Rahul Gandhi Comment on Haryana violence بی جے پی اور میڈیا نے پورے ملک میں نفرت کا مٹی تیل پھیلا رکھا ہے،صرف محبت ہی اس آگ کو بجھا سکتی ہے:راہل گاندھی

منی پور فسادات کے بعد ہریانہ میں بھی فرقہ وارانہ فساد نے کئی لوگوں کی جان لے لی ہے۔ حالات کو قابو میں کرنے کیلئے ہریانہ کے کئی علاقوں میں دفعہ 144 نافذ کردیا گیا ہے ۔اسکول وکالج کو بندکرنے کے ساتھ ہی انٹرنیٹ کی خدمات معطل کردی گئی ہے۔ فریدآباد ،گروگرام اور نوح کے علاقوں میں حالات پر قابو پانے کیلئے اس قسم کے احتیاطی اقدامات کئے گئے ہیں ۔ اب تک اس معاملے میں 16 ایف آئی آر درج کی جاچکی ہیں اور تقریباً 60 لوگ زخمی ہوئے ہیں، جن میں سے تین کی حالت سنگین ہے۔ ضلع میں نیم فوجی دستوں کی 20 کمپنیاں اورہریانہ پولیس فورس کی بھی 20 کمپنیاں تعینات کردی گئی ہیں۔

ہریانہ فساد پر سیاست بھی تیز ہوگئی ہے اور سیاسی بیان بازی بھی۔ اس بیچ کانگریس کے سابق صدر راہل گاندھی نے تبصرہ کرتے ہوئے ایکس(ٹوئیٹر) پر لکھا ہے کہ  بی جے پی ، میڈیا اور ان کے ساتھ کھڑی ہوئی طاقتوں نے پورے ملک میں نفرت کا مٹی تیل(کیروسن) پھیلا دیا ہے۔ صرف محبت ہی ملک میں لگی اس آگ کو بجھا سکتی ہے۔

भाजपा, मीडिया और उनके साथ खड़ी ताक़तों ने पूरे देश में नफ़रत का केरोसिन फैला दिया है।

सिर्फ़ मोहब्बत ही देश में लगी इस आग को बुझा सकती है।

— Rahul Gandhi (@RahulGandhi) August 1, 2023

واضح رہے کہ  ہریانہ کے نوح ضلع میں بجرنگ دل کی یاترا کے بعد ہوئی ہنگامہ آرائی اورفرقہ وارانہ تصادم میں اب تک پانچ افراد جاں بحق ہوگئے ہیں۔ اس حادثہ کے بعد نوح ضلع کے میوات سمیت کئی علاقوں میں کشیدگی کا ماحول ہے، جس کے سبب گروگرام سمیت تشدد متاثرہ علاقوں میں کرفیونافذ کیا گیا ہے اورانٹرنیٹ پر پابندی ہے۔ اس کے علاوہ تمام اسکولوں کو بند کرنے کا حکم بھی جاری ہوا ہے۔ نوح میں ہونے والی تشدد کی آگ گروگرام کے فریدآباد تک پہنچ گئی۔ گروگرام کے سیکٹر-57 میں بھیڑنے ایک مسجد میں آگ لگا دی۔ بتایا جاتا ہے کہ اس ہنگامہ آرائی میں مسجد کے امام ہلاک ہوگئے ہیں۔

یہ بھی پڑھیں:نوح سمیت ہریانہ کے کئی علاقوں میں زبردست کشیدگی، مسجد کے امام سمیت اب تک 5 افراد ہلاک، حالات معمول پر لانے کی کوشش

نوح میں تشدد کے بعد گروگرام کے سیکٹر-57 میں بھیڑکے حملے میں ایک شخص کی موت ہوگئی۔ بتایا جاتا ہے کہ ہنگامہ آرائی کرنے والے شرپسندوں نے انجمن مسجد میں آگ لگا دی،  جس میں مسجد کے امام کے جاں بحق ہونے کی اطلاع ہے۔ اس دوران پورے علاقے میں دفعہ 144 نافذ کر دی گئی ہے۔ اس حادثہ سے متعلق پولیس کے ایک افسرنے بتایا کہ بھیڑنے گولیاں چلائیں، جس کے سبب دو لوگ زخمی ہوگئے اوران میں سے ایک نے علاج کے دوران دم توڑ دیا۔ مہلوک کی پہچان بہارکے باشندہ سعد کے طورپرہوئی ہے۔

بھارت ایکسپریس۔