بہار میں اسمبلی انتخابات کے پیشِ نظر سیاسی سرگرمیاں اپنے عروج پر پہنچ چکی ہیں۔ مختلف سیاسی جماعتوں نے انتخابی مہم تیز کر دی ہے اور سینئر لیڈران بھی زور و شور سے انتخابی مہم میں حصہ لے رہے ہیں۔ اسی سلسلے میں وزیرِ اعظم نریندر مودی اور مرکزی وزیر داخلہ امت شاہ بہار میں دوروں اور جلسوں کا سلسلہ شروع کر رہے ہیں۔
وزیرِ اعظم مودی اپنے انتخابی دورے کا آغاز 24 اکتوبر کو ضلع سمستی پور سے کریں گے، جہاں وہ کَرپوری گاؤں میں بھارت رتن اور عوامی رہنما کَرپوری ٹھاکر کی رہائش گاہ پر جا کر انہیں خراج عقیدت پیش کریں گے۔ اسی روز وہ سمستی پور اور بیگوسرائے میں دو بڑے عوامی جلسوں سے خطاب بھی کریں گے۔ اس کے بعد ان کے انتخابی جلسے 30 اکتوبر کو مظفر پور اور چھپرا میں ہوں گے، جبکہ آئندہ جلسے 2، 3، 6 اور 7 نومبر کو طے ہیں۔
امت شاہ کی 24 اکتوبر کو سیوان اور بکسر میں ریلی
دوسری جانب امت شاہ 23 اکتوبر کو بہار جائیں گے اور 24 اکتوبر کو وہ سیوان اور بکسر میں عوامی جلسوں سے خطاب کریں گے۔ اس کے بعد 25 اکتوبر کو ان کی ریلیاں نالندہ، مونگیر اور کھگڑیا میں منعقد ہوں گی۔ دونوں مرکزی لیڈران این ڈی اے (نیشنل ڈیموکریٹک الائنس) کے امیدواروں کے حق میں مہم چلا رہے ہیں اور عوام سے اپیل کریں گے کہ وہ این ڈی اے کے امیدواروں کو ووٹ دے کر کامیاب بنائیں۔
یاد رہے کہ بہار میں اسمبلی انتخابات دو مراحل میں منعقد ہوں گے۔ پہلا مرحلہ 6 نومبر اور دوسرا مرحلہ 11 نومبر کو ہوگا، جبکہ ووٹوں کی گنتی 14 نومبر کو کی جائے گی۔ ادھر این ڈی اے میں سیٹوں کی تقسیم کا فارمولا طے پا چکا ہے، لیکن انڈیا مہاگٹھ بندھن (اپوزیشن اتحاد) میں ابھی تک سیٹ شیئرنگ پر اتفاق نہیں ہو سکا ہے۔ اتحاد کے کئی اتحادی جماعتوں نے ایک ہی حلقے میں ایک دوسرے کے خلاف امیدوار میدان میں اتار دیے ہیں، جس سے اتحاد کے اندرونی اختلافات بھی واضح ہو رہے ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
