کرکٹ شائقین کے لیے بڑی خوشخبری کی بات یہ ہے کہ اب 128 سال بعد یہ کھیل ایک بار پھر اولمپکس کا حصہ بننے جا رہا ہے اور اس بار میزبان ہوگا امریکہ کا شہر لاس اینجلس۔ سال 2028 کے سمر اولمپکس میں کرکٹ کی واپسی طے ہو چکی ہے، اور اب اس کے میچز کی تاریخیں بھی سامنے آ گئی ہیں۔
کہاں اور کب ہوں گے کرکٹ میچز؟
اولمپکس میں کرکٹ کے مقابلے لاس اینجلس سے تقریباً 50 کلومیٹر دور شہر “پومونا” (Pomona) کے فیئر گراؤنڈز اسٹیڈیم میں کھیلے جائیں گے۔ میچز کا آغاز 12 جولائی 2028 سے ہوگا، جب کہ خواتین کا فائنل 20 جولائی اور مردوں کا فائنل 29 جولائی کو کھیلا جائے گا۔
اولمپک منتظمین نے واضح کیا ہے کہ زیادہ تر دنوں میں دو میچز ہوں گے ،یعنی “ڈبل ہیڈر” فارمیٹ اپنایا جائے گا۔ تاہم 14 اور 21 جولائی کو کوئی میچ نہیں ہوگا تاکہ کھلاڑیوں کو آرام کا موقع ملے اور ناظرین کو مکمل تفریح فراہم کی جا سکے۔
کون سی ٹیمیں لیں گی حصہ؟
اس بار مردوں اور خواتین دونوں زمروں میں 6، 6 ٹیمیں حصہ لیں گی۔ ہر ٹیم میں 15 کھلاڑی ہوں گے، یعنی کل 90 کرکٹرز کو اولمپکس میں کھیلنے کا موقع ملے گا۔ کن کن ٹیموں کو شامل کیا جائے گا، اس کا اعلان جلد ہی آئی سی سی اور اولمپک کمیٹی مشترکہ طور پر کریں گے۔
کرکٹ کی اولمپکس میں واپسی کیوں؟
کرکٹ کو اولمپکس میں شامل کرنے کی مانگ کئی سالوں سے کی جا رہی تھی۔ بالآخر 2023 میں انٹرنیشنل اولمپک کمیٹی (IOC) نے کرکٹ سمیت بیس بال/سافٹ بال، فلیگ فٹبال، لیکروس (سِکس) اور اسکواش کو 2028 کے اولمپکس میں شامل کرنے کی منظوری دے دی۔
اس فیصلے کا مقصد کھیلوں کو زیادہ عالمی بنانا اور نوجوانوں کو اس سے جوڑنا ہے۔ خاص طور پر بھارت، پاکستان، آسٹریلیا اور انگلینڈ جیسے کرکٹ دیوانہ ممالک میں اولمپکس کو مزید مقبول بنانے کی امید ہے۔
واضح رہے کہ کامن ویلتھ گیمز اور ایشین گیمز میں کرکٹ کی واپسی پہلے ہی ہو چکی ہے۔ 2022 کے کامن ویلتھ گیمز میں خواتین کرکٹ شامل کی گئی تھی، جبکہ 2023 کے ایشین گیمز میں بھارت کی مردوں اور خواتین دونوں ٹیموں نے شاندار کارکردگی دکھائی تھی۔
128 سال پہلے اولمپکس میں کرکٹ میچ کھیلا گیا تھا
اس سے قبل اولمپکس میں صرف ایک بار کرکٹ میچ کھیلا گیا تھا، جب 1900 کے پیرس اولمپکس کے دوران دو روزہ میچ میں صرف دو ٹیمیں برطانیہ اور فرانس آمنے سامنے تھیں۔ برطانیہ نے وہ میچ جیت کر گولڈ میڈل جیتا۔ جس کے بعد یہ واحد ٹیم بن گئی جس نے کرکٹ میں گولڈ میڈل جیتا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
