کانگریس نے 17 امیدواروں پرمشتمل 11ویں فہرست جاری کی۔
کانگریس کی نئی ورکنگ کمیٹی (سی ڈبلیو سی) کی پہلی میٹنگ ہفتہ (16 ستمبر) کو ہوگی جس میں آئندہ لوک سبھا انتخابات کے پیش نظر مستقبل کی حکمت عملی، اپوزیشن اتحاد کو آگے بڑھانے’انڈین نیشنل ڈیولپمنٹ انکلوسیو’ الائنس (انڈیا)، اور آئندہ اسمبلی انتخابات کی تیاریوں اور دیگر کئی موضوعات پر تبادلہ خیال کیا جائے گا۔
کانگریس نے 20 اگست کو اپنی ورکنگ کمیٹی کی تشکیل نو کی تھی، جس میں پارٹی صدر ملکارجن کھرگے کے ساتھ ساتھ سابق صدر سونیا گاندھی، سابق وزیر اعظم منموہن سنگھ اور راہل گاندھی سمیت کئی سینئر لیڈران شامل ہیں۔ ورکنگ کمیٹی میں 39 ممبران، 32 مستقل مدعو ممبران اور 13 خصوصی مدعو ممبران کو شامل کیا گیا ہے۔ سچن پائلٹ اور ششی تھرور جیسے لیڈروں کو پہلی بار اس ورکنگ کمیٹی میں جگہ ملی ہے۔
بھارت جوڑو یاترا کے دوسرے مرحلے پر بات چیت ہوگی
کانگریس ورکنگ کمیٹی کی میٹنگ 16 ستمبر کو ہوگی اور پھر اگلے دن توسیعی ورکنگ کمیٹی کی میٹنگ ہوگی۔ توسیعی ورکنگ کمیٹی کی میٹنگ میں ورکنگ کمیٹی کے تمام اراکین کے علاوہ ریاستی کانگریس کمیٹی کے صدر اور دیگر کئی سینئر لیڈران شرکت کریں گے۔ ورکنگ کمیٹی کے اجلاس کے بعد 17 ستمبر کو حیدرآباد کے قریب ایک جلسہ عام بھی ہوگا جس سے پارٹی کے اعلیٰ قائدین خطاب کریں گے۔
ذرائع کا کہنا ہے کہ آئندہ لوک سبھا انتخابات کے پیش نظر حکومت کو گھیرنے کی حکمت عملی، اپوزیشن اتحاد ‘ انڈیا’ کو آگے بڑھانا، تنظیم کو مضبوط بنانے جیسے موضوعات پر بات چیت کی جائے گی۔ ذرائع نے یہ بھی بتایا کہ اس ورکنگ کمیٹی میں ‘بھارت جوڑو یاترا’ کے دوسرے مرحلے پر بھی بات ہو سکتی ہے۔
لوک سبھا سیٹوں پر تال میل پر تبادلہ خیال
خیال کیا جاتا ہے کہ کانگریس ورکنگ کمیٹی کے اجلاس، جلسہ عام اور مارچ کے ذریعہ تلنگانہ اسمبلی انتخابات کے لئے اپنی مہم کا باقاعدہ آغاز کرے گی۔ ریاست میں اس سال کے آخر میں اسمبلی انتخابات کی تجویز ہے۔ کانگریس ورکنگ کمیٹی کی میٹنگ ایسے وقت میں ہونے جا رہی ہے جب اس نے اور دو درجن سے زیادہ اپوزیشن جماعتوں نے مل کر اپوزیشن اتحاد ‘انڈیا’ تشکیل دیا ہے۔
‘اپوزیشن جماعتوں کے اتحاد نے فیصلہ کیا ہے کہ وہ اگلے لوک سبھا انتخابات ایک ساتھ لڑیں گی اور جہاں تک ممکن ہوسکے سیٹوں پر تال میل کریں گے۔ ذرائع کا کہنا ہے کہ ورکنگ کمیٹی کے اجلاس میں ‘انڈیا’ اتحاد کو مزید مضبوط بنانے پر بات ہو سکتی ہے۔
‘حکومت کو گھیرنے کی حکمت عملی’
ورکنگ کمیٹی کی اس میٹنگ میں پانچ ریاستوں مدھیہ پردیش، چھتیس گڑھ، راجستھان، تلنگانہ اور میزورم میں چند ماہ بعد ہونے والے اسمبلی انتخابات کی تیاریوں کے حوالے سے بھی بات چیت ہوگی۔ کانگریس ان ریاستوں کے اسمبلی انتخابات میں اچھی کارکردگی دکھا کر لوک سبھا انتخابات کے لیے اپنا دعویٰ مضبوط کرنے کی کوشش کر رہی ہے۔
ذرائع کے مطابق کانگریس ورکنگ کمیٹی کی اس میٹنگ میں مہنگائی، بے روزگاری، معیشت کی حالت، چین کے ساتھ سرحد پر کشیدگی اور مبینہ بدعنوانی کے مسائل پر حکومت کو گھیرنے کی حکمت عملی پر بھی بات ہو سکتی ہے۔
بھارت ایکسپریس۔
