پاکستان کی حکومت عوامی احتجاج اور بڑھتے سیاسی دباؤ کے آگے جھک گئی ہے اور بالآخر سابق وزیرِ اعظم عمران خان کی بہن عظمیٰ خانم کو ان سے جیل میں ملاقات کی اجازت دے دی گئی ہے۔ عمران خان گزشتہ دو برس سے زائد عرصے سے راولپنڈی کی اڈیالہ جیل میں قید ہیں اور گزشتہ کئی دنوں سے ان کی جیل میں موت کی افواہوں نے ملک بھر میں شدید بے چینی اور احتجاج کی لہر پیدا کر دی تھی۔ اطلاعات کے مطابق عمران خان کی صحت اور مبینہ موت کی خبروں کے بعد تحریک انصاف کے کارکن مسلسل اڈیالہ جیل کے باہر جمع ہو کر شفاف معلومات کا مطالبہ کر رہے تھے۔ عوامی دباؤ اتنا بڑھ گیا کہ حالات حکومت اور انتظامیہ کے قابو سے باہر ہونے لگے، جس کے بعد حکومت نے ملاقات کی اجازت کیلئے راستہ ہموار کیا۔ قابل ذکر ہے کہ اسلام آباد ہائی کورٹ پہلے ہی عمران خان سے خاندانی ملاقات کی اجازت دے چکی تھی، مگر جیل انتظامیہ مسلسل ان کی بہنوں کو ملاقات کی اجازت دینے سے انکار کرتی رہی۔ اس پابندی نے افواہوں کو مزید تقویت دی اور ملک بھر میں بے چینی میں اضافہ ہوگیا۔
جیل کے باہر پی ٹی آئی کارکنوں کی بڑی تعداد جمع
روزنامہ ڈان کی رپورٹ کے مطابق عظمیٰ خانم آج اپنے بھائی سے جیل کے اندر ملاقات کرنے میں کامیاب ہو گئیں، جبکہ باہر بڑی تعداد میں تحریک انصاف کے کارکن موجود تھے جو عمران خان کے حق میں نعرے لگا رہے تھے۔
اسلام آباد اور راولپنڈی میں دفعہ 144 نافذ
صورتحال کی سنگینی دیکھتے ہوئے اسلام آباد اور راولپنڈی میں دفعہ 144 نافذ کر دی گئی ہے تاکہ کسی بڑے احتجاج یا ہنگامے کو روکا جا سکے۔ وزیرِ مملکت برائے داخلہ طلال چوہدری نے اعلان کیا ہے کہ دفعہ 144 کی خلاف ورزی کرنے والوں کے خلاف سخت کارروائی کی جائے گی۔
پی ٹی آئی کا احتجاجی اعلان
کئی ہفتوں سے عمران خان کے اہلِ خانہ اور پارٹی رہنماؤں کو ملاقات کی اجازت نہ ملنے پر تحریک انصاف کی قیادت نے منگل کے روز اعلان کیا تھا کہ وہ اسلام آباد ہائی کورٹ اور اڈیالہ جیل کے باہر احتجاج کریں گے، جس کے بعد حکومت پر دباؤ بڑھا اور ملاقات کا فیصلہ واپس لینا پڑا۔ سابق وزیر اعظم سے ملاقات کی اجازت کا فیصلہ موجودہ سیاسی کشیدگی میں ایک اہم موڑ تصور کیا جا رہا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
