حیدرآباد لوک سبھا سیٹ سے بی جے پی کی امیدوار مادھوی لتا کو وزارت داخلہ نے وائی پلس زمرہ کی سیکورٹی فراہم کی ہے۔ مادھوی لتا حیدرآباد سے اسد الدین اویسی کے خلاف الیکشن لڑ رہی ہیں۔ وزارت داخلہ نے آئی بی کی دھمکی کی رپورٹ کی بنیاد پر مادھوی لتا کو سیکورٹی دی ہے۔
وائی پلس کیٹیگری میں مسلح پولیس کے 11 کمانڈوز تعینات ہیں، جن میں سے 5 پولیس اہلکار وی آئی پی کے گھروں اور ان کے ارد گرد ان کی سیکیورٹی کے لیے رہتے ہیں۔ اس کے علاوہ 6 پی ایس او متعلقہ وی آئی پی کو تین شفٹوں میں سیکیورٹی فراہم کرتے ہیں۔
مادھوی لتا کون ہیں؟
مادھوی لتا حال ہی میں اس وقت سرخیوں میں آئیں جب بی جے پی نے انہیں حیدرآباد سے اسد الدین اویسی کے خلاف اپنا امیدوار بنایا۔ انہیں بنیاد پرست ہندوتوا کا چہرہ سمجھا جاتا ہے، اور یہاں تک کہ وزیر اعظم نریندر مودی نے بھی ان کی تعریف کی ہے۔
حیدرآباد سیٹ کی تاریخ
حیدرآباد کو اے آئی ایم آئی ایم کا گڑھ سمجھا جاتا ہے جہاں 1984 سے اویسی خاندان کا کنٹرول ہے۔ اسد الدین اویسی کے والد سلطان صلاح الدین نے پہلی بار 1984 میں اس سیٹ سے لوک سبھا الیکشن جیتا تھا۔ وہ اس سیٹ سے 20 سال تک ایم پی رہے۔ اس کے بعد اس سیٹ پر اسد الدین اویسی چھائے ہوئے ہیں ، جن سے مادھوی لتا اس لوک سبھا الیکشن میں مقابلہ کریں گی۔
کہا جاتا ہے کہ اسد الدین اویسی کو ان کے گڑھ سے ہرانا مشکل ہے اس لیے بی جے پی کو اس بار ہندوتوا کا چہرہ مل گیا ہے۔ مادھوی لتھا پیشے کے اعتبار سے ڈاکٹر ہیں اور ونرینچی کے نام سے ایک ہسپتال بھی چلاتی ہیں۔ وہ سوشل میڈیا پر اپنے ہندوتوا حامی موقف کی وجہ سے خبروں میں رہتی ہیں۔ مادھوی لتا ایک بھرتناٹیم ڈانسر بھی ہیں۔
بھارت ایکسپریس۔
