آئی ایم ڈی نے دہلی میں بارش کی پیش گوئی کی۔
دہلی-این سی آر میں سرد لہر کے درمیان پیر (13 جنوری) کے روز دھوپ کی وجہ سے لوگوں کو کچھ راحت ملی۔ زیادہ سے زیادہ درجہ حرارت میں معمولی اضافہ دیکھا گیا۔ حالانکہ، شمال مغربی ہوائیں سردی میں اضافہ کرنے والی ہیں۔ ہندوستانی محکمہ موسمیات (آئی ایم ڈی) نے خبردار کیا ہے کہ مکر سنکرانتی کے بعد کم سے کم درجہ حرارت میں گراوٹ ہوگی اور دھند برقرار رہنے کا امکان ہے۔
وہیں، دہلی کے ایئر کوالٹی کے بارے بات کریں تو گزشتہ روز کے مقابلے اس میں تھوڑا اضافہ ہوا ہے اور ’خراب‘ زمرے میں برقرار ہے۔ دہلی میں منگل کی صبح بھی گہری دھند چھائی رہی۔ مرکزی آلودگی کنٹرول بورڈ (CPCB) کے مطابق، منگل کی صبح 6 بجے ایئر کوالٹی انڈیکس 247 تھا، لیکن صبح 8 بجے یہ تھوڑا سا بڑھ کر 250 ہو گیا، جو ’خراب‘ زمرے میں آتا ہے۔
دہلی میں صبح کے وقت گھنی دھند چھائی ہوئی تھی جس کی وجہ سے حد نگاہ کافی کم ہو گئی تھی۔ ہندوستان کے محکمہ موسمیات (آئی ایم ڈی) نے 15 اور 16 جنوری کو دہلی اور اس سے ملحقہ علاقوں میں ہلکی بارش کی پیش گوئی کی ہے۔ منگل سے ہی شمال مغربی ہند میں ایک نئی ویسٹرن ڈسٹربنس کی آمد متوقع ہے۔
درجہ حرارت میں معمولی اضافہ
گزشتہ 24 گھنٹوں کے دوران درجہ حرارت میں معمولی اضافہ دیکھا گیا ہے۔ دہلی میں زیادہ سے زیادہ درجہ حرارت 16-17 ڈگری سیلسیس اور کم سے کم درجہ حرارت 9-10 ڈگری سیلسیس ریکارڈ کیا گیا۔ 14 جنوری کو آسمان صاف رہنے کا امکان ہے جبکہ 15 اور 16 جنوری کو بادل چھائے رہنے کا امکان ہے۔
کچھ علاقوں میں آلودگی کی سطح زیادہ
ہوا کے معیار میں بہتری کے باوجود شہر کے کچھ علاقوں میں آلودگی کی سطح زیادہ پائی گئی۔ صبح سویرے سی پی سی بی کی ریڈنگ میں، آنند وہار میں ہوا کا معیار شدید پایا گیا، جہاں AQI 356 تھا، جبکہ وزیر پور میں 321 ریکارڈ کیا گیا۔
اشوک وہار، شادی پور اور روہنی سمیت کئی مقامات پر اے کیو آئی کی سطح 300 کے قریب ریکارڈ کی گئی۔ جبکہ آر کے پورم، آئی ٹی او اور نریلا جیسے علاقوں میں اے کیو آئی 254 اور 291 کے درمیان رہا۔
آلودگی کی سطح میں اتار چڑھاؤ جاری
بتا دیں کہ201 اور 300 کے درمیان AQI کو ’خراب‘، 301 اور 400 کے درمیان ’انتہائی خراب‘، اور 400 سے زیادہ ’شدید: سمجھا جاتا ہے۔12 جنوری کو ہونے والی حالیہ رات کی بارش سے دہلی-این سی آر میں ہوا کا معیار بہتر ہوا تھا، جس کے بعد کمیشن فار ایئر کوالٹی مینجمنٹ (CAQM) نے GRAP اسٹیج -3 پابندیوں کو ہٹا دیا تھا۔ حالانکہ، شہر الرٹ پر ہے کیونکہ موسم اور آلودگی کی سطح میں اتار چڑھاؤ جاری ہے۔
بھارت ایکسپریس۔
