عید ملن: دہلی حج کمیٹی کی چیئرپرسن کوثر جہاں کی ضیافت، کثرت میں اتحاد و بھائی چارگی کی جھلک

نئی دہلی: دہلی حج کمیٹی کی چیئرپرسن کوثر جہاں نے عید الفطر کے تہوار کے موقع پر ایک شاندار ’’عید ملن‘‘ کی تقریب کا اہتمام کیا۔ یہ تقریب 28 مارچ 2026ء کو انڈیا اسلامک کلچرل سینٹر (آئی آئی سی سی)، لودھی روڈ، نئی دہلی کے بینکوئٹ ہال میں منعقد ہوئی۔ تقریب میں مختلف شعبہ ہائے زندگی سے تعلق رکھنے والی نامور شخصیات کی کثیر تعداد نے شرکت کی اور عید کے اس مبارک موقع پر اتحاد و بھائی چارگی کا پیغام دیا۔

کوثر جہاں: خدمتِ خلق کی مثال

کوثر جہاں، جو دہلی حج کمیٹی کی چیئرپرسن ہیں، نہ صرف ایک سرکاری ذمہ داری نبھا رہی ہیں بلکہ وہ سماجی خدمت کی بھی ایک مثال ہیں۔ فروری 2023ء میں منتخب ہونے والی کوثر جہاں دہلی کی تاریخ میں یہ عہدہ سنبھالنے والی دوسری خاتون ہیں ۔ ممبئی سے تعلق رکھنے والی اور حیدرآباد سے وابستہ کوثر جہاں کا تعلق بھارتیہ جنتا پارٹی سے ہے اور وہ پچھلے 15 سال سے پارٹی سے وابستہ ہیں ۔ وہ اپنی سماجی وابستگی کے لیے بھی جانی جاتی ہیں اور دہلی کی این جی او ’’سمپورن‘‘ سے بھی وابستہ رہ چکی ہیں، جو خواتین کے مسائل پر کام کرتی ہے ۔ ان کی قیادت میں دہلی حج کمیٹی نے تربیتی پروگرام اور دستاویزات کے انتظامات سمیت حجاج کرام کی سہولت کے لیے کئی اہم اقدامات کیے ہیں۔

مرکزی وزیر کرن رجیجو کی خصوصی شرکت

تقریب کے خصوصی مہمان مرکزی وزیر برائے اقلیتی امور کرن رجیجو تھے۔ انہوں نے اپنے خطاب میں عید الفطر کی اہمیت اور ملک میں امن و امان کو برقرار رکھنے میں تمام مذاہب کے کردار پر زور دیا۔ انہوں نے کہا کہ حج کمیٹی کا کام صرف انتظامی نہیں بلکہ یہ لوگوں کے دلوں کو جوڑنے کا بھی ذریعہ ہے۔ انہوں نے کوثر جہاں کی کاوشوں کو سراہتے ہوئے کہا کہ ان کی قیادت میں دہلی حج کمیٹی نئے معیارات قائم کر رہی ہے۔

آشیش سود اور نشی کانت دوبے کی موجودگی

اس موقع پر دہلی حکومت کے وزیر برائے دخلی امور و تعلیم آشیش سود بھی بطور خاص موجود تھے۔ انہوں نے کہا کہ دہلی حکومت تمام تہواروں کو مل کر منانے کی روایت کو مضبوط کر رہی ہے اور عید ملن جیسی تقریبات سے معاشرے میں بھائی چارگی کو فروغ ملتا ہے۔ بی جے پی ایم پی نشی کانت دوبے نے بھی اس عید ملن میں دیر تک موجود رہ کر حاضرین سے ملاقات کی اور عید کی سب کو مبارکباد پیش کی۔

صحافیوں، افسروں اور رہنماؤں کی بھرپور شرکت

تقریب میں میڈیا جگت کی کئی معروف شخصیات شریک ہوئیں۔انڈیا ٹی وٰ کے رَجَت شرما، دوردرشن نیوز کے سدھیر چودھری، نیوز 18 کے امیش دیوگن، اے بی پی نیوز کی چترا ترپاٹھی، سنگیتا ترپاٹھی، پرتبھا اڈوانی، آج تک کے سپریا پرساد سمیت متعدد نامور صحافیوں نے شرکت کی۔ اردو صحافت کے حوالے سے منصف ٹی وی کے خورشید ربانی، روزنامہ سیاسی تقدیر کے مستقیم خان، بھارت ایکسپریس کے ڈاکٹر خالد رضا خان سمیت بڑی تعداد میں اردو ایڈیٹرز اور صحافی بھی موجود تھے۔ اس کے علاوہ مختلف محکموں کے افسران، سماجی و مذہبی رہنما اور بڑی تعداد میں شہریوں نے شرکت کر کے اس تقریب کو تاریخی بنا دیا۔

مہمانوں کی تواضع اور تہوار کا رنگ

تقریب میں عید کی مبارکباد دی گئی اور مہمانوں کے لیے خصوصی عید پکوان کا بھی اہتمام کیا گیا۔ ماحول میں تہوار کا رنگ صاف نظر آ رہا تھا۔ لوگوں نے ایک دوسرے سے گلے مل کر عید کی خوشیاں شیئر کیں۔ اس موقع پر کوثر جہاں نے کہا کہ ’’عید کا تہوار محبت اور بھائی چارگی کا پیغام دیتا ہے۔ ہم نے اس تقریب کے ذریعے تمام طبقوں کے لوگوں کو اکٹھا کرنے کی کوشش کی ہے۔‘‘

اختتام اور اعتماد کا اظہار

تقریب کے اختتام پر محترمہ کوثر جہاں نے تمام مہمانوں کا شکریہ ادا کیا اور امید ظاہر کی کہ آئندہ بھی اس طرح کی تقریبات کا انعقاد ہوتا رہے گا۔ انہوں نے خاص طور پر وزیر اقلیتی امور کرن رجیجو اور وزیر آشیش سود کا شکریہ ادا کیا۔ انہوں نے کہا کہ دہلی حج کمیٹی عوام کی خدمت کے لیے پرعزم ہے اور آنے والے وقتوں میں مزید بہتر انتظامات کیے جائیں گے۔ یہ تقریب اپنے نوعیت کی ایک منفرد مثال ہے جہاں سیاست، میڈیا، سماج اور مذہب کے لوگ ایک پلیٹ فارم پر جمع ہوئے اور متحد ہندوستان کا عملی نمونہ پیش کیا۔

بھارت ایکسپریس اردو۔