West Asia conflict: ’’بھارت نے حالات کو قابو میں رکھا ہے‘‘ وزیراعظم نریندر مودی نے عوام کو دلایا یقین، کانگریس پر تقسیم کی سیاست کا الزام

وزیراعظم نریندر مودی نے کہا ہے کہ مغربی ایشیا میں جاری کشیدگی کے باوجود بھارت نے حالات کو قابو میں رکھا ہے۔ انہوں نے اس کامیابی کا سہرا مؤثر خارجہ پالیسی اور عوام کے غیر متزلزل اتحاد کو دیا۔ انہوں نے کہا کہ مغربی ایشیا کی صورتحال کے اثرات پوری دنیا پر پڑ رہے ہیں، خاص طور پر ڈیزل، پٹرول اور گیس کی قیمتوں میں عالمی سطح پر اضافہ ہوا ہے، لیکن بھارت نے اس بحران کے باوجود توازن برقرار رکھا ہے۔

کانگریس پر سخت تنقید

وزیر اعظم نے کانگریس پر الزام عائد کرتے ہوئے کہا کہ جب ملک کو اتحاد اور یکجہتی کی ضرورت ہے، اس وقت اپوزیشن جماعت تقسیم پیدا کرنے والی سرگرمیوں میں مصروف ہے۔ انہوں نے کہا کہ کانگریس عوام میں خوف اور افواہیں پھیلا رہی ہے اور سیاسی فائدہ حاصل کرنے کے لیے حالات کے بگڑنے کا انتظار کر رہی ہے۔ انہوں نے طنزیہ انداز میں کہا کہ کانگریس ’’سیاسی گدھ‘‘ کی طرح صورتحال کا فائدہ اٹھانا چاہتی ہے۔ ادھر لوک سبھا میں اپوزیشن لیڈر راہل گاندھی نے کیرالہ کے شہر کوژیکوڈ میں ایک جلسے سے خطاب کرتے ہوئے خبردار کیا کہ مغربی ایشیا تنازع کے باعث ’’مالی زلزلہ‘‘ آنے والا ہے جس سے ملکی معیشت کو شدید دھچکا پہنچے گا۔ انہوں نے کہا کہ ایندھن کی قیمتوں میں اضافہ ہوگا اور مہنگائی بڑھے گی، جس کے اثرات براہ راست بھارت اور خاص طور پر کیرالہ کے عوام پر پڑیں گے۔

بڑھتی ہوئی عالمی کشیدگی

واضح رہے کہ مغربی ایشیا میں کشیدگی اس وقت بڑھ گئی جب 28 فروری کو امریکہ اور اسرائیل کے مشترکہ حملے میں ایران کے سپریم لیڈرآیت اللہ علی خامنہ ای سمیت کئی اہم شخصیات ہلاک ہوگئیں، جس کے بعد تہران نے سخت ردِعمل دیا۔ رپورٹس کے مطابق امریکہ خطے میں طویل زمینی کارروائی کے امکانات پر غور کر رہا ہے اور اضافی فوجی دستے تعینات کیے گئے ہیں، جبکہ سفارتی سطح پر جنگ کے خاتمے کے لیے کوششیں بھی جاری ہیں۔ یہ تمام صورتحال عالمی معیشت اور توانائی کے شعبے پر گہرے اثرات مرتب کر رہی ہے، جس کے تناظر میں بھارت کی حکمتِ عملی اور داخلی اتحاد کو اہم قرار دیا جا رہا ہے۔

بھارت ایکسپریس اردو۔