لوک سبھا اسپیکر اوم برلا نے جمعہ کے روز آل پارٹی میٹنگ طلب کی، جب ایوان زیریں میں اپوزیشن کے احتجاج اور نعرے بازی کے باعث کارروائی ملتوی کرنی پڑی۔ اسپیکر نے ارکان پر زور دیا کہ وہ پارلیمان کی کارروائی کو مؤثر انداز میں چلنے دیں۔ اس میٹنگ میں ’’آپریشن سندور‘‘ کے حوالے سے 28 جولائی کو ہونے والی 16 گھنٹے کی مجوزہ بحث پر بھی تبادلۂ خیال ہوا۔
اس سے قبل آج صبح راجیہ سبھا اور لوک سبھا دونوں ایوانوں کی کارروائی ملتوی کر دی گئی۔ راجیہ سبھا کا اجلاس اب پیر کو صبح 11 بجے جب کہ لوک سبھا دوپہر 2 بجے دوبارہ ہوگا۔ اپوزیشن کی جانب سے بہار میں جاری ایس آئی آر پر بحث کا مطالبہ زور پکڑ گیا ہے، جو الیکشن کمیشن کی نگرانی میں آئندہ اسمبلی انتخابات کے پیش نظر کیا جا رہا ہے۔ اسپیکر اوم برلا نے کہا کہ سوالات کا وقت اور ایوان میں بحث و مباحثہ جمہوریت کا حصہ ہیں اور انھوں نے اپیل کی کہ تمام ارکان قواعد کے مطابق اختلاف رائے کا اظہار کریں۔
احتجاج کا بھی ایک طریقہ ہوتا ہے: اوم برلا
اسپیکر اوم برلا نے مزید کہا کہ ’’احتجاج کا بھی ایک طریقہ ہوتا ہے۔ اگر آپ پارلیمنٹ کو نہیں چلانا چاہتے تو کارروائی ملتوی کر دی جائے گی۔‘‘ وہیں کانگریس ایم پی مانکیم ٹیگور نے ایوان میں ’’بہار میں 52 لاکھ ووٹروں کی ممکنہ بے دخلی‘‘ پر بحث کے لیے التوا کی تحریک پیش کی اور اسے آئین اور جمہوریت پر ’’منظم حملہ‘‘ قرار دیا۔
اس سے قبل اپوزیشن اتحاد کے اراکین پارلیمنٹ نے بہار میں ووٹر لسٹ کی نظرثانی کے خلاف مسلسل پانچویں روز پارلیمنٹ کے مکر دروازے پر احتجاج جاری رکھا۔ کانگریس صدر ملکارجن کھڑگے، راہل گاندھی اور پرینکا گاندھی سمیت کئی سینیئر رہنماؤں نے اس مظاہرے میں شرکت کی۔ واضح رہے کہ ایوان کی کارروائی 21 جولائی سے مسلسل رکاوٹوں کا شکار ہے اور پچھلے چار دنوں میں بارہا ملتوی کی جا چکی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
