بہار میں سنسنی خیز واردات۔
بہار شریف: بہار کے نالندہ ضلع میں تقریباً ایک ماہ قبل ایک جوڑے کے وحشیانہ قتل کے معاملے کا منگل کے روز پولیس نے انکشاف کیا۔ پولیس نے ملزم وپن کمار کو گرفتار کرلیا۔ وہ مقتول جوڑے کا بیٹا ہے۔ پولیس کا دعویٰ ہے کہ ملزم نے اپنے ماں باپ کو موبائل گیمز اور جوئے کی لت کی وجہ سے قتل کیا تھا۔
راجگیر کے ڈی ایس پی سنیل کمار نے منگل کے روز بتایا کہ وپن کمار کو موبائل گیمز کے ذریعے جوا کھیلنے کی عادت تھی۔ اس نے گاؤں والوں سے قرض لیا تھا اور جوئے میں دو سے تین لاکھ روپے ہارے تھے۔ ماں باپ اپنے بیٹے کی گندی لت سے پریشان تھے اور اس کی عادت پر اعتراض کرتے تھے۔ اس مخالفت کی وجہ سے اس کا اپنا بیٹا اس کی جان کا دشمن بن گیا۔
انہوں نے کہا کہ 17 نومبر کی رات وپن نے غصے میں آکر منصوبہ بند طریقے سے قتل کا منصوبہ بنایا اور اس واردات کو انجام دیا۔ اس کے بعد ملزم نے خود کو بچانے کے لیے لاشوں کو جلا دیا اور کرنٹ لگنے سے موت کی جھوٹی کہانی رچ دی۔ چھبیلا پور تھانہ علاقہ کے ڈوگی گاؤں میں 18 نومبر کی صبح جب جوڑے کی موت کی خبر پھیلی تو لوگ حیران رہ گئے۔
ڈی ایس پی نے کہا کہ پولیس کو تفتیش کے دوران کچھ شواہد ملے اور پھر ملزم سے پوچھ گچھ کی گئی۔ بیان اور تکنیکی شواہد کی بنیاد پر پولیس کے شک کی تصدیق ہو گئی۔ تفتیش کے دوران ملزم نے اپنے جرم کا اعتراف کر لیا۔
بتایا جاتا ہے کہ ملزم وپن کمار بی فارما کا طالب علم ہے اور اپنے ماں باپ کا اکلوتا بیٹا تھا۔ پڑھائی کے بہانے ماں باپ سے پیسے لیتا تھا اور موبائل گیمز اور جوا کھیلتا تھا۔ اس عادت نے اسے قاتل بنا دیا۔ ملزم کو عدالتی تحویل میں بھیج دیا گیا ہے۔
بھارت ایکسپریس۔
