نئی دہلی: جمعیۃ علماء ہند نے اپنی اصولی پالیسی کی روشنی میں جمعیۃ علماء آسام کے صدر، آل انڈیا یونائیٹیڈ ڈیموکریٹک فرنٹ (اے آئی یوڈی ایف) کے قومی صدراور سابق رکن پارلیمنٹ مولانا بدرالدین اجمل قاسمی سے حالیہ انتخابی مہم کے دوران ایک فرقہ پرست سیاسی جماعت کے ساتھ مبینہ اتحاد اوراعلانیہ حمایت کے سلسلے میں 24 گھنٹوں کے اندرتحریری وضاحت طلب کی ہے۔ جمعیۃ علماء ہند کے ناظم عمومی مولانا محمد حکیم الدین قاسمی کی جانب سے جاری کرہ نوٹس میں کہا گیا ہے کہ جمعیۃ کے اکابررحمہم اللہ نے آزادی کے فوری بعد مجلس عاملہ کے تاریخی اجلاس منعقدہ 17۔ 18 اگست 1951، زیرصدارت شیخ الاسلام مولانا سیدحسین احمد مدنیؒ، انتخابات اورووٹ سے متعلق ایک واضح، اصولی اورغیرمبہم پالیسی منظورفرمائی تھی، جس کی توثیق بعد کے متعدد اجلاسوں میں بھی کی جاتی رہی ہے۔
جمعیۃ علماء ہند نے دی ہے یہ دلیل
جمعیۃ علماء ہند نے اپنی پالیسی میں طے کیا تھا کہ جمعیۃ کے اراکین اورذمہ داران کے لیے یہ لازم ہے کہ وہ کسی بھی فرقہ پرست جماعت سے کسی قسم کی وابستگی نہ رکھیں۔ اس کے برعکس انہیں صرف ایسی جماعتوں اورقوتوں کے ساتھ رہنے کی ہدایت دی گئی تھی، جوقومی یکجہتی، آئینی اقدار، جمہوری اصولوں اورتکثیری معاشرتی ڈھانچے کی بقا کی حامی ہوں۔
مولانا بدرالدین اجمل پرلگا یہ بڑا الزام
اس کے برعکس حالیہ انتخابی مہم میں مولانا بدرالدین اجمل قاسمی نے ایک فرقہ پرست پارٹی کے ساتھ سیاسی اتحاد اورہم نوائی کی ہے اوراس کی اعلانیہ حمایت حاصل کی ہے جوجمعیۃ علماء ہند کی پالیسی اوراس کے بنیادی اصولوں سے صریح انحراف ہے۔ اس پس منظرمیں ان سے کہا گیا ہے کہ وہ 24 گھنٹوں کے اندراپنا تحریری جواب مرکزی دفترکوارسال کریں اوریہ واضح کریں کہ مذکورہ طرزِعمل کن مقاصد، حالات اوربنیادوں پراختیارکیا گیا۔
سابق رکن پارلیمنٹ کو دینا ہوگا اطمینان بخش جواب
سابق رکن پارلیمنٹ مولانا بدرالدین اجمل کو بھیجے گئے نوٹس میں یہ بھی کہا گیا ہے کہ اگرموصولہ جواب اطمینان بخش نہ ہوا توتنظیمی ضابطے اوردستورکی روشنی میں مناسب کارروائی عمل میں لائی جائے گی۔ جمعیۃ علماء ہند نے اپنے بیان میں اس عزم کا اعادہ کیا ہے کہ وہ اپنے اکابرکے طے کردہ اصولی موقف، آئینی اقدارکے تحفظ اورفرقہ وارانہ سیاست کی مخالفت کے موقف پرپوری مضبوطی کے ساتھ قائم ہے ۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
