Amit Shah shares stage with Ajit Pawar : مرکزی وزیر داخلہ امت شاہ نےآج پونے میں این سی پی لیڈر اجیت پوار کے بارے میں کہا کہ آپ یہاں بہت دیر سے آئے، یہ جگہ آپ کے لیے صحیح ہے۔لیکن آپ نے آنے میں دیر کردیا۔ اجیت پوار گزشتہ ماہ بی جے پی اور سی ایم ایکناتھ شندے کی شیوسینا کے اتحاد میں شامل ہو کر قومی جمہوری اتحاد (این ڈی اے) کا حصہ بنے ہیں۔امت شاہ نے اپنی تقریر کے آغاز میں اجیت پوار کو نائب وزیر اعلیٰ بننے پر مبارکباد دی۔ اس پروگرام میں مہاراشٹر کے وزیر اعلی ایکناتھ شندے، نائب وزیر اعلی دیویندر فڑنویس اور اجیت پوار بھی موجود تھے۔ امت شاہ نے کہا، ‘میں پہلی بار اجیت پوار کے ساتھ اسٹیج پر بیٹھا ہوں۔ اجیت پوار اب صحیح جگہ پر بیٹھے ہیں۔ اجیت پوار، آپ نے یہاں آنے میں کافی وقت لگا دیا۔
مرکزی وزیر نے مزید کہا کہ یہ ملک کے لوگوں کا خواب تھا کہ ان کا گھر بنے، ان کے گھر میں بجلی آئے۔ ایک غریب کے ذہن میں جو بھی خواب ہیں، وزیر اعظم نریندر مودی نے 9 سال میں ان سب کو پورا کیا۔ انہوں نے کہا کہ غریب کام کرنا چاہتا ہے، لیکن سرمایہ نہیں ہے، اس کا جواب کوآپریٹو موومنٹ ہے۔ تعاون کے ذریعے خوشحالی کا مطلب سب سے چھوٹے شخص کو موقع دینا ہے۔ عوام کو اس وزارت سے موقع ملے گا۔ امت شاہ نے مزید کہا، ‘ہمیں کوآپریٹو موومنٹ کے لیے شفافیت لانی ہوگی، اور جوابدہی کو طے کرنا ہوگا۔ ہم نے کامیابیوں کی بہت سی مثالیں دنیا کے سامنے رکھی ہیں۔ نریندر مودی کی قیادت میں ہم نے فیصلہ کیا ہے کہ آنے والے 5 سالوں میں 3 لاکھ نئے پیکس بنائے جائیں گے۔ آج صبح میں نے وزیر اعلیٰ اور نائب وزیر اعلیٰ سے کہا کہ مہاراشٹر کو ان اسکیموں کا زیادہ سے زیادہ فائدہ اٹھانا چاہیے۔
مرکزی وزیر نے بتایا کہ ایک کوآپریٹو ڈیٹا تیار کیا جا رہا ہے، جس سے پتہ چلے گا کہ کن گاؤں میں کوآپریٹو موومنٹ نہیں ہے۔ اس سے نوجوان جڑیں گے۔ کسانوں کے بارے میں بات کرتے ہوئے انہوں نے کہا کہ کسان اپنی مصنوعات برآمد کرنے کے قابل نہیں تھے۔ اب یہ کام ملٹی ایکسپورٹ کمیٹی کرے گی، جس سے کسانوں کو فائدہ ہوگا۔ انہوں نے بتایا کہ اگر آپ کے پاس ڈھائی بیگھہ زمین ہے تو آپ بیج پیدا کر سکتے ہیں، پہلے یہ ممکن نہیں تھا۔
مرکزی وزیر نے کہا کہ انہوں نے وزیر اعلیٰ اور دونوں نائب وزرائے اعلیٰ سے بات کی ہے کہ مہاراشٹر میں کوئی کوآپریٹو شوگر فیکٹری نہیں ہونی چاہیے جو ایتھنول نہ بناتی ہو۔ انہوں نے کہاکہ ہم نے 10 ہزار کروڑ کا اعلان کیا ہے، آپ اسے بھول جائیں، ہم آپ جتنی رقم چاہیں گے، ہم فنانس کریں گے۔ میں صرف یہ کہنا چاہتا ہوں کہ وزیر اعظم نے 5 ٹریلین معیشت کا ہدف رکھا ہے، میں یہ مہاراشٹر کی کوآپریٹو سوسائٹی سے کہنا چاہتا ہوں۔ ہمیں یہ بھی طے کرنا چاہیے کہ کوآپریٹو سیکٹر کا مقصد کیا ہوگا اور اس میں اس کا کیا کردار ہوگا۔
بھارت ایکسپریس۔
