Bharat Express DD Free Dish

UP Election 2027: اتر پردیش کی سیاست میں ’ایم‘ فیکٹر کا نیا باب، اعظم خان اور اسدالدین اویسی کے درمیان کیوں بڑھ رہی ہے کشمکش؟

2027 کے اسمبلی انتخابات سے پہلے تقریباً 20 فیصد مسلم ووٹ بینک پر اثر و رسوخ کی جنگ تیز، اعظم خان کے بیان پر اویسی کا جوابی حملہ، دونوں رہنماؤں کے سامنے سیاسی چیلنجز بھی کم نہیں

اتر پردیش میں 2027 کے اسمبلی انتخابات کی تیاریوں کے ساتھ ہی تقریباً 20 فیصد مسلم ووٹ بینک پر اثر و رسوخ قائم کرنے کی سیاسی دوڑ تیز ہوگئی ہے۔ اب تک مغربی اتر پردیش سے لے کر پوروانچل تک ریلیاں کرنے والے حیدرآباد کے رکن پارلیمنٹ اسدالدین اویسی کو جیل سے رہائی کے بعد رام پور کے سینئر رہنما اعظم خان کی جانب سے براہ راست سیاسی چیلنج کا سامنا ہے۔ اعظم خان کے اویسی کو نشانہ بنانے والے بیان کے بعد اقلیتی ووٹروں کے ممکنہ رخ کو لے کر سیاسی حلقوں میں نئی بحث شروع ہوگئی ہے۔

’حیدرآبادی بریانی‘ اور ’پلاؤ‘ کی سیاسی جنگ

نئے تنازع کی شروعات اعظم خان کے اس بیان سے ہوئی، جس میں انہوں نے اویسی کا نام لیے بغیر کہا کہ اتر پردیش کے اس علاقے میں ’حیدرآبادی بریانی‘ پسند نہیں کی جاتی، بلکہ یہاں پلاؤ اور مٹن بریانی کو ترجیح دی جاتی ہے۔ اس کے ساتھ ہی اعظم خان نے اویسی پر طنز کرتے ہوئے کہا کہ وہ بیرسٹر ہیں، مولانا نہیں۔ صرف داڑھی رکھ لینے سے کوئی مولانا نہیں بن جاتا۔ اعظم خان نے جیل میں رہنے کے دوران اویسی کی جانب سے کی گئی دعاؤں پر بھی سوال اٹھائے۔ ان کا کہنا تھا کہ ان کا گھر صرف چار قدم کی دوری پر تھا اور وہ ان کے اہل خانہ کی خیریت دریافت کر سکتے تھے۔

اعظم خان کے اس بیان پر جواب دیتے ہوئے اسدالدین اویسی نے ایک ٹی وی چینل کو دیے گئے انٹرویو میں کہا کہ ’بعض لوگوں کے لیے کھانا ترجیح ہو سکتا ہے، لیکن ان کے لیے کھانا ترجیح نہیں ہے۔ وہ زندہ رہنے کے لیے کھاتے ہیں، کھانے کے لیے زندہ نہیں رہتے۔اویسی نے 2013 کے مظفر نگر فسادات کا ذکر کرتے ہوئے اس وقت کی سماج وادی پارٹی حکومت اور اس کی قیادت کو نشانہ بنایا۔ انہوں نے الزام لگایا کہ اپوزیشن جماعتیں مسلمانوں کو صرف بی جے پی کا خوف دکھا کر ووٹ حاصل کرتی ہیں، لیکن انہیں سیاسی حصہ داری نہیں دیتیں۔

دونوں رہنماؤں کی سیاسی حکمت عملی الگ الگ

اتر پردیش کے مسلم ووٹروں کے سامنے دونوں رہنماؤں کی سیاست اور کام کرنے کا انداز مختلف ہے۔ اسدالدین اویسی کی سیاست کی بنیاد آزاد مسلم قیادت اور ’اب عبدال دری نہیں بچھائے گا‘ جیسے نعروں کے ذریعے سیاسی حصہ داری کا مطالبہ ہے۔ اویسی نے نگینہ کے رکن پارلیمنٹ چندر شیکھر آزاد کے ساتھ ’سماجی تبدیلی مورچہ‘ بنا کر دلت اور مسلم ووٹروں کا نیا سیاسی اتحاد تشکیل دینے کی کوشش کی ہے۔ ان کی ریلیوں میں مسلم نوجوانوں کی شرکت بھی دیکھنے کو ملتی ہے۔ دوسری جانب اعظم خان کی سب سے بڑی طاقت ان کا کئی دہائیوں کا سیاسی تجربہ، رام پور سے 10 مرتبہ رکن اسمبلی منتخب ہونے کا ریکارڈ اور سماج وادی پارٹی کا بوتھ سطح تک پھیلا تنظیمی نیٹ ورک ہے۔ مغربی اتر پردیش اور روہیل کھنڈ کے رام پور، مراد آباد، سنبھل، امروہہ، بجنور اور بریلی جیسے اضلاع کی تقریباً 25 سے 30 اسمبلی نشستوں پر ان کا روایتی اثر و رسوخ مانا جاتا ہے۔ اسی بنیاد پر سماج وادی پارٹی کی قیادت کو امید ہے کہ اعظم خان کے اثر سے پارٹی کے کارکنوں کو متحد رکھنے میں مدد مل سکتی ہے۔

دونوں رہنماؤں کے سامنے سیاسی چیلنجز

دونوں رہنماؤں کو اپنی اپنی سیاسی حدود اور چیلنجز کا سامنا بھی ہے۔ اسدالدین اویسی کے سامنے اتر پردیش میں محدود تنظیمی ڈھانچے، گزشتہ انتخابات میں ایک بھی نشست حاصل نہ کر پانے اور اپوزیشن جماعتوں کی جانب سے ’ووٹ کاٹنے والی پارٹی‘ قرار دیے جانے جیسے الزامات سے نمٹنے کا چیلنج ہے۔ وہیں اعظم خان عبوری ضمانت پر باہر ہیں۔ ان کے خلاف زیر التوا قانونی معاملات، صحت سے متعلق مسائل اور ان کا اثر و رسوخ بنیادی طور پر مغربی اتر پردیش تک محدود ہونا سماج وادی پارٹی کے لیے غور طلب پہلو ہیں۔ ایسے میں 2027 کے اسمبلی انتخابات سے پہلے اعظم خان اور اسدالدین اویسی کے درمیان بڑھتی سیاسی کشمکش اتر پردیش کے مسلم ووٹ بینک کی سمت اور انتخابی سیاست پر کس حد تک اثر انداز ہوگی، یہ آنے والے وقت میں واضح ہوگا۔

بھارت ایکسپریس اردو-


بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔

Also Read