تیانجن میں جاری شنگھائی تعاون تنظیم (SCO) کے سربراہی اجلاس کے بعد وزیر اعظم نریندر مودی آج روسی صدر ولادیمیر پوتن کے ساتھ دو طرفہ ملاقات کریں گے۔ یہ اعلان اتوار کو بھارتی خارجہ سیکریٹری وکرم مسری نے ایک خصوصی بریفنگ کے دوران کیا۔ وکرم مسری کے مطابق وزیر اعظم پہلے SCO اجلاس کے عمومی اجلاس سے خطاب کریں گے، جہاں وہ علاقائی تعاون کے فروغ میں بھارت کے نقطہ نظر کو پیش کریں گے۔ اس کے بعد وہ صدر پوتن سے دو طرفہ ملاقات کریں گے اور پھر وطن واپس روانہ ہوں گے۔
اس سے قبل وزیر اعظم مودی نے چینی صدر شی جن پنگ سے بھی ملاقات کی۔ یہ ملاقات 2024 کے قازان میں ہونے والے BRICS اجلاس کے بعد ان دونوں رہنماؤں کی پہلی ملاقات تھی۔ وزیر اعظم مودی نے بعد ازاں صدر شی کی جانب سے دی گئی استقبالیہ تقریب میں شرکت کی، جو تیانجن میجیانگ انٹرنیشنل کنونشن اینڈ ایگزیبیشن سینٹر میں منعقد ہوئی۔ اس موقع پر چینی صدر شی جن پنگ اور ان کی اہلیہ نے وزیر اعظم کا پرتپاک استقبال کیا، جس کے بعد پی ایم مودی دیگر عالمی رہنماؤں کے ساتھ یادگاری گروپ فوٹو میں شامل ہوئے۔
روسی صدر پوتن بھی اپنی اعلیٰ سطحی ٹیم کے ہمراہ اس استقبالیہ میں شریک ہوئے، جن میں وزیر خارجہ سرگئی لاروف، نائب وزیر اعظم الیکسی اوورچک، کریملن کے مشیر یوری اوشاکوف اور صدارتی ترجمان دمتری پیسکوف شامل تھے۔ اس دوران وزیر اعظم مودی نے چینی صدر شی جن پنگ کو 2026 میں بھارت میں منعقد ہونے والے BRICS اجلاس میں شرکت کی دعوت بھی دی، جسے شی جن پنگ نے قبول کرتے ہوئے بھارت کی صدارت کی حمایت کا وعدہ کیا۔ اس کے علاوہ پی ایم مودی نے میانمار کے قائم مقام صدر اور فوجی سربراہ جنرل من آنگ ہیلنگ سے بھی ملاقات کی۔ دونوں رہنماؤں نے دوطرفہ تعلقات، ترقیاتی شراکت داری، دفاع و سلامتی، سرحدی نظم و نسق اور تجارت جیسے امور پر تبادلہ خیال کیا۔ واضح رہے کہ بھارت اس وقت شنگھائی تعاون تنظیم اور BRICS جیسے پلیٹ فارمز پر اہم کردار ادا کر رہا ہے، اور علاقائی تعاون کے فروغ میں اس کی کوششوں کو بین الاقوامی سطح پر سراہا جا رہا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
