وطن واپسی پر عازمین حج کا دہلی حج کمیٹی کی چیئرپرسن کوثر جہاں نے والہانہ استقبال کیا۔
نئی دہلی: مقدس حج کے مکمل ہونے کے بعد عازمین حج کی وطن واپسی کے تیسرے دن آج سعودی ایرلائنزکی ساتویں پروازسے بنا محرم حج کرنے والی 53 خواتین بصحت و سلامتی وطن عزیزہندوستان واپس آگئیں۔ دہلی کے اندراگاندھی انٹرنیشنل ایئرپورٹ پردہلی اسٹیٹ حج کمیٹی کی چیئرپرسن کوثرجہاں نے بنا محرم خواتین کو پھولوں کے ہار پہنا کراستقبال کیا۔ کوثر جہاں نے بتایا کہ دہلی اسٹیٹ حج کمیٹی بنامحرم حج کا ارادہ رکھنے والی خواتین کے تعاون اوررہنمائی کے لئے ہر اعتبار سے پابند عہد ہے۔
دہلی حج کمیٹی کے ایگزیکیٹو آفیسراشفاق احمد عارفی کے مطابق آج 4فلائٹس سے کُل 1396عازمین حج کی دہلی واپسی ہوئی۔ دہلی اسٹیٹ حج کمیٹی نے دوردراز کے عازمین حج کے لئے ترکمان گیٹ پرواقع حج منزل میں حجاج کرام کے ٹھہرنے کا معقول انتظام کیا ہے اورایسے حجاج کرام کوایئرپورٹ سے حج منزل تک لانے کے لئے ایرکنڈیشنربسوں کا بھی انتظام کیا گیا ہے۔ قابل ذکرہے کہ دہلی امبارکیشن پوائنٹ سے مقدس حج پرجانے والے حاجیوں کی وطن واپسی کا یہ سلسلہ 9 جولائی تک جاری رہے گا۔
98 ہندوستانی عازمین حج کا انتقال
سعودی عرب کے مکہ مکرمہ میں حج پرگئے 98 ہندوستانی عازمین کا انتقال ہوگیا ہے۔ ہندوستان کے وزارت خارجہ نے اس کی تصدیق کی ہے۔ وزارت خارجہ نے پریس کانفرنس کرکے بتایا کہ اس سال ہندوستان سے ایک لاکھ 75 ہزارلوگ سفرحج کے لئے مکہ مکرمہ گئے ہیں۔ ان میں سے اب تک 98 افراد کی موت ہوگئی ہے۔ وزارت خارجہ نے کہا ہے کہ یہ اموات قدرتی وجوہات، پرانی بیماریوں اوربڑھاپے کی وجہ سے ہوئی ہیں۔ ان میں سے 6 افرادعرفات کے دن جبکہ 4 حادثات کے باعث جاں بحق ہوئے۔ وزارت خارجہ نے کہا ہے کہ مکہ مکرمہ میں ہمارا حج مشن کام کررہا ہے۔ عازمین سے متعلق تمام انتظامات کئے گئے ہیں۔ اس طرح کے حادثے پر ہم فوراً کارروائی کرتے ہیں۔ سبھی لوگوں کا دھیان رکھا جاتا ہے۔ مکہ مکرمہ میں شدید گرمی پڑ رہی ہے۔ وہاں، لوگ ہیٹ ویو کے بھی شکار ہورہے ہیں۔ گزشتہ سال سفرحج کے دوران ہندوستان کے 187 عازمین حج کا انتقال ہوا تھا۔ سعودی عرب میں اس سال شدید گرمی کی وجہ سے سفرحج کے دوران پوری دنیا سے آئے ہوئے 900 سے زیادہ عازمین حج کا انتقال ہوگیا ہے۔ سعودی عرب کے سرکاری ٹیلی ویژن نے بتایا کہ پیر کے روز مکہ کی مسجد حرام میں درجہ حرارت 51.8 ڈگری سیلسیس تک پہنچ گیا۔
مصر کے لوگ سب سے زیادہ ہوئے ہلاک
ایک عرب سفارت کارنے خبر رساں ایجنسی اے ایف پی کو بتایا کہ حج پرجانے والے افراد میں سب سے زیادہ مصریوں کی موت ہوئی ہے۔ مصرمیں گرمی کی وجہ سے کم ازکم 600 افراد ہلاک ہوئے، جو ایک دن پہلے 300 سے زیادہ ہے۔ متعدد ممالک کی طرف سے جاری کردہ اعدادوشمارکے مطابق، اب تک ہونے والی اموات کی کل تعداد 922 تک پہنچ گئی ہے۔ تیونس کی 70 سالہ مبروکہ بنت سلیم شوشنا ہفتہ کے روزعرفات کی زیارت کے آخری مرحلے کومکمل کرنے کے بعد سے لاپتہ ہیں، ان کے شوہرمحمد نے بدھ کے روزبتایا کہ وہ رجسٹرڈ نہیں تھیں اوران کے پاس سرکاری حج اجازت نامہ نہیں تھا۔ وہ ائیرکنڈیشنڈ سہولیات استعمال نہیں کرسکتیں، جوعازمین کوگرمی سے مہلت دیتی ہیں۔ اس نے بتایا کہ “وہ ایک بوڑھی عورت ہے۔ وہ بہت تھکی ہوئی تھی۔ وہ بھی بہت گرمی محسوس کررہی تھی اوراس کے پاس سونے کی جگہ نہیں تھی۔ انہوں نے کہا کہ میں نے اسے تمام اسپتالوں میں تلاش کیا۔ اب تک مجھے کوئی سراغ نہیں مل سکا۔‘‘
بھارت ایکسپریس۔
