دہلی میں پانی کا بحران
نئی دہلی: ملک کی راجدھانی دہلی میں پانی کی قلت پر شور مچا ہوا ہے۔ دہلی کے لوگ پانی کی ایک ایک بوند کو ترس رہے ہیں، لیکن پانی نہیں مل رہا۔ بی جے پی نے اتوار کے روز دہلی میں پانی کی قلت کو لے کر مختلف مقامات پر احتجاج کیا۔ پروین شنکر کپور، سابق میئر جئے پرکاش جے پی اور بی جے پی کے کئی کارکنوں نے دہلی کے صدر بازار میں دہلی حکومت کے خلاف مظاہرہ کیا۔ اس مظاہرے میں خواتین کی بڑی تعداد نے بھی شرکت کی۔
بی جے پی لیڈر پروین شنکر کپور نے کہا کہ اروند کیجریوال نے دہلی کی عوام سے جو بڑے بڑے وعدے کئے تھے وہ کہاں ہیں؟ دہلی کے لوگ پانی کی قلت سے پریشان ہیں، انہیں پانی نہیں مل رہا ہے۔ اس دوران انہیں صدر بازار کے ایم ایل اے عمران حسین پر بھی حملہ کرتے دیکھا گیا۔
سابق میئر جئے پرکاش جے پی نے کہا کہ صدر بازار میں دہلی کے لوگوں کے پیسے سے بورنگ پائپ لائن بچھائی گئی تھی، لیکن اس کا استعمال نہیں ہو رہا ہے۔ اس بورنگ پائپ لائن میں بھی بڑا گھپلہ ہوا ہے۔ دہلی کے عوام اس حکومت کو معاف نہیں کریں گے۔
بی جے پی لیڈران نے بھی پانی کی قلت کو لے کر سنگم وہار کے قریب مہرولی-بدر پور روڈ پر احتجاج کیا۔ اس موقع پر جنوبی دہلی کے نومنتخب ایم پی رامویر بیدھوری بھی موجود تھے۔ اس دوران لوگوں نے دہلی حکومت کے خلاف نعرے لگائے۔ بی جے پی ایم پی رامویر سنگھ بیدھوری نے پانی کے بحران کو لے کر عام آدمی پارٹی کو نشانہ بنایا۔
دہلی بی جے پی کے ریاستی صدر وریندر سچدیوا نے کہا ہے کہ ہم نے پانی کے مسئلہ کو لے کر مظاہرہ کیا ہے۔ پیر کے روز عام آدمی پارٹی کے اراکین اسمبلی کے گھروں کے باہر احتجاج کریں گے۔ اگر دہلی کے لوگ پانی کو ترس رہے ہیں تو اس کی ذمہ دار عام آدمی پارٹی اور اس کی حکومت ہے۔ ان کے ایم ایل اے اور وزیر پانی چوری کرتے ہیں اور پانی کی بربادی کو روک نہیں سکے۔ اگر لیکیج اور چوری روک دی جاتی تو دہلی کے لوگوں کو پانی کے لیے ترسنا نہیں پڑتا۔
آپ کو بتا دیں کہ ملک کی راجدھانی دہلی میں گزشتہ کئی دنوں سے پانی کا بحران ہے۔ پانی کے مسئلہ کو لے کر دہلی کے کئی علاقوں میں شور مچا ہوا ہے۔ پانی کے بحران کے درمیان بھارتیہ جنتا پارٹی بھی عام آدمی پارٹی پر مسلسل حملے کر رہی ہے اور دونوں پارٹیاں ایک دوسرے پر الزامات لگا رہی ہیں۔
بھارت ایکسپریس۔
