مرکزی وزیر ہردیپ سنگھ پوری نے پیر کے روز کہا کہ وزیر اعظم نریندر مودی کی حکومت کے گزشتہ 11 برسوں میں ہندوستان نے غیر معمولی ترقی کی ہے، غربت کی سطح میں نمایاں کمی آئی ہے اور معیشت تیزی سے ترقی کر رہی ہے۔ انھوں نے مزید کہا کہ عالمی بینک کے اعداد و شمار کے مطابق اس درمیان 27 کروڑ 90 لاکھ افراد غربت سے باہر نکلے ہیں اور غربت کی شرح 24 فیصد سے کم ہو کر 5.3 فیصد رہ گئی ہے۔
ہردیپ سنگھ پوری نے حکومت کی کامیابیوں کو کیا اجاگر
ہردیپ سنگھ پوری نے مودی حکومت کی کامیابیوں پر روشنی ڈالتے ہوئے یہ بھی کہا کہ اس دوران ہندوستان کی معیشت کا حجم 2 ٹریلین ڈالر سے بڑھ کر 4.3 ٹریلین ڈالر ہو گیا ہے۔ اے این آئی سے بات کرتے ہوئے ہردیپ سنگھ پوری نے کہا کہ’’اگر آپ گزشتہ 11 سالوں میں ترقی کے میدان میں کیے گئے کام کو دیکھیں، تو اعداد و شمار حیران کن ہیں۔ ان کا موازنہ اگر آزادی کے بعد کے ادوار سے کیا جائے تو یہ ایک انقلابی تبدیلی دکھاتے ہیں۔‘‘
انھوں نے مزید کہا ’’لیکن سب سے حیران کن بات یہ ہے کہ عالمی بینک کے مطابق 27 کروڑ 90 لاکھ لوگ غربت سے باہر آ چکے ہیں۔ غربت کی شرح 24 فیصد سے کم ہو کر 5.3 فیصد پر آ گئی ہے، جو کہ انتہائی قابلِ ذکر ہے۔ وہیں معیشت کا حجم دوگنا ہو کر 2 ٹریلین ڈالر سے 4.3 ٹریلین ڈالر ہو گیا ہے۔ ہم ان ممالک سے کہیں زیادہ تیز رفتار ترقی کر رہے ہیں، جن سے ہمارا مقابلہ ہے۔‘‘
جے پی نڈا نے بھی گنائیں حکومت کی کامیابیاں
دریں اثنا وزیر اعظم نریندر مودی کی قیادت میں این ڈی اے حکومت کے 11 سال مکمل ہونے پر بی جے پی صدر اور مرکزی وزیر جے پی نڈا نے بھی حکومت کی مختلف کامیابیوں کو اجاگر کیا۔ ایک پریس کانفرنس سے خطاب کرتے ہوئے نڈا نے کہا ’’ہم وزیر اعظم مودی کی قیادت میں 11 سال مکمل کر رہے ہیں۔ ان 11 سالوں کو ایک پریس کانفرنس میں سمیٹنا مشکل ہے۔ وزیر اعظم مودی کی قیادت میں جو کام ہوئے وہ سنہرے الفاظ میں لکھے جائیں گے کیونکہ وہ غیر معمولی اور انوکھے ہیں۔ وزیر اعظم مودی نے ملک کی سیاست اور سیاسی ثقافت کو بدل دیا ہے۔‘‘
مرکزی حکومت نے جاری کی ای-بُک
بی جے پی صدر نے مودی حکومت کی کوششوں کو سراہتے ہوئے کہا کہ گزشتہ 11 سالوں میں ایک ترقی یافتہ اور خودانحصار بھارت کی مضبوط بنیاد رکھی گئی ہے۔ واضح رہے کہ نریندر مودی نے پہلی مرتبہ 26 مئی 2014 کو بھارت کے وزیر اعظم کے طور پر حلف لیا تھا اور وہ مسلسل تیسری مدت کے لیے خدمات انجام دے رہے ہیں۔ اس موقع پر مرکزی حکومت نے ایک جامع ای-کتاب بھی جاری کی ہے، جس میں گزشتہ 11 برسوں میں مختلف شعبوں میں حاصل کردہ کامیابیوں کی تفصیل دی گئی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
