بھوپال/پٹنہ: مدھیہ پردیش کے دتیا اسمبلی ضمنی انتخاب اور بہار کے بانکی پور اسمبلی ضمنی انتخاب میں ووٹوں کی گنتی جاری ہے۔ تازہ رجحانات کے مطابق دتیا میں کانگریس امیدوار گھنشیام سنگھ نے بھارتیہ جنتا پارٹی (بی جے پی) کے امیدوار اشوتوش تیواری پر معمولی برتری حاصل کر لی ہے، جبکہ بانکی پور میں جن سوراج پارٹی کے بانی پرشانت کشور اپنی سبقت مزید مستحکم کرتے ہوئے آگے بڑھ رہے ہیں۔
دتیا میں کانگریس کو معمولی برتری
الیکشن کمیشن آف انڈیا کے مطابق دتیا اسمبلی حلقے میں ووٹوں کی گنتی کے چوتھے مرحلے کے بعد کانگریس کے گھنشیام سنگھ کو 17,290 ووٹ ملے ہیں، جبکہ بی جے پی کے آشوتوش تیواری 16,457 ووٹوں کے ساتھ دوسرے نمبر پر ہیں۔ اس طرح گھنشیام سنگھ کو 833 ووٹوں کی برتری حاصل ہے۔ گھنشیام سنگھ نے دعویٰ کیا کہ جیسے جیسے گنتی آگے بڑھے گی، ان کی برتری میں اضافہ ہوتا جائے گا۔ انہوں نے یہ بھی کہا کہ بی جے پی کے کئی کارکن ناراض تھے اور خاموشی سے ان کی حمایت کر رہے تھے، تاہم سابق وزیر نروتم مشرا نے ان کی کوئی مدد نہیں کی۔ ابتدائی مرحلے میں بی جے پی کے امیدوار کو تقریباً 1,100 ووٹوں کی سبقت حاصل تھی، تاہم بعد کے مراحل میں کانگریس امیدوار نے مقابلہ پلٹتے ہوئے برتری حاصل کرلی۔
بانکی پور میں پرشانت کشور کی برتری برقرار
ادھر بہار کے بانکی پور اسمبلی حلقے میں ووٹوں کی گنتی کے چھٹے مرحلے تک جن سوراج پارٹی کے بانی پرشانت کشور 11,603 ووٹ حاصل کرکے سرفہرست ہیں۔ انہیں اپنے قریبی حریف پر 3,451 ووٹوں کی برتری حاصل ہے۔ پرشانت کشور نے انتخابی مہم کے دوران کہا تھا کہ انہوں نے جان بوجھ کر بی جے پی کے مضبوط گڑھ بانکی پور سے انتخاب لڑنے کا فیصلہ کیا تاکہ بہار کے عوام کو ذات پات اور مذہب سے اوپر اٹھ کر ووٹ دینے کا پیغام دیا جاسکے۔
تین ریاستوں میں ضمنی انتخابات
الیکشن کمیشن نے 6 جولائی کو بہار، گجرات اور مدھیہ پردیش کی تین اسمبلی نشستوں پر ضمنی انتخابات کا نوٹیفکیشن جاری کیا تھا۔ ان نشستوں پر 30 جولائی کو ووٹنگ ہوئی تھی۔ بہار کی بانکی پور نشست بی جے پی رہنما نتن نبین کے 30 مارچ 2026 کو استعفیٰ دینے کے بعد خالی ہوئی تھی، جبکہ مدھیہ پردیش کی دتیا نشست راجیندر بھارتی کی 2 اپریل 2026 کو عوامی نمائندگی ایکٹ 1951 اور آئین ہند کے آرٹیکل 191(1)(e) کے تحت نااہلی کے بعد خالی ہوئی تھی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
