مرکزی حکومت نے پارلیمنٹ کے خصوصی اجلاس پر کانگریس پارلیمانی کمیٹی کی سربراہ سونیا گاندھی کے خط کا جواب دیا ہے۔ پارلیمانی امور کے وزیر پرہلاد جوشی نے کہا ہے کہ یہ بدقسمتی کی بات ہے کہ آپ روایات پر توجہ نہیں دے رہی ہیں اوریہ انتہائی بدقسمتی کی بات ہے کہ آپ پارلیمنٹ اور اس کے کام کاج کو سیاسی رنگ دینے کی کوشش کر رہی ہیں، اور جہاں کوئی تنازعہ نہیں ہے وہاں غیر ضروری تنازعہ کھڑا کر رہی ہیں۔ جیسا کہ آپ جانتی ہیں کہ پارلیمنٹ کا اجلاس آرٹیکل 85 کے تحت آئینی مینڈیٹ کی تعمیل میں باقاعدگی سے منعقد کیا جاتا ہے، جو یہ حق دیتا ہے کہ صدرہند، وقتاً فوقتاً ایوان کو ایسے وقت اور جگہ پر بلوا سکتا ہے جہاں وہ مناسب سمجھیں اور اس کے ایک سیشن کی آخری میٹنگ اور اگلے سیشن کی پہلی میٹنگ کے لیے طے شدہ تاریخ کے درمیان چھ ماہ کا وقفہ نہیں ہونا چاہیے۔
انہوں نے کہا، “مکمل طور پرضوابط کی پاسداری کے بعد، پارلیمانی امور کی کابینہ کمیٹی کی منظوری کے بعد، صدرجمہوریہ نے 18 ستمبر سے شروع ہونے والا پارلیمنٹ کا اجلاس بلایا ہے۔ شاید آپ کی توجہ روایات پرنہیں ہے۔ پارلیمنٹ کا اجلاس بلانے سے پہلے نہ تو سیاسی جماعتوں کے ساتھ بات چیت کی جاتی ہے اور نہ ہی مسائل پر بات ہوتی ہے۔ عزت مآب صدر کے سیشن بلانے کے بعد اور سیشن شروع ہونے سے پہلے تمام جماعتوں کے لیڈروں کا اجلاس ہوتا ہے جس میں پارلیمنٹ میں پیش ہونے والے مدعوں اور کام کاج پر تبادلہ خیال کیا جاتا ہے۔
پرہلاد جوشی نے مزید کہا کہ میں یہ بھی بتانا چاہوں گا کہ ہماری حکومت کسی بھی مسئلے پر بات کرنے کے لیے ہمیشہ تیار ہے۔ ویسے آپ نے جن مسائل کا ذکر کیا ہے وہ کچھ دن پہلے مانسون اجلاس کے دوران تحریک عدم اعتماد پر بحث کے دوران اٹھائے گئے تھے اور حکومت نے ان کا جواب بھی دیا تھا۔انہوں نے کہا کہ معمول کے مطابق طے شدہ طرز عمل کے مطابق سیشن کا ایجنڈا مناسب وقت پر جاری کیا جائے گا۔ میں ایک بار پھر یہ بتانا چاہتا ہوں کہ ہمارے پارلیمانی کام کاج میں، چاہے کوئی بھی پارٹی حکومت میں رہی ہو، آج تک پارلیمنٹ کے اجلاس کے وقت ایجنڈا کبھی بھی پہلے سے محدود نہیں رہاہے۔
جوشی نے کہا کہ مجھے پورا بھروسہ ہے کہ پارلیمنٹ کا وقار برقرار رہے گا اور اس پلیٹ فارم کو سیاسی تنازعات کے لیے استعمال نہیں کیا جائے گا۔ اس کے علاوہ آئندہ اجلاس کو خوش اسلوبی سے چلانے کے لیے میں آپ سے بھرپور تعاون کی توقع رکھتا ہوں جس کے قومی مفاد میں بامعنی نتائج برآمد ہو سکتے ہیں۔ دریں اثنا، میڈیا سے بات کرتے ہوئے پرہلاد جوشی نے کہا کہ اس سے پہلے بھی سیشن بلانے سے پہلے اپوزیشن جماعتوں سے مشورہ نہیں کیا جاتا تھا، یہ حکومت کا استحقاق ہے، اس سے پہلے جب دوسری حکومتیں تھیں، ایجنڈا ایسا نہیں تھا۔ پہلے ظاہر نہیں کیا جاتا تھا۔ آپ کو بتا دیں کہ اس سے قبل سونیا گاندھی نے اپوزیشن اتحاد انڈیا کی جانب سے پی ایم مودی کو ایک خط لکھا تھا جس میں 9 مسائل کا ذکر کیا گیا تھا۔ اس کے بعد حکومت نے خط لکھ کر جواب دیا ہے۔
بھارت ایکسپریس۔
