مالدہ: وزیر اعظم نریندر مودی نے ہفتہ کے روز مغربی بنگال کے مالدہ میں منعقد ایک عوامی جلسے سے خطاب کرتے ہوئے سال 2047 تک بھارت کو ایک مکمل وکست بھارت ملک بنانے کے ہدف کو ایک بار پھر دہرایا۔ انہوں نے کہا کہ اس خواب کی تعبیر میں مشرقی بھارت کا کردار سب سے زیادہ اہم ہے اور آنے والے برسوں میں یہی خطہ ملک کی ترقی کا نیا انجن بنے گا۔ وزیر اعظم مودی نے کہا کہ کئی دہائیوں تک مشرقی بھارت کو نفرت، خوف اور گمراہ کن سیاست میں الجھا کر رکھا گیا، جس کی وجہ سے ترقی کے بے شمار مواقع ضائع ہوئے۔ تاہم اب ان ریاستوں کے عوام نے ترقی اور خوشحالی کی سیاست کو ترجیح دینا شروع کر دیا ہے، جس کے مثبت نتائج سامنے آ رہے ہیں۔ انہوں نے کہا کہ اڈیشہ میں پہلی بار بھارتیہ جنتا پارٹی کی حکومت بنی ہے، تریپورہ کئی برسوں سے بی جے پی پر اعتماد کا اظہار کر رہا ہے اور آسام میں مسلسل عوامی حمایت کے ساتھ بی جے پی اقتدار میں ہے۔ حال ہی میں بہار میں بھی بی جے پی۔این ڈی اے اتحاد کی حکومت بنی ہے۔ وزیر اعظم نے کہا کہ اب مغربی بنگال میں بھی اچھی حکمرانی اور ترقی کی باری آ چکی ہے۔
وزیر اعظم مودی نے دعویٰ کیا کہ جہاں جہاں برسوں تک بی جے پی کے خلاف غلط معلومات اور افواہیں پھیلائی گئیں، وہاں بھی اب عوام حقیقت کو سمجھ رہے ہیں اور پارٹی کو کھل کر حمایت دے رہے ہیں۔ انہوں نے کہا کہ اس بار بنگال کے عوام بھی بی جے پی کو کامیاب بنا کر ریاست کو ترقی کے نئے راستے پر ڈالیں گے۔ انہوں نے حالیہ شہری بلدیاتی انتخابات کا حوالہ دیتے ہوئے کہا کہ مہاراشٹر میں بی جے پی کو تاریخی کامیابی حاصل ہوئی ہے۔ خاص طور پر ممبئی کی برہن ممبئی میونسپل کارپوریشن، بی ایم سی میں پہلی بار پارٹی کو ریکارڈ کامیابی ملی ہے۔ وزیر اعظم نے کہا کہ جہاں کبھی بی جے پی کی جیت کا تصور بھی ممکن نہیں تھا، وہاں آج پارٹی کو بے مثال عوامی حمایت مل رہی ہے۔ وزیر اعظم نے مزید کہا کہ کیرالہ کی راجدھانی ترواننت پورم میں بھی بی جے پی کا میئر منتخب ہونا اس بات کا ثبوت ہے کہ پارٹی کا دائرہ اثر پورے ملک میں پھیل رہا ہے۔ انہوں نے کہا کہ یہ سب اس بات کی علامت ہے کہ ملک کی جین-زی یعنی نوجوان نسل بی جے پی کے ترقیاتی ماڈل پر سب سے زیادہ بھروسہ کر رہی ہے۔
اپوزیشن پر تنقید کرتے ہوئے وزیر اعظم نے کہا کہ وہ چاہتے ہیں کہ بنگال کے ہر غریب خاندان کو پکا مکان ملے اور مرکز کی تمام فلاحی اسکیموں کا پورا فائدہ عوام تک پہنچے۔ انہوں نے الزام عائد کیا کہ ریاست کی ترنمول کانگریس حکومت مرکز سے بھیجے گئے غریبوں کے فنڈز کے صحیح استعمال میں رکاوٹ ڈال رہی ہے۔ آیوشمان بھارت اسکیم کا ذکر کرتے ہوئے وزیر اعظم نے کہا کہ آج مغربی بنگال ملک کی واحد ریاست ہے جہاں یہ اہم صحت اسکیم نافذ نہیں کی گئی۔ اس کی وجہ سے لاکھوں غریب خاندان مفت علاج کی سہولت سے محروم ہیں، جس کی ذمہ داری براہ راست ریاستی حکومت پر عائد ہوتی ہے۔
وزیر اعظم نے پی ایم سوریہ گھر مفت بجلی یوجنا پر بھی روشنی ڈالی اور بتایا کہ اس اسکیم کے تحت لاکھوں خاندانوں نے اپنے گھروں کی چھتوں پر سولر پینل لگا کر بجلی کا بل صفر کر دیا ہے۔ انہوں نے کہا کہ اس مقصد کے لیے مرکز نے ہزاروں کروڑ روپے جاری کیے ہیں، مگر بنگال حکومت اس اسکیم کو نافذ کرنے میں دلچسپی نہیں دکھا رہی۔ مالدہ اور پورے بنگال کی ترقی کے حوالے سے وزیر اعظم مودی نے کہا کہ بی جے پی کی حکومت بننے پر کسانوں اور نوجوانوں کے لیے روزگار اور ترقی کے نئے مواقع پیدا کیے جائیں گے۔ انہوں نے مالدہ کی مشہور ”مینگو اکانومی“ کو نئی بلندیوں تک پہنچانے کا وعدہ کیا۔ جوٹ کسانوں کا ذکر کرتے ہوئے وزیر اعظم نے اعداد و شمار پیش کیے اور بتایا کہ 2014 سے پہلے جوٹ کی کم از کم امدادی قیمت تقریباً 2400 روپے تھی، جو اب بڑھ کر ساڑھے پانچ ہزار روپے سے زیادہ ہو چکی ہے۔ انہوں نے کہا کہ 2014 سے پہلے دس برسوں میں جوٹ کسانوں کو صرف 400 کروڑ روپے ملے تھے، جبکہ گزشتہ گیارہ برسوں میں یہ رقم بڑھ کر 1300 کروڑ روپے سے تجاوز کر گئی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
