نئی دہلی: عالمی سرمایہ کاری بینک جے پی مورگن کی ایک رپورٹ کے مطابق آنے والے وقت میں خام تیل کی قیمت 100 ڈالر فی بیرل کی نچلی حد میں برقرار رہ سکتی ہے۔ رپورٹ میں کہا گیا ہے کہ مغربی ایشیا میں جاری جنگ اور سپلائی چین میں رکاوٹوں کے سبب توانائی بازار پر دباؤ برقرار ہے۔ رپورٹ کے مطابق آبنائے ہرمز دوبارہ کھلنے کے بعد بھی سال کے بقیہ حصے میں خام تیل کی قیمتوں میں فوری بڑی کمی آنے کا امکان کم ہے۔
سپلائی چین میں رکاوٹیں برقرار رہنے کا اندیشہ
رپورٹ میں کہا گیا ہے کہ شپنگ، ریفائنری آپریشن اور آئل ٹینکروں کی دستیابی میں خلل عالمی توانائی سپلائی چین کو متاثر کر رہا ہے۔ اسی وجہ سے خام تیل کی قیمتوں میں تیزی سے استحکام پیدا ہونا مشکل دکھائی دے رہا ہے۔ عالمی بروکریج فرم کے اندازے کے مطابق 2026 میں برینٹ کروڈ کی اوسط قیمت تقریباً 97 ڈالر فی بیرل رہ سکتی ہے، جو اس بات کا اشارہ ہے کہ عالمی منڈی کو درمیانی مدت میں سپلائی کی کمی کا سامنا کرنا پڑ سکتا ہے۔ رپورٹ میں مزید کہا گیا ہے کہ صرف آبنائے ہُرمز کے دوبارہ کھلنے سے بازار میں فوری استحکام پیدا نہیں ہوگا۔ خام تیل کی نقل و حمل کے نظام میں لاجسٹک چیلنجز کئی مہینوں تک برقرار رہ سکتے ہیں، جس سے قیمتوں پر دباؤ جاری رہنے کا امکان ہے۔
امریکہ-ایران کشیدگی سے قیمتوں میں مزید اضافہ
امریکہ اور ایران کے درمیان جاری کشیدگی کے باعث عالمی منڈی میں خام تیل کی قیمتوں میں اضافہ دیکھا جا رہا ہے۔ منگل کے روز بین الاقوامی معیار کے برینٹ کروڈ کی قیمت تقریباً ایک فیصد بڑھ کر 105 ڈالر فی بیرل سے تجاوز کر گئی، جبکہ ویسٹ ٹیکساس انٹرمیڈیٹ بھی ایک فیصد اضافے کے ساتھ 100 ڈالر فی بیرل سے اوپر پہنچ گیا۔ رپورٹ کے مطابق اپریل میں اوپیک کی خام تیل پیداوار بھی 8 لاکھ 30 ہزار بیرل یومیہ کم ہو کر 20.04 ملین بیرل یومیہ رہ گئی۔
آبنائے ہرمز کی کیا ہے اہمیت؟
آبنائے ہُرمز دنیا کی سب سے اہم سمندری گزرگاہ ہے، جہاں سے عالمی سطح پر خام تیل اور قدرتی گیس کی ایک بڑی مقدار کی ترسیل ہوتی ہے۔ خلیجی ممالک جیسے سعودی عرب، ایران، عراق، کویت اور متحدہ عرب امارات سے برآمد ہونے والا بیشتر تیل اسی راستے سے عالمی بازار تک پہنچتا ہے۔ یہی وجہ ہے کہ اس آبی گذرگاہ میں کسی بھی قسم کی کشیدگی یا رکاوٹ کا براہِ راست اثر عالمی معیشت، ایندھن کی قیمتوں اور توانائی کی سپلائی پر پڑتا ہے۔ ماہرین کے مطابق اگر آبنائے ہُرمز میں آمدورفت متاثر ہو جائے تو دنیا بھر میں خام تیل کی قیمتوں میں زبردست اضافہ اور توانائی بحران پیدا ہونے کا خطرہ بڑھ جاتا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
