اتراکھنڈ میں بھی سڑک پر نماز کی ادائیگی پر پابندی، خلاف ورزی کرنے پر ہوگی سخت کارروائی، وزیراعلیٰ پشکر سنگھ دھامی نے جاری کئے احکامات

اتراکھنڈ کے وزیراعلیٰ پشکرسنگھ دھامی نے اتراکھنڈ میں سڑکوں پرنمازادا کرنے پرسخت موقف اختیارکیا ہے۔ انہوں نے واضح طورپرکہا ہے کہ دیو بھومی اتراکھنڈ میں کسی بھی حالت میں مذہبی سرگرمیوں کے لیے عوامی سڑکوں کو یرغمال بنانے کی اجازت نہیں دی جائے گی۔ انہوں نے کہا کہ عقیدے کا احترام سب کرتے ہیں، لیکن کوئی بھی امن وامان سے بالاترنہیں ہوسکتا۔

وزیراعلیٰ دھامی نے کہا کہ اس وقت ریاست میں چاردھام یاترا جاری ہے اورلاکھوں عقیدت مند اتراکھنڈ پہنچ رہے ہیں۔ ریاست میں پرامن، منظم اورنظم وضبط کے ماحول کوبرقراررکھنا حکومت کی اولین ترجیح ہے۔ انہوں نے مزید کہا کہ سڑکیں عوامی نقل وحرکت کے لئے ہیں اورانہیں رکاوٹ یا احتجاج کرنے کا ذریعہ نہیں بننے دیا جائے گا۔

نمازکی جگہ مسجد اورعیدگاہ ہیں: پشکرسنگھ دھامی

اتراکھنڈ کے وزیراعلیٰ نے کہا کہ نمازصرف مساجد، عیدگاہوں اورمخصوص مقامات پرادا کی جانی چاہئے۔ عوامی سڑکوں کوبلاک کرنا اورلوگوں کوتکلیف دینا کسی صورت برداشت نہیں کیا جائے گا۔ انہوں نے کانگریس پارٹی پرخوشامد کی سیاست کرنے کا الزام لگاتے ہوئے کہا کہ کچھ لوگ ووٹ بینک کی سیاست کے لئے سڑکوں پرنمازکی حمایت کررہے ہیں، لیکن اتراکھنڈ حکومت کی پالیسی واضح ہے۔

सड़कों पर नमाज़ की अनुमति नहीं देंगे, आवागमन और क़ानून व्यवस्था में अवरोध पैदा करने वालों पर सख़्त कार्रवाई करेंगे। धार्मिक और आध्यात्मिक पर्यटन की धरा है देवभूमि उत्तराखंड, यहाँ किसी को भी माहौल ख़राब करने का अधिकार नहीं है। pic.twitter.com/HTal5fIYpr

— Pushkar Singh Dhami (@pushkardhami) May 22, 2026

ریاست میں قانون کا راج سب سے اوپر: دھامی

انہوں نے خبردارکیا کہ عوامی سڑکوں کو یرغمال بنا کرافراتفری پھیلانے والوں کے خلاف سخت کارروائی کی جائے گی۔ انہوں نے اس بات کا اعادہ کیا کہ دیو بھومی کے امن، ثقافت اورنظم وضبط میں خلل ڈالنے کی کسی کو اجازت نہیں دی جائے گی۔ انہوں نے کہا کہ ریاست میں قانون کی حکمرانی سب سے اوپرہے اوررہے گا۔

بھارت ایکسپریس اردو-