Gujarat has to be drug-free: منشیات فروشی کی اطلاع دینے کیلئے ہیلپ لائن نمبر جاری، وزیر داخلہ امت شاہ  نے کہا-’’دسمبر 2028 تک گجرات کو منشیات سے پاک بنانا ہے‘‘ 

احمد آباد: مرکزی وزیر داخلہ امت شاہ نے کہا ہے کہ دسمبر 2028 تک گجرات کو منشیات سے پاک بنانے کا ہدف مقرر کیا گیا ہے، جبکہ دسمبر 2029 تک پورے ملک کو نشے کی لعنت سے نجات دلانے کی کوشش کی جائے گی۔ انہوں نے عوام، سماجی تنظیموں اور والدین سے اپیل کی کہ وہ اس مہم میں تعاون کریں اور منشیات کی فروخت سے متعلق کسی بھی اطلاع کو ہیلپ لائن نمبر 1033 پر پہنچائیں۔ انہوں نے یقین دلایا کہ اطلاع دینے والے کی شناخت خفیہ رکھی جائے گی۔ امت شاہ احمد آباد کے بڈاج علاقے میں 700 سے زائد نئے تعمیر شدہ مکانات کا افتتاح کرنے اور مختلف ترقیاتی منصوبوں کا افتتاح و سنگ بنیاد رکھنے کے بعد ایک عوامی اجتماع سے خطاب کر رہے تھے۔ اس موقع پر انہوں نے 1024 کروڑ روپے کے مختلف منصوبے احمد آباد کے عوام کے نام وقف کیے۔

راماپیر ٹیکرا میں غریب خاندانوں کو پکے مکانات

امت شاہ نے اپنے خطاب میں راماپیر ٹیکرا کا خصوصی ذکر کرتے ہوئے کہا کہ ان کے سیاسی سفر کی شروعات اسی علاقے سے ہوئی تھی۔ 1985 میں جب وہ ووٹر کارڈ اور پرچیاں تقسیم کرنے وہاں جایا کرتے تھے تو علاقے کی حالت انتہائی خراب تھی۔ دونوں جانب مکانات کی قطاریں تھیں، جب کہ درمیان میں گندا نالہ اور سیوریج کا پانی بہتا تھا۔ پینے کے صاف پانی کا انتظام نہیں تھا، بیماریاں پھیلتی تھیں، بچوں کی تعلیم کے لیے سہولتیں موجود نہیں تھیں اور چھوٹے موٹے جرائم بھی عام تھے۔ انہوں نے کہا کہ 2007 میں جب نریندر مودی گجرات کے وزیر اعلیٰ تھے، تب جھگی جھونپڑیوں میں رہنے والے لوگوں کو پکے مکانات فراہم کرنے کے لیے ایک اسکیم شروع کی گئی تھی۔ وقت کے ساتھ اس میں کئی اصلاحات کی گئیں اور اب راماپیر ٹیکرا کے رہائشیوں کو مکانات فراہم کیے جا رہے ہیں۔

55 ہزار سے زائد افراد کو ملیں گی بنیادی سہولتیں

مرکزی وزیر داخلہ نے نئے مکانات حاصل کرنے والے خاندانوں کو مبارک باد دیتے ہوئے کہا کہ انہیں ایسے شاندار اور صاف ستھرے فلیٹ دیے گئے ہیں جیسے نجی بلڈروں کی جانب سے تعمیر کیے جاتے ہیں۔ ان مکانات میں پنکھے بھی نصب ہیں۔ انہوں نے کہا کہ جب پورا پروجیکٹ مکمل ہو جائے گا تو اسی احاطے میں 55 ہزار سے زائد افراد کو سماجی تحفظ، تفریح، لائبریری، تعلیم اور صحت جیسی سہولتیں میسر ہوں گی۔ امت شاہ نے کانگریس پر تنقید کرتے ہوئے کہا کہ اس نے طویل عرصے تک ملک پر حکومت کی، لیکن غریبوں کی مدد کے لیے خاطر خواہ اقدامات نہیں کیے۔ انہوں نے بوپال-گھما میں پمپ ہاؤس کی تعمیر کے لیے بھومی پوجن کا بھی ذکر کیا اور کہا کہ بارش کے موسم میں اس علاقے کے گھروں میں پانی داخل ہو جاتا تھا۔ انہوں نے بھوپیندر بھائی سے وعدہ کیا تھا کہ آئندہ وہاں پانی جمع ہونے کی شکایت نہیں رہے گی۔

منشیات فروشی کی اطلاع کے لیے 1033 ہیلپ لائن

امت شاہ نے گجرات اور مرکزی حکومت کے درمیان ہونے والی میٹنگ کا حوالہ دیتے ہوئے کہا کہ اس میں سب سے اہم موضوع گجرات کو منشیات سے پاک بنانے کا تھا۔ انہوں نے کہا کہ منشیات نوجوان نسل کو تباہ کر رہی ہیں اور اس سے حاصل ہونے والی رقم ملک میں دہشت گردی کے لیے استعمال ہوتی ہے۔ انہوں نے کہا کہ حکومت نے نکسل ازم کو ختم کیا ہے اور اب دسمبر 2029 تک پورے ملک کو منشیات سے پاک بنانے کا ہدف ہے۔ تاہم گجرات کے لیے یہ مدت دسمبر 2028 مقرر کی گئی ہے۔ امت شاہ نے عوام سے اپیل کی کہ اگر انہیں کہیں منشیات کی فروخت یا اس سے متعلق سرگرمیوں کی اطلاع ملے تو فوراً 1033 پر کال کریں۔ ان کے مطابق گجرات حکومت اطلاع ملنے پر منشیات فروخت کرنے والوں کے خلاف کارروائی کرے گی اور اطلاع دینے والے کی شناخت خفیہ رکھی جائے گی۔

بھارت ایکسپریس اردو۔