نئی دہلی — بھارتی وزار خارجہ (MEA) نے پیر کے روز ایک سخت بیان جاری کرتے ہوئے پاکستانی آرمی چیف جنرل عاصم منیر کے امریکہ میں دیے گئے بیانات کو غیر ذمہ دارانہ اور خطرناک قرار دیا۔ وزارت خارجہ کے ترجمان نے کہا کہ ایٹمی دھمکی دینا پاکستان کا معمول بن گیا ہے، بین الاقوامی برادری خود اندازہ لگا سکتی ہے کہ ایسے بیانات میں کس قدر غیر سنجیدگی اور ایٹمی کمانڈ و کنٹرول کے حوالے سے خدشات موجود ہیں، خصوصاً اس ملک میں جہاں فوج دہشت گرد گروہوں کے ساتھ ملی ہوئی ہے۔ ترجمان نے افسوس کا اظہار کیا کہ یہ بیانات ایک دوست ملک کی سرزمین سے دیے گئے۔ وزارت خارجہ نے واضح کیا کہ بھارت کسی بھی ایٹمی بلیک میل کے آگے جھکنے والا نہیں اور قومی سلامتی کے تحفظ کے لیے ہر ضروری قدم اٹھاتا رہے گا۔
عاصم منیر کی دھمکی
امریکی دورے کے دوران جنرل عاصم منیر نے ایک بار پھر بھارت کو دھمکایا کہ اگر پاکستان کو وجودی خطرہ لاحق ہوا تو وہ خطے کو ایٹمی جنگ میں دھکیل سکتا ہے، جس سے تقریباً نصف دنیا متاثر ہو سکتی ہے۔ انہوں نے کہا کہ اگر بھارت نے دریائے سندھ پر ڈیم بنانے کی کوشش کی تو پاکستان اسے ’’ہر قیمت پر‘‘ روکے گا۔
کشمیر کو ’شہ رگ‘ قرار دینے کا دعویٰ
عاصم منیر نے کشمیری معاملے کو پاکستان کی ’’شہ رگ‘‘ قرار دیتے ہوئے کہا کہ یہ بھارت کا اندرونی معاملہ نہیں بلکہ ایک بین الاقوامی حل طلب مسئلہ ہے۔ پاکستانی میڈیا کے مطابق عاصم مینر نے کہا ’’ہم بھارت کا ڈیم بنانے کا انتظار کریں گے، پھر اسے تباہ کر دیں گے۔‘‘
واشنگٹن میں سخت لہجہ
واشنگٹن میں ایک تقریب کے دوران عاصم منیر نے کہا کہ دریائے سندھ ’’بھارت کی خاندانی جائیداد نہیں‘‘ اور پاکستان کے پاس بھارتی منصوبوں کو ناکام بنانے کے لیے وسائل کی کمی نہیں۔
امریکی فوجی قیادت سے ملاقاتیں
امریکہ میں قیام کے دوران پاکستانی آرمی چیف نے امریکی سینٹرل کمانڈ (CENTCOM) کے تبادلۂ کمانڈ کی تقریب میں شرکت کی اور امریکی چیئرمین جوائنٹ چیفس آف اسٹاف جنرل ڈین کین سمیت کئی ممالک کے فوجی سربراہان سے ملاقات کی۔ عاصم منیر نے جنرل کین کو پاکستان کے دورے کی دعوت دی اور پاکستان کو علاقائی سلامتی میں کلیدی کردار ادا کرنے والا ملک قرار دیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
