مدھیہ پردیش کے وزیرِ اعلیٰ موہن یادو سے جڑا زمین تنازع اب دہلی کے سیاسی حلقوں تک پہنچ گیا ہے۔ مدھیہ پردیش کانگریس کے صدر جیتو پٹواری نے الزام عائد کیا ہے کہ تقریباً 500 کروڑ روپے مالیت کی سرکاری زمین محض 1 روپے بطور ٹوکن رقم پر وزیرِ اعلیٰ کے ایک مشیر سے وابستہ ٹرسٹ کے حوالے کر دی گئی۔ کانگریس کے اس دعوے نے ریاست کی سیاست میں ہلچل مچا دی ہے۔
کانگریس کا الزام
دراصل، ’دی انڈین ایکسپریس‘ کی ایک تحقیقی رپورٹ کے بعد مدھیہ پردیش کی سیاست میں ہنگامہ برپا ہے۔ رپورٹ میں دعویٰ کیا گیا تھا کہ وزیرِ اعلیٰ کا عہدہ سنبھالنے کے بعد موہن یادو، ان کے اہلِ خانہ اور ان سے وابستہ رئیل اسٹیٹ کمپنیوں نے اُجین کے اطراف تقریباً 168 ایکڑ (137 پلاٹس) زمین خریدی ہے۔ اسی سلسلے میں جیتو پٹواری نے پریس کانفرنس کے دوران الزام لگایا کہ اُجین میں واقع تقریباً 500 کروڑ روپے مالیت کی سرکاری زمین صرف 1 روپے میں ایک نجی ٹرسٹ کو الاٹ کر دی گئی۔ پٹواری کے مطابق اس ٹرسٹ سے وابستہ شخصیت مدھیہ پردیش کے وزیرِ اعلیٰ کے ثقافتی مشیر رام جی ہیں۔
کانگریس نے اٹھائے اہم سوالات
’دی انڈین ایکسپریس‘ کی رپورٹ کا حوالہ دیتے ہوئے جیتو پٹواری نے سوال اٹھایا کہ وزیرِ اعلیٰ بننے کے بعد موہن یادو کے خاندان نے جو سینکڑوں ایکڑ زمین خریدی، اس کے لیے سرمایہ کہاں سے آیا؟ انہوں نے مطالبہ کیا کہ حکومت ان زمینوں اور ان سے متعلق ترقیاتی منصوبوں کی مکمل تفصیلات عوام کے سامنے پیش کرے۔بی جے پی کی جانب سے ان الزامات کو ذات پات کی سیاست سے جوڑنے پر ردعمل دیتے ہوئے پٹواری نے کہا کہ ’’سوال زمین سے متعلق پوچھا گیا تھا، تو جواب ذات پر کیوں دیا گیا؟‘‘انہوں نے مزید الزام لگایا کہ ’’ایودھیا میں چندے کی مبینہ بے ضابطگیاں اور مہاکال کی نگری اُجین میں زمینوں کی لوٹ مار، بی جے پی کا نیا ماڈل بن چکا ہے۔” پٹواری نے مطالبہ کیا کہ اگر حکومت واقعی شفافیت پر یقین رکھتی ہے تو وزیرِ اعلیٰ کو 2023 کے بعد اپنے خاندان کی جانب سے خریدی گئی تمام زمینوں پر وائٹ پیپر جاری کرنا چاہیے اور پورے معاملے کی آزاد عدالتی تحقیقات کرانی چاہیے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
