اروند کیجریوال کی اہلیہ سنیتا کیجریوال۔ (فائل فوٹو)
Arvind Kejriwal Bail: دہلی کے وزیراعلیٰ اروند کیجریوال کو شراب گھوٹالہ معاملے میں سپریم کورٹ سے ضمانت ملنے پر ان کی اہلیہ سنیتا کیجریوال نے خوشی کا اظہار کیا ہے۔ انہوں نے سوشل میڈیا سائٹ ایکس پراپنے شوہر اروند کیجریوال کے مضبوط ارادوں کی تعریف کی۔ انہوں نے لکھا، ”عام آدمی پارٹی کو بہت بہت مبارکباد۔ مضبوط بنے رہنے کے لئے ہم آپ کی تعریف کرتے ہیں۔ اس کے ساتھ ہی ہم آئندہ دنوں میں دیگرلیڈران کی رہائی کی بھی دعا کرتے ہیں۔“
عام آدمی پارٹی کے سینئرلیڈر اور سابق نائب وزیراعلیٰ منیش سسودیا، رکن پارلیمنٹ راگھو چڈھا، وزیرآتشی مارلینا سمیت تمام لیڈران نے بھی اروند کیجریوال کی رہائی پر خوشی کا اظہارکیا ہے۔ سبھی لیڈران نے اروند کیجریوال کی ضمانت کو سچائی کی جیت قرار دیا ہے۔
Congratulations to AAP family!🎉😊Kudos for staying strong 👏🏻Wishing also the soonest release of our other leaders.
— Sunita Kejriwal (@KejriwalSunita) September 13, 2024
عام آدمی پارٹی نے سچائی کی جیت قراردیا
دہلی کے سابق نائب وزیراعلیٰ منیش سسودیا نے سوشل میڈیا سائٹ ایکس پر پوسٹ کرتے ہوئے لکھا ہے کہ ’’یہ جھوٹ اور سازش کے خلاف سچائی کی جیت ہے۔‘‘ انہوں نے بغیر نام لئے مودی حکومت کو تانا شاہ بھی بتایا ہے۔ وہیں رکن پارلیمنٹ راگھو چڈھا نے سپریم کورٹ کا شکریہ ادا کرتے ہوئے لکھا ہے کہ سچ کو پریشان کیا جاسکتا ہے، لیکن ہرایا نہیں جاسکتا۔ راگھو چڈھا نے لکھا- ’’آخرکار سپریم کورٹ نے دہلی کے بیٹے اروند کیجریوال کو جیل کی بیڑیوں سے آزاد کرنے کا فیصلہ سنا دیا ہے۔‘‘
انڈیا الائنس کے لیڈران کا ردعمل
انڈیا الائنس کی اتحادی جماعتوں نے بھی اپنے ردعمل کا اظہار سوشل میڈیا پلیٹ فارم پرکرنا شروع کردیا ہے۔ نیشنلسٹ کانگریس پارٹی (این سی پی) کے سربراہ شرد پوار نے کیجریوال کی ضمانت پر کہا، ”اروند کیجریوال کی رہائی سے ایک بات واضح ہوچکی ہے کہ اس جمہوریت کی جڑیں ابھی بھی مضبوط ہیں۔ یہ لڑائی سچائی کے راستے سے شروع ہوئی ہے۔ کیجریوال کی ضمانت سے ایک بات یقینی ہوچکی ہے کہ ایک جمہوریت ملک میں کسی بھی شخص کو کمتر دکھانے کی سازش کبھی پوری نہیں ہوسکتی۔ “
بھارت ایکسپریس–
