداد ہندوستان طلبا کی ہے۔ جے رام رمیش نے کہا کہ اس کا مطلب یہ ہے کہ تقریباً ساڑھے تین لاکھ ہندوستانی خاندانوں نے اپنی محنت کی کمائی کی بچت سے یا قرض لے کر اپنے بچوں کو اعلیٰ تعلیم کے لیے امریکہ بھیجا۔
رمیش نے کہا ’’ان طلباء کے علاوہ وہ جو اس سے پچھلے سالوں میں گئے تھے، سب کو ایک غیر یقینی مستقبل کا سامنا ہے۔ وہیں 2025 میں جانے کی منصوبہ بندی کرنے والے طلباء کی ایک بڑی تعداد شاید کبھی اپنی خواہشات کو پورا ہوتا ہوا نہ دیکھ سکے، کیوں کہ ٹرمپ نے اپنے ارادوں کو واضح کر دیا ہے۔ چین نے چینی طلباء کے حوالے سے سخت ردعمل کا اظہار کیا ہے۔ لیکن ہمارے وزیر اعظم اور وزیر خارجہ نے بالکل خاموشی اختیار کر رکھی ہے۔‘‘
According to the Ministry of External Affairs, approximately 337,630 Indian students went to the USA for higher studies in 2024. About a third of the foreign students on American campuses are from India.
This means that some three and a half lakh Indian families invested their…
— Jairam Ramesh (@Jairam_Ramesh) June 4, 2025
رمیش نے حکومت پر مزید تنقید کرتے ہوئے کہا ’’انھوں نے اس بات پر کسی تشویش کا اظہار نہیں کیا ہے کہ کس طرح ہندوستانی طلبا اور ان کے خاندان صدر ٹرمپ کے اقدامات سے بری طرح متاثر ہو رہے ہیں۔‘‘ تاہم ہندوستان نے گزشتہ جمعرات کو کہا تھا کہ وہ توقع کرتا ہے کہ ٹرمپ انتظامیہ کی جانب سے طلبا کے ویزا انٹرویوز کو روکنے پر بڑھتے ہوئے خدشات کے درمیان امریکہ ہندوستانی طلبا کی ویزا درخواستوں پر میرٹ کی بنیاد پر غور کرے گا۔
واضح رہے کہ امریکہ کی طرف سے اپنے ویزا نظام میں کی گئی تبدیلیوں نے ہندوستان سمیت دنیا بھر کے طلبا کے لیے وسیع پیمانے پر غیر یقینی صورت حال کو جنم دیا ہے۔ ٹرمپ انتظامیہ کی جانب سے اسٹوڈنٹ ویزا درخواست دہندگان کی سوشل میڈیا جانچ کی توسیع کے منصوبے پر امریکہ میں تعلیم حاصل کرنے کی خواہش رکھنے والے طلباء میں تشویش پائی جاتی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
