وزیر اعلیٰ این بیرن سنگھ
نئی دہلی: منی پور میں این بیرن سنگھ کی قیادت والی حکومت کو اتوار کے روز بڑا جھٹکا لگا۔ ریاست میں امن و امان کی بگڑتی ہوئی صورتحال پر اپنی گہری تشویش کا اظہار کرتے ہوئے نیشنل پیپلز پارٹی (این پی پی) نے حکومت سے حمایت واپس لینے کا اعلان کیا۔ این پی پی کے قومی صدر کونراڈ کے سنگما نے بی جے پی کے قومی صدر جے پی نڈا کو خط لکھ کر منی پور حکومت کے تئیں اپنی مایوسی کا اظہار کیا اور فوری اثر سے حمایت واپس لینے کی اطلاع دی۔
سنگما نے خط میں لکھا، ’’نیشنل پیپلز پارٹی ریاست منی پور میں امن و امان کی موجودہ صورتحال پر اپنی گہری تشویش کا اظہار کرنا چاہتی ہے۔ پچھلے کچھ دنوں میں، ہم نے صورتحال کو مزید بگڑتے دیکھا ہے، جس میں کئی اور معصوم جانیں ضائع ہوئی ہیں۔ اور ریاست کے لوگ بے پناہ مصائب سے گزر رہے ہیں ہم شدت سے محسوس کرتے ہیں کہ برین سنگھ کی قیادت میں منی پور حکومت بحران کو حل کرنے اور حالات کو معمول پر لانے میں مکمل طور پر ناکام رہی ہے۔
خط میں کہا گیا ہے کہ ’’موجودہ صورتحال پر غور کرتے ہوئے، نیشنل پیپلز پارٹی نے ریاست منی پور میں بیرن سنگھ کی قیادت والی حکومت سے اپنی حمایت فوری طور پر واپس لینے کا فیصلہ کیا ہے۔‘‘
قابل ذکر ہے کہ منی پور میں حالات بہتر نہیں ہو رہے ہیں۔ صورتحال ایک بار پھر سنگین ہوتی دکھائی دے رہی ہے۔ حال ہی میں مظاہرین نے وزیر اعلیٰ این برین سنگھ کے خلاف احتجاج کیا۔ بیرن سنگھ کے داماد اور بی جے پی ایم ایل اے آر کے ایمو کے گھر پر حملہ کیا گیا۔ اس کے علاوہ مظاہرین نے امپھال مغربی ضلع میں شہری ترقی کے وزیر وائی کھیم چند، وزیر صحت ساپم رنجن کے گھروں کو بھی نشانہ بنایا۔
حمایت واپس لینے کے بعد حکومت پر کوئی اثر نہیں
60 رکنی منی پور اسمبلی میں بی جے پی کے 32 اور این پی پی کے سات ایم ایل اے ہیں۔ اس لیے حمایت کی اس واپسی کا حکومت کے استحکام پر کوئی اثر نہیں پڑے گا۔
بھارت ایکسپریس۔
