اترپردیش بلدیاتی انتخابات میں شکست فاش کا سامنا کرنے کے بعد بی ایس پی سپریمو مایاوتی مسلسل پارٹی کا جائزہ لے رہی ہیں ساتھ ہی پارٹی کارکنوں کو ہدایت بھی دے رہی ہیں تاکہ 2024 میں ہونے والے لوک سبھا انتخابات سے پہلے پارٹی کوتوانائی پہنچائی جاسکے اور کارکنان میں جوش پیدا کرسکے۔
اطلاع کے مطابق عام انتخابات 2024 کیلئے بی ایس پی نے خاص حکمت عملی پر کام کرنا شروع کردیا ہے۔ بتادیں کہ بی ایس پی نے پہلے ہی یوپی میں لوک سبھا کی سبھی 80 سیٹوں پراکیلے انتخابات لڑنے کا من بنا لیا تھا، لیکن بلدیاتی انتخابات میں ملی ہارنے بی ایس پی کو اب نئے سرے سے غور وخوض کرنے پر مجبور کردیا ہے۔ پارٹی ذرائع کے مطابق بی ایس پی سپریمو مایاوتی منڈل کی سطح پر کام کررہی ہیں اور نئے احکامات بھی جاری کررہی ہیں۔ بی ایس پی سپریمو مایا وتی اب ہر ضلع میں نوجوان لیڈران اور کارکنان کو ترجیح دے رہی ہیں۔
نوجوانوں کو پارٹی میں دی جائے گی ترجیح
ذرائع کے مطابق مایاوتی بلدیاتی انتخابات کے بعد پوری طرح ایکشن موڈ میں نظر آرہی ہیں۔ پارٹی میں نئی جان پھونکنے کیلئے لگاتار میٹنگ کررہی ہیں۔ اس کے علاوہ مایاوتی پارٹی کارکنوں اور عہدیداروں کے ساتھ مذاکرات بھی کررہی ہیں۔ بی ایس پی اپنی تیاریوں کو مکمل کرنے کے ساتھ ہی تنظیم میں ردوبدل بھی کرنے جارہی ہیں۔ پارٹی چارمنڈل کی جگہ اب 3-3 ڈویژن پر ایک کوآرڈینیٹ کو مقرر کرےگی۔اس بیچ پارٹی نے شمس الدین رائن کو کانپور، میرٹھ اور سہارنپور ڈویژن کی ذمہ داری سونپ دی ہے۔ وہیں جانکاری کے مطابق شمس الدین کے پاس اتراکھنڈ کی ذمہ داری بھی رہے گی۔ دوسری جانب منقاد علی کو آگرہ، علی گڑھ اور مرادآباد ڈویژن کی ذمہ داری سونپی گئی ہے۔
واضح رہے کہ مایاوتی نے پارٹی دفتر میں ایک میٹنگ منعقد کی تھی جس میں سبھی اضلاع کے صدور اور ڈویژن کو اپنا پیغام دیا تھا۔ انہوں نے میٹنگ کے دوران الگ الگ علاقوں میں پارٹی کی کارکردگی پر غور و خوض بھی کیا۔ اس کے بعد سے ہی پارٹی میں نئی تبدیلی لانے کی بات سامنے آرہی ہے۔ تاہم بی ایس پی سپریمو مایاوتی کی پوری طرح لوک سبھا کی سبھی سیٹوں پر نظر ہے اور پارٹی میں نئی جان پھونکنے کی کوشش میں لگ گئی ہیں۔ فی الحال دیکھنا یہ ہے کہ بلدیاتی انتخابات میں ایک بھی سیٹ نہ حاصل کرنے والی بی ایس پی لوک سبھا انتخابات میں کیا کرپاتی ہے۔
