نئی دہلی: ہندوستانی خواتین ہاکی ٹیم نے شاندار کارکردگی کا مظاہرہ کرتے ہوئے ایشین گیمز 2026 میں تاریخی گولڈ میڈل جیت لیا۔ ہندوستانی ٹیم نے فائنل مقابلے میں دفاعی چیمپئن چین کو ایک-صفر سے شکست دی۔ وزیر اعظم نریندر مودی نے اس اہم کامیابی پر ہندوستان کی بیٹیوں کی بھرپور ستائش کی ہے۔ وزیراعظم نریندر مودی نے پی ایم او کے سوشل میڈیا پلیٹ فارم ’ایکس‘ پر لکھا، ’’بھارتی ہاکی کے لیے ایک بہت ہی خاص لمحہ۔ ہندوستان کے لوگ خواتین ہاکی ٹیم کی کامیابی کا جشن منا رہے ہیں، جس نے ایشین گیمز میں شاندار گولڈ میڈل جیتا ہے اور وہ بھی چار دہائیوں سے زیادہ عرصے کے بعد۔ یہ بہترین ہنر اور ٹیم ورک کا نتیجہ ہے۔ ان کا جذبہ بھی بہت متاثر کن ہے۔ ٹیم کو ان کی مستقبل کی کوششوں کے لیے میری نیک خواہشات۔ امید ہے کہ یہ کامیابی ملک بھر میں ہاکی کی مقبولیت بڑھانے میں اپنا کردار ادا کرے گی۔‘‘
کرن رجیجو نے بھی ٹیم کو دی مبارکباد
مرکزی وزیر برائے پارلیمانی امور اور اقلیتی امور کرن رجیجو نے بھی ہندوستانی خواتین ٹیم کو مبارکباد دی۔ انہوں نے ’ایکس‘ پر لکھا، ’’ہندوستان کے لیے گولڈ کی کامیابی۔ 44 سال بعد ہندوستانی خواتین ہاکی کا گولڈ میڈل جیتنے پر مبارکباد۔ ہنر، پختہ عزم اور ٹیم ورک کا شاندار مظاہرہ۔ بہت خوب، چیمپئنز۔‘‘
ہماری ’ناری شکتی‘ نے ایشیا جیت لیا
مرکزی وزیر کھیل منسکھ مانڈویہ نے بھی ہندوستانی خواتین ٹیم کی کارکردگی کو سراہا۔ انہوں نے ’ایکس‘ پر لکھا، ’’ہندوستانی کھیلوں کے لیے ایک تاریخی دن۔ ہماری شاندار ’ناری شکتی‘ نے ایشیا کو فتح کر لیا ہے۔ ایشین گیمز 2026 میں موجودہ چیمپئن چین کو 1-0 سے شکست دے کر گولڈ میڈل جیتنے پر ہندوستانی خواتین ہاکی ٹیم کو بہت بہت مبارکباد۔‘‘ انہوں نے مزید کہا کہ 1982 کے بعد 44 سال کے طویل انتظار کو ختم کرتے ہوئے ہندوستان کی بیٹیوں نے تاریخ رقم کردی ہے۔ اس شاندار کامیابی کے ساتھ لاس اینجلس اولمپکس 2028 کے لیے ہندوستان نے براہ راست کوالیفائی بھی کرلیا ہے۔ انہوں نے کہا کہ پورا ملک اس شاندار واپسی کا جشن منا رہا ہے اور ٹیم نے ہندوستان کا وقار بلند کیا ہے۔
خواتین ہاکی کے لیے سنہرا باب
مرکزی وزیر دفاع راج ناتھ سنگھ نے بھی ہندوستانی خواتین ٹیم کو مبارکباد پیش کی۔ انہوں نے ’ایکس‘ پر لکھا، ’’ہندوستانی خواتین ہاکی کے لیے ایک سنہرا باب۔ ایشین گیمز میں گولڈ میڈل جیتنے کے لیے سخت مقابلے کے بعد حاصل ہونے والی کامیابی پر ہماری خواتین ہاکی ٹیم کو مبارکباد۔‘‘ راج ناتھ سنگھ نے لال ریمسیامی کے فیصلہ کن گول اور سویتا پونیا کے اہم پینالٹی اسٹروک بچانے کا خاص طور پر ذکر کرتے ہوئے کہا کہ یہ ٹیم کی مہارت، تحمل اور مقابلہ کرنے کے جذبے کی عکاسی کرتا ہے۔ ٹیم نے اس وقت مضبوطی کا مظاہرہ کیا جب اس کی سب سے زیادہ ضرورت تھی۔ انہوں نے کہا کہ 44 سال بعد ہندوستان نے ایشین گیمز میں خواتین ہاکی کا خطاب دوبارہ حاصل کیا ہے۔ یہ تاریخی کامیابی آنے والی نسلوں کو نئی امید اور جوش کے ساتھ ہندوستانی ہاکی کی وراثت کو آگے بڑھانے کے لیے تحریک دے گی۔ انہوں نے پوری ٹیم کے مستقبل کے سفر کے لیے نیک خواہشات کا اظہار کیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
